Tingting Bilong Ol Man Bilong Nau Long “Ol Santuman”

“Tingim taim yumi save les tru long harim stori bilong ol man i gat nem long mekim ol bikpela wok. Tasol dispela kain tingting i no pasim 4.2 milion man bilong Amerika em ol i lukim bung bilong planim Mama Teresa long Sep. 13. Bihain long taim em i dai long Sep. 5, planti man i wok long tokim Vatiken long makim Mama Teresa olsem wanpela santu. Planti ol i ting dispela samting bai kamap.”—Sun-Sentinel, United States, Oktoba 3, 1997.

WOK bilong wanpela misineri Katolik, em Mama Teresa, long helpim ol man na givim ol samting long ol, dispela i mekim na planti man i tingim em olsem wanpela santu tru tru. Ol man i gat nem long mekim ol bikpela wok ol i stap long ol arapela lotu tu. Tasol ating ol dispela lotu i no bin makim wanpela long kamap santuman olsem Misin Katolik i save mekim.

Taim Pop Jon Paul Namba 2 i stap pop, em i makim olsem 450 manmeri long kamap santu, na dispela i winim namba bilong ol manmeri em olgeta narapela pop i bin makim long dispela 100 yia go pinis.a Bilong wanem ol manmeri i givim bel long ol “santu” tasol planti bilong ol em ol Katolik yet i no save long ol?

Wanpela tisa bilong lotu long Yunivesiti Notre Dame, em Lawrence Cunningham, i tok: “Ol manmeri i gat laik long save long dispela tingting olsem i gat sampela man long graun ol i holi. Sapos ol santu i stap, dispela i soim olsem ating i gat sampela man ol i bin mekim ol gutpela wok i narapela kain tru, na long nau tu i gat sampela man olsem.” Na tu, ol i tok “ol santu” i gat wanpela kain rot bilong bringim tok i go long God, olsem na ol i stap olsem namelman bilong bringim tok bilong ol man i stap laip i go long God. Taim ol i painim hap bun samting bilong wanpela “santuman,” ol i save adorim, long wanem, ol i bilip olsem em i gat strong bilong helpim ol man.

Wanpela liklik buk lotu bilong Kibung Bilong Trent, ol i wokim paslain liklik long yia 1600 bilong strongim ol lo bilong Misin Katolik, em i tok: “Bilong givim biknem long ol santu ‘em ol i bilip long Bikpela na ol i slip i stap,’ na singaut long ol na bai ol i askim God long helpim yumi, na adorim ol bun samting bilong ol santuman, dispela pasin i givim biknem moa long God, na dispela bai strongim ol Kristen, na Kristen yet i ken bihainim pasin bilong ol dispela santuman.” (The Catechism of the Council of Trent, 1905) Ol Kristen tru i laik bihainim gutpela pasin long sindaun bilong ol, na ol i laik i go klostu long God long stretpela rot, na kisim helpim long em. (Jems 4:​7, 8) Olsem na Baibel i tok husat inap tru long i stap santuman? Na ol i save mekim wanem kain wok?

[Futnot]