Stori Nating 6: God i Orait Long Yumi Yusim Ol Imis na Piksa Insait Long Lotu
Wanem as bilong dispela stori nating? “Ol Kristen bilong pastaim i no bin yusim ol imis long lotu bilong ol . . . Inap 400 yia samting bihain long Krais, ol misin i kirap long yusim ol imis, na ol i tok ol man i no gat save, ol inap kisim save long ol tok tru bilong lotu Kristen long rot bilong ol imis, winim save ol inap kisim long rot bilong ol tok na ol buk.”—Buk Cyclopedia of Biblical, Theological, and Ecclesiastical Literature, bilong McClintock na Strong, Volium 4, pes 503 na 504.
Baibel i tok wanem? “Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em.” (Kisim Bek 20:4, 5) Aposel Jon i tokim ol Kristen bilong pastaim: “Ol liklik pikinini bilong mi, yupela i mas i stap longwe long olgeta giaman god.”—1 Jon 5:21.
Yu ting ol imis i rot bilong i go klostu na givim biknem long dispela God em ol i tok ol imis i stap olsem piksa bilong en? Wanpela buk (The Encyclopedia of Religion) i tok: “Ating pastaim wok bilong ol imis em bilong skulim ol man na bilasim ples lotu; em misin i tok olsem bilong sambai long ol imis. Tasol i no longtaim na ol imis i kamap olsem samting bilong lotu long en. Na ol imis i bin kamap wanpela bikpela samting bilong mekim wok long en long lotu bilong Misin Isten Otodoks.” Tasol profet Aisaia i mekim wanpela askim i stret tru long mekim: “God i olsem husat tru? Na i gat wanpela samting i stap i luk olsem God, a?”—Aisaia 40:18.
Skelim ol dispela ves bilong Baibel: Aisaia 44:13-19; Aposel 10:25, 26; 17:29; 2 Korin 5:7
TOK TRU:
God i no orait long pasin bilong yusim ol imis na piksa
SAKIM OL STORI NATING, HOLIMPAS TOK I TRU
Orait yumi ken kisim wanem tingting long dispela sotpela tok yumi bin mekim long ol stori nating em planti misin i wok yet long skulim ol man long en? Ol tok i tru bilong Baibel i klia na i mekim gut bel bilong man, na dispela i winim tru ol dispela “stori nating [tok Grik, my ʹthos] i bin kamap long tingting bilong ol man.”—2 Pita 1:16.
Olsem na long stretpela tingting, skelim ol tok bilong Baibel—em as bilong tok i tru—wantaim ol tok ol i bin skulim yu long en. (Jon 17:17) Sapos yu mekim olsem, dispela tok promis bai kamap tru long yu, olsem: “Yupela bai i save long tok tru, na tok tru bai i mekim yupela i kamap fri.”—Jon 8:32.
[Piksa Kredit Lain long pes 9]
Pictorial Archive (Near Eastern History) Est.