Rot Bilong Famili i Ken Stap Amamas

Taim Poroman Marit i Gat Sik

Kirap long taim ol dokta i tok mi gat wanpela bikpela sik (chronic fatigue syndrome), man bilong mi tasol i mekim wok mani. Tasol em i no save tokim mi long hamas mani mipela i save tromoi long ol samting. Bilong wanem em i no laik tokim mi long dispela samting? Ating mipela i sot tru long mani, na em i save olsem mi bai tingting planti sapos mi save long dispela.​​—Nancy.a

MARIT i gat hatwok bilong en, tasol taim wanpela poroman marit i gat bikpela sik, na narapela poroman i no gat sik, dispela inap kamapim sampela moa hatwok.b Olsem wanem? Yu wok long lukautim poroman marit bilong yu i gat sik? Sapos olsem, ating yu gat ol dispela askim. Olsem: ‘Sapos sik bilong poroman bilong mi i go bikpela tru, olsem wanem mi inap karim dispela hevi? Inap hamas mun o yia samting mi inap lukautim yet poroman bilong mi na mekim ol wok olsem kukim kaikai, klinim haus, na mekim wok mani? Bilong wanem mi pilim nogut olsem mi stap orait na sik i no painim mi?’

Tasol sapos yu dispela poroman i gat sik, ating yu bai tingting olsem: ‘Olsem wanem mi inap rispektim mi yet taim mi no inap mekim ol wok bilong mi? Olsem wanem? Poroman bilong mi i les long mi, long wanem, mi sik? Amamas bilong mitupela i pinis nau?’

Sori tru, hevi bilong sik i mekim na sampela marit i bruk. Tasol dispela i no makim olsem marit bilong yutupela bai i bagarap, nogat.

Marit bilong planti i stap strong na i kamap gutpela moa, maski wanpela i gat bikpela sik. Tingim Yoshiaki na Kazuko. Yoshiaki i bin kisim bagarap long baksait bun bilong em na dispela i mekim na em i no inap mekim wanpela samting long strong bilong em yet. Kazuko i tok: “Man bilong mi i nidim helpim long olgeta samting. Olsem na nek, sol, na tupela han bilong mi i save pen, na mi save go long haus sik bilong kisim marasin. Planti taim mi save pilim olsem wok bilong lukautim sikman em bikpela wok tumas.” Tasol maski hevi i stap, Kazuko i tok: “Pasin bilong mitupela long pas gut wantaim i kamap strong moa.”

Orait, wanem samting i stap olsem rot bilong stap amamas maski i gat hevi bilong sik? Wanpela rot i olsem: Ol marit husat i belgut na amamas long marit bilong ol, ol i tingim dispela sik i no hevi bilong sikman tasol, em hevi bilong tupela wantaim. Tru tumas, sapos wanpela poroman i sik, tupela wantaim i save karim hevi bilong dispela samting, ating ol i kisim hevi long narapela narapela rot. Stat 2:​24 i stori long dispela pasin i stap namel long man marit na meri marit, olsem: “Man i save lusim papamama na i pas wantaim meri bilong en, na tupela i kamap wanpela bodi tasol.” Olsem na taim wanpela poroman i gat sik inap longpela taim, em i bikpela samting long tupela poroman i mas wok wantaim bilong karim dispela hevi.

Na tu, wanpela wok painimaut i kamapim olsem ol marit husat i save pas gut wantaim maski hevi bilong sik i stap, ol i gat stretpela tingting long dispela sik na ol i lain long sampela gutpela rot bilong karim dispela hevi. Planti gutpela samting ol i bin lainim na i helpim ol long karim dispela hevi, i wankain long ol gutpela tok i stap long Baibel. Skelim dispela 3-pela tok i stap daunbilo.

Tingim Gut Narapela Narapela

Saveman 4:9 i tok: “I no gutpela long man i stap wanpis. Sapos tupela man i stap wantaim, em i gutpela.” Bilong wanem? Olsem ves 10 i tok, “sapos wanpela i pundaun, orait narapela i ken litimapim em gen.” Olsem wanem? Yu save ‘litimapim poroman bilong yu’ long rot bilong mekim ol gutpela tok amamas long em?

Olsem wanem? Yu inap painim sampela rot we inap helpim yutupela wantaim? Yong​—hap bodi bilong meri bilong em i paralais​—i tok: “Long olgeta samting, mi traim long tingim gut meri bilong mi. Taim mi nek drai, mi tingim olsem ating em tu i nek drai. Sapos mi laik go ausait na lukim plaua gaden samting, mi save askim em sapos em i laik joinim mi. Mitupela wantaim i pilim pen na karim dispela hevi.”

Tasol sapos yu wok long kisim helpim long poroman marit bilong yu, yu ting i gat sampela samting yu inap mekim bilong helpim yu yet na dispela i no bagarapim helt bilong yu? Sapos olsem, dispela inap helpim yu long pilim olsem yu no yusles olgeta, na yu inap helpim poroman bilong yu long lukautim yu.

Nogut yu ting olsem yu save pinis long gutpela rot bilong soim poroman bilong yu olsem yu tingim em. Mobeta yu askim em long wanem samting em bai amamas long en. Nancy, em yumi bin stori pinis long em, em i tokim man bilong em long em i pilim olsem wanem taim em i no save long sindaun bilong famili long sait bilong mani. Nau man bilong em i save stori long em long ol dispela samting.

