Stretpela Save Long God i Mekim Gut Bel

SAMPELA man i tingim tok bilong Baibel long pasin sori na marimari bilong God, na ol i gat sampela askim ol i tingting planti long en. Ol i askim olsem: Sapos God i laik pinisim ol pasin nogut, na em i save long mekim, na em i gat strong long mekim, bilong wanem planti pasin nogut i stap yet? Ol i tingim 3-pela samting i olsem i no stret wantaim, olsem: (1) God i gat olgeta strong; (2) God i gat pasin sori na gutpela pasin; na (3) ol samting nogut tru i wok long kamap yet. Namba 3 samting i wok long kamap tru tru long nau, olsem na ol i ting namba wan o namba 2 samting i no tru. Long tingting bilong ol, God i no inap pinisim ol samting nogut o em i no save tingim tumas ol man.

Taim Wol Tred Senta long New York i bagarap, sampela de bihain wanpela bikman bilong lotu long Amerika i tok: “Ol i bin askim mi planti handet taim, bilong wanem God i larim ol samting nogut tru na ol pen na hevi i stap. Mi mas tokaut stret olsem mi no save tru long bekim bilong dispela askim.”

Wanpela profesa bilong lotu i tok, em i pilim tru “dispela gutpela tok” em dispela bikman bilong lotu i autim. Na tu, em i wanbel long tingting bilong dispela saveman, em i tok: “Yumi no inap save long as bilong ol pen na hevi, na olsem tasol yumi no inap save long God.” Tasol yu ting yumi no inap save long as na God i larim ol samting nogut i stap?

Ol Samting Nogut i Kamap Olsem Wanem?

Tasol maski ol bikman bilong lotu i tok wanem, Baibel i no tok yumi no inap save long as na God i larim ol samting nogut i stap. Wanpela bikpela samting bilong helpim yumi long save long as na ol samting nogut i stap em olsem: Yumi mas save olsem Jehova i no bin wokim ol pasin nogut bilong dispela graun. Em i wokim namba wan man na meri i gutpela olgeta, ol i no gat sin. Jehova i lukim ol samting em i bin wokim na em i tok olsem em “i gutpela.” (Stat 1:​26, 31) Em i laik Adam na Iv i skruim Paradais bilong Iden i go long olgeta hap bilong graun na ol manmeri bai sindaun long en na i stap amamas aninit long gutpela wok king bilong em.​​—⁠Aisaia 45:⁠18.

Pasin nogut i bin kamap long rot bilong wanpela spirit, pastaim em i bin stap gut long God, tasol em i kisim laik long ol man i mas lotuim em. (Jems 1:​14, 15) Pasin bikhet bilong em i kamap ples klia long graun taim em i pulim namba wan man na meri long bihainim em long bikhet long God. Adam na Iv i no daun long tok bilong God olsem ol i no ken kaikai long diwai bilong givim gutpela save long wanem samting i gutpela na wanem samting i nogut, nogat; ol i kaikai long dispela diwai. (Stat 3:​1-6) Taim ol i mekim olsem, ol i sakim tok bilong God na ol i kamapim olsem ol i no laik bai God i bosim ol.

Bikpela Tok i Kamap

Pasin bikhet long Iden i kamapim wanpela bikpela tok, em bikpela samting bilong olgeta lain long heven na graun. Ol dispela bikhetman i tok Jehova i no bosim gut ol man. Olsem wanem? I stret God i tokim ol man olsem ol i mas bihainim olgeta tok bilong em? Ol man bai stap gutpela sapos ol i bosim wokabaut bilong ol yet?

Jehova i stretim dispela bikpela tok long wok bos bilong em long wanpela rot i kamapim ples klia olsem em i mekim dispela wok bos long pasin sori, stretpela pasin, gutpela tingting na save, na bikpela strong bilong em. Em inap mekim wok long bikpela strong bilong em bilong bagarapim ol bikhetman. I olsem i stret em i mekim olsem, long wanem, em i bos bilong ol. Tasol sapos em i mekim olsem, dispela bai i no inap bekim ol bikpela tok i bin kamap. O God inap lusim tingting long dispela rong. Ating sampela long nau bai ting dispela em i pasin sori. Tasol dispela tu i no bekim ol bikpela tok Satan i kamapim, olsem ol manmeri bai stap gut sapos ol i bosim ol yet. Na tu, dispela pasin inap kirapim sampela moa long lusim rot Jehova i makim, a? Samting bai kamap long en, em pen na hevi bilong i stap oltaim oltaim.

