Yu Inap Painim Bel Isi We?

Long wanpela liklik ples long Wes Afrika, yangpela Josué i tok gutbai long famili na ol pren bilong em.a Em i go long bikpela taun bilong painim mani. Tasol i no longtaim na em i kisim save olsem, long taun, i gat hatwok tru long kamap maniman.

I STAP bilong Josué long taun i gat hatwok tru long en​—⁠em i narapela kain tru long samting em i bin tingim pastaim. Em i gat bikpela laik tru long go bek lukim famili na ol pren bilong em long dispela liklik ples em i bin lusim. Tasol em i pret, nogut sampela wanples i tok bilas long em. Em i ting, ‘Ol bai rabisim mi, long wanem, samting mi bin go long taun long mekim, dispela i no bin kamap.’

Narapela samting i putim bikpela hevi moa yet long em i olsem: Em i save papamama bilong em bai bel hevi. Ol i ting em bai helpim ol long mani samting. Dispela i mekim na tingting na bel bilong em i no stap isi. Taim em i wok long karim dispela hevi, em i wok planti aua long wanpela wok em ol man i ting em wok bilong ol man nating, na em i kisim liklik pe tasol. Skin i les, long wanem, em i mekim planti wok tumas. Na tu, em i no gat taim long mekim ol wok em i ting i bikpela samting tru​—⁠em ol wok Kristen. Em i stap longwe long famili na ol pren bilong em, olsem na em i bel hevi na i pilim olsem em i stap wanpis. Em i bin ting sindaun bilong em long taun bai i gutpela, tasol nogat.

Samting i painim Josué i bin painim planti manmeri. I no olsem Josué i tingim em yet tasol na long dispela as em i lusim ples na i go long taun, nogat. Em i laik painim rot bilong i stap gutpela​—⁠em tasol. Em i bilip olsem, long taun planti rot bai op long em i ken painim gutpela sindaun, winim liklik ples bilong em. Tru, sampela i bin painim gutpela sindaun liklik long ol samting bilong skin, tasol i no olsem ol i gat bel isi long i stap bilong ol, nogat. Dispela samting i no bin kamap long Josué, na ating i no ken kamap long planti narapela ol i laik painim rot bilong i stap gut. Dispela i kirapim yumi long askim olsem: ‘Gutpela sindaun i makim wanem?’

Ol man i gat narapela narapela tingting long dispela samting. Sampela i tok, gutpela sindaun i olsem: Man i no pret o tingting planti long wanpela samting, na i no gat hevi samting i stap bilong nogutim em. Klostu olgeta man i save olsem ol i no inap abrusim olgeta kain hevi. Tasol ol i amamas sapos ol i pilim olsem ol i gat bel isi long i stap bilong ol, maski planti samting i stap bilong nogutim ol.

Olsem wanem long yu yet? Yu save lukluk i go we bilong painim gutpela sindaun? Yu ting yu inap painim long taun, olsem Josué i bin tingim? O yu ting mani i olsem rot bilong helpim yu long painim, maski yu kisim dispela mani we we o long wanem rot? Yu ting pasin bilong kisim biknem bai helpim sindaun bilong yu? Tasol maski wanem wanem samting yu ting em i rot bilong helpim sindaun bilong yu, sapos yu painim pinis, yu ting gutpela sindaun bilong yu wantaim famili bilong yu bai i stap inap hamas yia?

Orait nau yumi ken tingim 3-pela rot em planti man i mekim wok long en bilong helpim sindaun bilong ol​​—⁠biktaun, mani, biknem. Na bihain long dispela, bai yumi skelim wanem samting tru bai helpim yumi long painim gutpela sindaun inap oltaim oltaim.

[Futnot]