Lotuim God ‘Long Spirit’
“God i olsem husat tru? Na i gat wanpela samting i stap i luk olsem God, a?”—AISAIA 40:18.
ATING yu bilip tru olsem pasin bilong mekim wok long ol piksa aikon taim yu lotu long God, em samting God i orait long en. Ating yu pilim olsem dispela pasin i save helpim yu long go klostu moa long dispela Man bilong harim beten, em yumi no inap lukim em long ai na i olsem em i stap longwe.
Tasol yu ting yumi stap fri olgeta long makim wanem rot yumi laik bihainim bilong kam long God? Ating God yet i mas makim wanem rot em i orait long en na wanem rot em i no orait long en, a? Jisas i kamapim tingting bilong God long dispela samting taim em i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jon 14:6) Dispela tok i tambuim pasin bilong mekim wok long ol piksa aikon na ol narapela samting holi.
Yes, i gat wanpela kain pasin bilong lotu em God Jehova i orait long en. Em wanem pasin? Jisas i tok: “Taim i laik kamap na nau i kamap pinis, olsem ol man i laik lotu tru bai ol i lotu long Papa long spirit na long pasin i tru. Long wanem Papa i wok long painim ol kain man olsem bilong ol i ken lotu long Em. God Em i wanpela Spirit. Na ol man i laik lotu long Em, ol i mas lotu long Em long spirit na long pasin i tru.”—Jon 4:23, 24, King Jems Nupela Testamen.
God ‘em i wanpela spirit,’ olsem na yu ting wanpela piksa em yumi inap lukim na holim, em inap makim em? Nogat. Maski wanpela aikon i luk naispela tru, em i no inap tru long glori bilong God. Olsem na wanpela piksa bilong God i no inap makim em liklik, nogat tru. (Rom 1:22, 23) Olsem na sapos wanpela man i lotu long God long rot bilong wanpela piksa aikon ol man yet i bin wokim, yu ting dispela man ‘i lotu long God long pasin i tru’?
Baibel i Tokaut Klia
Lo bilong God i tambuim pasin bilong wokim ol imis bilong lotu long en. Namba tu bilong Tenpela Lo i tok: “Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em.” (Kisim Bek 20:4, 5) Na ol Skripsa Kristen tu i tok: “Yupela i mas stap longwe long pasin bilong lotuim imis.”—1 Korin 10:14, Jerusalem Bible.
Tru, planti man i tok pasin bilong ol long mekim wok long ol imis i no makim olsem ol i lotu long ol. Olsem: Ol Kristen Otodoks i save brukim skru samting na beten long ol aikon, tasol planti ol i tok ol i no lotuim aikon yet. Wanpela pris Otodoks i tok: “Mipela i givim rispek long ol Aikon, long wanem, ol i samting holi, na tu, mipela i adorim samting em ol dispela Aikon i makim.”
Tasol askim i stap yet: God i orait long pasin bilong mekim wok long ol aikon olsem rot bilong adorim em? I no gat wanpela tok long Baibel i tok orait long dispela pasin. Taim ol Israel i wokim piksa bilong pikinini bulmakau, em ol i tok ol i wokim bilong adorim Jehova, em i tok ol i mekim pasin i nogut tru.—Kisim Bek 32:4-7.
Samting Nogut i Stap Hait
Pasin bilong mekim wok long ol piksa aikon samting insait long lotu, dispela inap nogutim ol man. Em inap pulim ol man long lotuim piksa yet na ol i no lotuim God em ol i tok dispela piksa i makim. Aikon yet i kamap samting bilong lotu long en.
Kain samting olsem i bin kamap planti taim long taim bilong ol Israel. Olsem: Taim ol i wokabaut long ples drai nating, Moses i wokim wanpela snek bras. Pastaim, piksa bilong snek ol i hangamapim long wanpela longpela pos em i bilong oraitim bek ol man. Ol man i kisim strafe na snek i kaikaim ol, ol inap lukluk long snek bras na God i helpim ol. Tasol taim ol i sindaun pinis long Graun Bilong Promis, ol i mekim dispela snek bras i kamap olsem samting bilong lotu long en—i olsem dispela snek yet i gat strong long oraitim ol man. Ol i kukim paura i gat gutpela smel na givim long snek olsem ofa, na ol i givim wanpela nem long snek, olsem Nehustan.—Namba 21:8, 9; 2 King 18:4.