Long gutpela tingting na save bilong em, inap planti tausen yia Jehova i larim ol manmeri i bihainim rot ol yet i makim. Tru, dispela i mekim na em i mas larim ol pasin nogut i stap inap liklik taim, tasol dispela i givim rot long ol manmeri long kamapim olsem ol inap bosim gut wokabaut bilong ol yet na bihainim ol lo bilong ol yet long samting i stret na i no stret, o nogat. Wanem samting i kamap long dispela? Long bipo yet na i kam inap long nau i gat ol pait, pasin i no stret, pasin bilong daunim ol man, na pen na hevi. Pasin bilong bikhet long Jehova i no kamapim gutpela samting na bihain Jehova bai stretim dispela tok i bin kamap long Iden inap oltaim oltaim.

God i kamapim pinis pasin sori bilong em taim em i givim Pikinini bilong em, Jisas Krais, em i bin lusim laip bilong em olsem man na givim olsem ofa bilong baim bek ol man. Dispela i helpim ol manmeri i bihainim tok long kamap fri long sin na indai, em i bin kamap long pasin bikhet bilong Adam. Ofa bilong Jisas i opim rot long olgeta manmeri i bilip long em ol i ken kisim laip oltaim.​​—⁠Jon 3:​16.

Jehova i mekim gut bel bilong yumi na em i tokaut olsem, pen na hevi bai stap inap sotpela taim tasol. Man bilong raitim song i tok: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”​​—⁠Song 37:​10, 11.

Bihain Bai Ol i Stap Bel Isi na Amamas

Truim bilong ol tok profet bilong Baibel i kamapim olsem klostu nau God bai pinisim ol sik, hevi, na indai. Tingim gutpela samting aposel Jon i bin lukim long wanpela driman long ol samting bai kamap bihain. Em i tok: “Mi lukim nupela skai na nupela graun i stap. Namba wan skai na namba wan graun i go pinis olgeta. Na solwara i no i stap moa. . . . God yet bai i stap wantaim ol [manmeri], na em bai i stap God bilong ol. Em bai i mekim drai wara i stap long ai . . . bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Long wanpela tok i kamapim ples klia olsem dispela tok promis i tru, man i sindaun long sia king i tokim Jon: “Yu raitim dispela tok. Dispela tok em i tru olgeta, inap olgeta man i ken bilip tru long en.”​​—⁠KTH 21:​1-5.

Olsem wanem long ol planti bilion manmeri i no gat asua na ol i bin i dai bihain long taim pasin bikhet i kamap long Iden? Jehova i tok promis olsem em bai kirapim bek ol manmeri i dai pinis. Aposel Pol i tok: “Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Ol dispela manmeri inap i stap long wanpela graun em “stretpela pasin tasol bai i stap long en.”​​—⁠2 Pita 3:​13.

Gutpela papa i save larim dokta i katim pikinini na pikinini i kisim pen, long wanem, papa i save olsem dispela bai helpim pikinini, na olsem tasol Jehova i larim ol pasin nogut i stap inap liklik taim. Tasol olgeta man i bihainim laik bilong God bai kisim ol gutpela samting inap oltaim oltaim. Aposel Pol i tok: “Nau olgeta samting i stap nogut na i save bagarap. Dispela i no kamap long laik bilong ol yet. Nogat. God yet i mekim ol i stap olsem, bai ol i wetim gutpela samting God i laik mekim long ol. Long taim God i makim, God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God.”​​—⁠Rom 8:​20, 21.

Man! Dispela em i gutpela nius tru​—⁠i no olsem ol nius yumi lukim long televisen o ritim long ol nius. Em gutpela nius tru bilong “God bilong mekim isi bel bilong olgeta man,” em i save tingim tru yumi.​​—⁠2 Korin 1:⁠3.

[Ol Piksa long pes 6]

Ol samting i kamap insait long planti tausen yia i kamapim klia olsem ol man i no inap bosim gut wokabaut bilong ol yet

[Ol Kredit Lain]

Somalian family: UN PHOTO 159849/M. GRANT; atom bomb: USAF photo; concentration camp: U.S. National Archives photo