TRAIM MEKIM OLSEM: Wokim lista long ol samting yu pilim olsem poroman bilong yu i ken mekim na bai i isi moa long yu long karim dispela hevi, na kirapim poroman bilong yu tu long mekim olsem. Orait givim lista bilong yu long poroman na kisim lista bilong em. Yutupela wan wan i ken makim wanpela o tupela samting long lista em yutupela i ting yupela inap long mekim.

Wokim Gutpela Sediul

Saveman King Solomon i tok: “Olgeta samting . . . i save kamap long taim bilong em yet.” (Saveman 3:1) Tasol ating i hatwok long bihainim wanpela gutpela sediul, long wanem, taim wanpela i gat bikpela sik, dispela inap bagarapim ol wok bilong famili. Yu inap mekim wanem bilong bihainim yet wanpela gutpela sediul?

Ating yupela i ken mekim sampela samting wantaim we i helpim yupela long lusim tingting long sik. Olsem wanem? Yutupela inap kisim amamas long sampela samting yupela i bin mekim paslain long sik i kamap? Sapos nogat, orait yutupela inap traim long mekim wanem ol nupela samting bilong kisim amamas? Ating yutupela i ken rit wantaim o lainim wanpela nupela tok ples. Sapos yutupela i mekim ol samting wantaim we sik i no pasim yutupela long mekim, dispela bai strongim pasin bilong yutupela long stap olsem “wanpela bodi” na amamas bilong yutupela bai i go bikpela moa.

Narapela rot bilong helpim yupela long holim stretpela tingting, em pasin bilong stap wantaim ol narapela. Sindaun 18:1 i tok olsem: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.” Olsem wanem? Yu luksave olsem dispela ves i tok pasin bilong i stap wanpis inap nogutim tingting? Tasol pasin bilong stap wantaim ol narapela long sampela taim, dispela inap amamasim yu na helpim tingting bilong yu. I gutpela sapos yu go pas long singautim wanpela long kam lukim yu.

Poroman marit husat i lukautim poroman i sik, sampela taim i hatwok long em i tingim skel bilong strong bilong em. Sampela i save mekim planti wok tumas, na isi isi strong bilong ol i pinis, na ol i bagarapim helt bilong ol yet. Na bihain, ating ol i no inap moa long lukautim gutpela poroman marit bilong ol. Olsem na sapos yu wok long lukautim poroman marit i gat bikpela sik, yu no ken lusim tinging long yu yet. Makim sampela haptaim bilong malolo liklik bilong kisim nupela strong.c Sampela i painimaut olsem i gutpela long toktok wantaim wanpela pren em ol inap bilip long en na autim ol wari bilong ol​—olsem man marit i toktok wantaim narapela man na meri marit i toktok wantaim narapela meri.

TRAIM MEKIM OLSEM: Long pepa, wokim lista bilong ol samting i givim hatwok long yu taim yu mekim wok bilong lukautim poroman bilong yu. Orait wokim lista long wanem ol rot yu ken bihainim bilong daunim dispela hatwok o karim dispela hevi. Na no ken skelim tumas dispela lista, askim yu yet, ‘Wanem wanpela rot we i isi moa long bihainim na i mekim i stap bilong yupela i kamap gutpela liklik?’

Holim Gutpela Tingting

Baibel i tok lukaut: “Yu no ken tok, ‘Olsem wanem na taim bipo i winim dispela taim nau?’ ” (Saveman 7:​10) Olsem na no ken tingting tumas long i stap bilong yutupela bai olsem wanem sapos poroman marit i no gat sik. Tingim olsem nau long dispela taim, yumi no inap i stap amamas tru long olgeta taim. Kisim stretpela tingting long hevi bilong yu na lain long karim dispela hevi.

Wanem samting inap helpim yu na poroman bilong yu long dispela samting? Stori long ol blesing yutupela i kisim. Sapos sampela gutpela liklik senis i kamap long helt bilong yu, orait amamas long en. Tingim ol samting yutupela bai amamas long wetim i kamap, na putim ol mak yutupela wantaim inap winim.

Tupela marit, Shoji na Akiko i bin bihainim ol dispela gutpela tok i stap antap, na gutpela samting i kamap. Bihain long Akiko i kisim wanpela bikpela sik (fibromyalgia), tupela i mas lusim wok Kristen fultaim bilong ol. Yu ting ol i bin bel hevi? Yes, ol i bel hevi, tasol Shoji i mekim gutpela tok long ol lain em wankain hevi i painim ol, olsem: “Yu no ken tingting long ol samting yu no inap mekim moa, nogut yu mekim yu yet i bel hevi. Tingting long ol gutpela samting. Maski sapos yutupela i tingting olsem bihain bai yutupela inap mekim gen ol samting yutupela i bin mekim long bipo, tingting long ol samting i kamap nau long laip bilong yutupela. Long mi, dispela i makim olsem mi mas tingting long meri bilong mi na helpim em.” Kain gutpela tok olsem inap helpim yu tu sapos poroman marit bilong yu i gat sik.

[Ol Futnot]

ASKIM YU YET . . .

Long nau, mi wantaim poroman bilong mi i mas mekim wanem?

▪ Stori planti long dispela sik

▪ Stori liklik tasol long dispela sik

▪ No ken wari tumas

▪ Tingim moa yet narapela narapela

▪ Amamas long mekim sampela samting wantaim we sik i no pasim yutupela long mekim

▪ Bung moa wantaim ol narapela

▪ Putim sampela mak yutupela wantaim i laik winim

[Piksa long pes 12]

Bilong holim stretpela tingting, yu ting yutupela i ken mekim samting we yutupela i ken kisim amamas long en?