Na tu, ol Israel i bin traim long yusim bokis kontrak olsem samting bilong lukautim ol na bai ol birua i no ken winim ol, tasol samting nogut tru i painim ol long dispela. (1 Samuel 4:3, 4; 5:11) Na long taim bilong Jeremaia, ol man bilong Jerusalem i save tingim tru tempel, tasol ol i no tingim tumas dispela God ol i lotuim long dispela tempel.—Jeremaia 7:12-15.
Planti man i bihainim yet pasin bilong lotuim ol samting olsem senis bilong God. Saveman Vitalij Ivanovich Petrenko i tok: ‘Aikon yet em i kamap samting bilong lotu long en. Dispela pasin i bin kam long ol haiden.’ Long buk Understanding the Greek Orthodox Church, wanpela pris bilong lotu Grik Otodoks, Demetrios Constantelos, em tu i tok: “I gat rot na ol Kristen inap mekim aikon yet i kamap samting bilong lotu long en.”
Sampela i tok ol aikon ol i samting bilong helpim ol long lotuim God, em tasol. Tasol tingim: Sampela man i ting, sampela piksa aikon bilong Maria o “ol santuman” ol inap tru long ol i ken adorim na mekim wok long en, winim ol narapela piksa aikon bilong ol dispela man o meri i dai pinis longtaim tru. Olsem: Long Tínos, long kantri Grik, i gat wanpela aikon i makim Maria em wanpela lain Otodoks i givim bel long en, tasol long haus bruder Soumela, long noten Grik, i gat narapela aikon i makim Maria na narapela lain Otodoks i givim bel long en. Tupela lain wantaim i bilip olsem aikon bilong ol yet i gat bikpela strong na em inap wokim planti mirakel, winim narapela aikon, maski tupela aikon wantaim i makim dispela wanpela meri i dai pinis longtaim tru. Olsem na yumi ken save, ol man i ting sampela aikon ol i gat bikpela strong na ol i lotu long ol.
Beten Long “Ol Santuman” o Maria?
Tasol olsem wanem long pasin bilong adorim Maria o “ol santuman”? Taim Satan i traim Jisas, Jisas i kamapim tok bilong Lo 6:13 na i tok: “Yu mas aninit long God, Bikpela bilong yu. Na yu mas lotu long em wanpela tasol.” (Matyu 4:10) Bihain em i tok, olgeta man i lotu tru long God ol bai lotu long “Papa,” narapela man nogat. (Jon 4:23) Olsem na wanpela ensel i givim strongpela tok long aposel Jon taim Jon i laik lotu long em. Em i tok: “Yu no ken mekim olsem! . . . Yu mas lotu long God wanpela tasol.”—KTH 22:9.
Olsem wanem? I orait long yumi ken beten long mama bilong Jisas, em Maria, o long “ol santuman,” na tokim ol long askim God long helpim yumi? Baibel i tok klia olsem: “I gat wanpela namelman tasol i sanap namel long God na ol manmeri, em dispela man Krais Jisas.”—1 Timoti 2:5.
Lukautim Pasin Wanbel Namel Long Yu na God
Pasin bilong mekim wok long ol aikon insait long lotu, em wanpela pasin Baibel i no orait long en. Olsem na em i no inap helpim ol man na bai God i ken orait long ol na kisim bek ol, nogat. Jisas i tok, bilong yumi ken kisim laip i stap gut oltaim oltaim, yumi mas kisim save long dispela wanpela God tru; yumi mas kisim save long ol gutpela pasin bilong em, na long ol samting em i tingting pinis long mekim, na ol samting em i save mekim long ol man. (Jon 17:3) Ol piksa aikon i no inap lukluk, holim samting, o toktok, olsem na ol i no inap helpim man long kisim save long God na lotuim em long pasin Em i laikim. (Song 115:4-8) Yumi inap kisim dispela save long wanpela rot tasol—long rot bilong stadi long Tok Bilong God, em Baibel.
Pasin bilong lotuim ol aikon i no inap helpim man liklik. Em inap nogutim em long ol samting bilong spirit. Olsem wanem dispela inap mekim olsem? Nambawan bikpela samting i olsem: Em inap bagarapim pasin wanbel i stap namel long dispela man na Jehova. Taim ol Israel i lotu long piksa bilong ol god giaman, dispela “i mekim Bikpela i bel nogut na i kros long ol,” na God i tok profet olsem: “Bai mi no inap helpim ol moa.” (Lo 32:16, 20) Bilong ol i ken kamap wanbel gen wantaim God, ol i mas “tromoi ol piksa bilong ol giaman god.”—Aisaia 31:6, 7.
