Ripot Long Wok Bilong Kingdom

Painim Tok i Tru Long Narapela Kain Ples

EM I laik bilong God long “kisim bek olgeta manmeri, bai ol i ken save long as bilong tok tru.” (1 Timoti 2:​3, 4) Bilong mekim olsem, ol Witnes Bilong Jehova i save prinim na tilim planti milion Baibel na ol narapela buk samting bilong helpim ol man long kisim gut save long Baibel. Sampela taim, ol dispela buk i bin helpim ol man i gat gutpela bel long kisim save long tok i tru long ol narapela kain rot. Ol man bilong autim tok bilong Kingdom long Freetown, Siera Leon, i mekim dispela stori.

Osman em i namba tu pikinini man bilong wanpela famili i gat 9-pela pikinini. Em i kamap bikpela insait long famili i save tingim lotu, na oltaim em i save go long lotu wantaim papa bilong em. Tasol Osman i tingting planti long ol samting bilong hel, em lotu bilong em i bin skulim ol man long en. Em i no save long as na God bilong marimari inap givim pen long ol man nogut long paia. Ol man i bin kamapim kain kain tok bilong helpim Osman long save gut long dispela bilip bilong helpaia, tasol tok bilong ol i no mekim isi bel bilong em.

Taim Osman i gat 20 krismas, wanpela taim em i lukim wanpela blupela buk i stap insait long dram pipia. Em i save laikim ol buk, olsem na em i kisim na i klinim buk, na em i lukim dispela het tok​​—⁠Tok i Tru i Bringim Man Long Laip Oltaim.a

Osman i tingting, ‘Wanem dispela tok i tru?’ Dispela tingting i kirapim em na em i laik kisim save, olsem na Osman i kisim buk i go long haus na em i ritim dispela buk olgeta. Em i amamas tru long kisim save olsem God i gat nem​​—⁠em Jehova! (Song 83:​18, NW ) Osman i kisim save tu olsem nambawan bikpela pasin bilong God em pasin sori, na dispela tingting bilong givim pen long ol man long paia, em samting Em i no laik tru long en. (Jeremaia 32:35; 1 Jon 4:⁠8) Osman i ritim long ol laspela pes bilong dispela buk olsem, klostu nau Jehova bai mekim graun i kamap wanpela paradais na ol manmeri bai i stap oltaim long en. (Song 37:29; KTH 21:​3, 4) Em i wanpela gutpela tok i tru i kam long God bilong sori na marimari! Long bel olgeta, Osman i tok tenkyu long Jehova long larim em i painim tok i tru long narapela kain ples.

Sampela de bihain, sampela pren bilong Osman i helpim em long painim Haus Kingdom bilong ol Witnes Bilong Jehova na em i go long miting long namba wan taim. Long Haus Kingdom, em i askim wanpela Witnes long stadi wantaim em long Baibel. Maski famili i birua nogut tru long em, Osman i kamap strong long ol samting bilong spirit na em i kisim baptais. (Matyu 10:36) Long nau, em i mekim wok elda insait long kongrigesen. Dispela gutpela samting i kamap, long wanem, em i bin painim wanpela buk bilong Baibel long dram pipia!

[Futnot]