Olsem na i stret Baibel i tok: “Ol liklik pikinini bilong mi, yupela i mas i stap longwe long ol imis”!—1 Jon 5:21, The New American Bible.
[Blok long pes 6]
Ol i Kisim Helpim Long Lotuim God ‘Long Spirit’
Olivera em i wanpela strongpela meri bilong lotu Otodoks long Albenia. Taim dispela kantri i tambuim olgeta lotu long 1967, long pasin hait Olivera i mekim yet ol pasin bilong lotu em i save bihainim. Em i tromoi bikpela hap mani bilong liklik pensen bilong em bilong baim ol piksa aikon ol i bin wokim long gol na silva, na paura i gat gutpela smel, na ol kandel. Em i haitim ol dispela samting insait long bet bilong em na planti taim em i slip long wanpela sia klostu, nogut sampela i lukim o stilim. Taim ol Witnes Bilong Jehova i bungim Olivera long 1990 samting, em i pilim olsem ol tok ol i autim em tok tru bilong Baibel. Em i lukim tok long Baibel i tok olsem man i laik lotu tru, em i mas lotu ‘long spirit,’ na em i kisim save long tingting bilong God long pasin bilong mekim wok long ol piksa aikon. (Jon 4:24) Witnes i stadi long Baibel wantaim Olivera i lukim olsem olgeta taim em i go long haus bilong em, i no gat planti aikon olsem pastaim i stap. Bihain, i no gat wanpela aikon i stap. Taim Olivera i baptais pinis, em i tok: “Bipo mi mekim wok long ol aikon em ol i no inap helpim mi, tasol nau mi gat spirit holi bilong Jehova. Mi tenkyu tru olsem mi inap kisim spirit holi bilong em, maski mi no mekim wok long ol aikon.”
Athena, bilong ailan Lesbos long kantri Grik, em i wanpela strongpela meri bilong lotu Otodoks. Em i insait long wanpela lain bilong singsing na i save bihainim pasin bilong ol tumbuna long lotu, olsem pasin bilong mekim wok long ol piksa aikon. Ol Witnes Bilong Jehova i helpim Athena long save olsem i gat sampela samting em i bin lain long en i no stret wantaim Baibel. Wanpela em pasin bilong mekim wok long ol aikon na kruse. Athena i strong long em yet i mas save gut long as bilong ol dispela samting bilong lotu. Taim em i skelim pinis sampela bikpela buk bambai em i ken kisim sampela save moa, em nau, em i save lotu Kristen i no as bilong ol dispela samting bilong lotu. Em i gat laik long lotuim God ‘long spirit,’ na dispela i kirapim em long rausim ol piksa aikon bilong em, maski pe bilong ol i bikpela tru. Tasol Athena i amamas long lusim ol dispela samting bambai em inap stap klin long ol samting bilong spirit na lotuim God long pasin Em i orait long en.—Aposel 19:19.
[Blok/Piksa long pes 7]
Ol Aikon Em Gutpela Bilas Tasol?
Inap sampela yia pinis ol man long olgeta hap i bin bungim ol piksa aikon. Tasol planti man bilong bungim ol aikon ol i no ting ol i wanpela samting holi na samting bilong lotu, nogat; ol i ting ol i gutpela bilas tasol i save kamapim pasin na tingting bilong ol Baisantin bilong bipo. Planti aikon bilong lotu i save bilasim haus o ofis bilong ol man i tok ol i no bilip long God.
Tasol ol Kristen i gat gutpela bel, ol i no lusim tingting long nambawan as bilong aikon. Em i samting bilong lotu. Ol Kristen i no gat tok long ol narapela i holim aikon, tasol ol yet i no save holim, na ol i no putim long haus olsem wanpela bilas tasol. Dispela samting i stret wantaim stiatok i stap long Lo 7:26: “Yupela i no ken bringim ol dispela giaman god [ol piksa bilong lotu] i kam insait long haus bilong yupela. God i tok, ol dispela samting i mas bagarap, na sapos yupela i kisim bai yupela i bagarap wantaim. Ol dispela giaman god i samting nogut tru, olsem na yupela i mas givim baksait long ol.”
[Piksa long pes 7]
God i no bin larim ol i mekim wok long ol piksa taim ol i lotu long em
[Piksa long pes 8]
Save yumi kisim long Baibel i save helpim yumi long lotuim God long spirit