Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w02 10/1 p. 23-27
  • Mi Insait Long Bikpela Wok Bihain Long Pait

No gat vidio bilong dispela seksen.

Sori, popaia kamap long lodim vidio.

  • Mi Insait Long Bikpela Wok Bihain Long Pait
  • Wastaua i Tokaut Long Kingdom Bilong Jehova—2002
  • Ol Liklik Het Tok
  • Wankain Infomesen
  • Mi Kisim Tok i Tru Bilong Baibel
  • Famili Bilong Mipela i Kamap Wanbel
  • Skul Gileat na Bihain Long en
  • Mekim Wok Long Save Mi Kisim
  • Ol Nupela Amamas Long Swiselan
  • Sampela Senis Long Sindaun Bilong Mipela
  • Ol Amamas Mipela i Kisim Insait Long Famili
  • Sampela Senis Moa
  • Jehova i Skulim Mi Kirap Long Taim Mi Liklik Yet
    Wastaua i Tokaut Long Kingdom Bilong Jehova—2003
  • Inap 70 Yia Mi Holim Wanpela Juda
    Wastaua i Tokaut Long Kingdom Bilong Jehova—2012
  • Namba Wan Brens-Ofis i Bin Kamap Wan Handet Yia i Go Pinis
    Kirap!—2001
  • I Stap Bilong Mi Long Wok Bilong Jehova
    Wastaua i Tokaut Long Kingdom Bilong Jehova—2001
Lukim Moa
Wastaua i Tokaut Long Kingdom Bilong Jehova—2002
w02 10/1 p. 23-27

Stori Bilong Wanpela Man

Mi Insait Long Bikpela Wok Bihain Long Pait

STORI BILONG FILIP S. HOFFMANN

Namba Tu Pait i pinis long Me 1945. Long Disemba, Nathan H. Knorr, em wasman bilong wok autim tok bilong ol Witnes Bilong Jehova long olgeta hap bilong graun, em i kam long Denmak wantaim kuskus bilong em i gat 25 krismas, em Milton G. Henschel. Mipela i rentim wanpela bikpela haus bung na wetim tupela i kam. Mipela ol yangpela i amamas long harim tok Brata Henschel i mekim, long wanem, em i gat wankain krismas olsem mipela, na as tok em i makim, em “God i bin wokim yumi olgeta. Olsem na long taim yupela i yangpela yet, yupela i mas tingim em.”​​—⁠Saveman 12:⁠1.

LONG dispela taim tupela i kam, mipela i kisim save long ol nupela samting i kamap bilong helpim wok bilong autim tok long olgeta hap i go bikpela na mipela inap insait long en. (Matyu 24:14) Olsem: Ol i opim wanpela nupela skul long Amerika bilong skulim ol yangpela man na meri long mekim wok misineri. Brata Knorr i tok, sapos ol i singautim mipela i go long dispela skul, ol bai givim mipela “wanpela tiket tasol bilong i go na i no bilong kam bek,” na mipela i no inap save long wanem hap ol bai salim mipela i go bilong mekim wok misineri. Maski i olsem, sampela bilong mipela i putim aplikesen bilong i go long dispela skul.

Mi laik stori long ol samting i painim mi bihain long Namba Tu Pait, tasol pastaim bai mi stori long taim mama i karim mi long yia 1919. I gat sampela samting i kamap long taim bilong pait na paslain long en na dispela i senisim tru i stap bilong mi.

Mi Kisim Tok i Tru Bilong Baibel

Taim mi stap long bel bilong mama​—⁠mi namba wan pikinini bilong em​—⁠mama i beten olsem sapos mi wanpela pikinini man, em i laik bai mi kamap wanpela misineri. Bikbrata bilong mama em i wanpela Sumatin Bilong Baibel, em nem bilong ol Witnes Bilong Jehova long dispela taim, tasol long ai bilong famili bilong mama em i olsem samting nogut. Haus bilong mipela i stap klostu long Copenhagen, olsem na taim ol Sumatin Bilong Baibel i save mekim ol kibung bilong ol long dispela hap long olgeta yia, mama i save singautim brata bilong em, Ankol Thomas, em i stap longwe liklik, long kam i stap wantaim mipela. Long 1930 save bilong em long Baibel na pasin bilong em long kamapim klia ol tok i kirapim mama long senisim tingting bilong em na kamap wanpela Sumatin Bilong Baibel.

Mama i laikim tru Baibel. Em i bihainim tok bilong Lo 6:7 na em i skulim mi na liklik susa bilong mi ‘long taim mipela i stap long haus na long taim mipela i wokabaut long rot, na long taim mipela i malolo na long taim mipela i wok.’ Bihain mi kirap insait long wok bilong autim tok. Mi save amamas long stori wantaim ol man long ol tok olsem, ol man i gat tewel i no inap i dai, na helpaia, em ol misin i skulim ol man long en. Mi inap kamapim klia stret long Baibel olsem ol dispela bilip i no stret.​​—⁠Song 146:​3, 4; Saveman 9:​5, 10; Esekiel 18:⁠4.

Famili Bilong Mipela i Kamap Wanbel

Bihain long kibung long Copenhagen long 1937, ol i sot long ol brata bilong mekim wok inap liklik taim long hap bilong ol buk long brens-ofis bilong Denmak. Mi bin pinisim skul long wanpela koles na mi no gat wanpela samting bilong mekim, olsem na mi tokim ol olsem mi laik mekim sampela wok long hap bilong ol buk. Taim dispela wok bilong mi i pinis, ol i askim mi long mekim sampela wok long brens-ofis. Bihain liklik, maski mi no baptais yet, mi lusim haus na mi go stap long brens long Copenhagen. Long olgeta de mi bung wantaim ol strongpela Kristen na dispela i helpim mi long kamap strong long ol samting bilong spirit. Long yia bihain, long Janueri 1, 1938, mi kisim baptais long wara bilong kamapim klia dediket bilong mi long God Jehova.

Long Septemba 1939, Namba Tu Pait i kirap. Orait long Epril 9, 1940, ol ami bilong Jemani i kisim Denmak. Ol i no bin pasim tumas ol man bilong Denmak long mekim ol samting, olsem na mipela inap long mekim yet wok bilong mipela long autim tok.

Orait nau wanpela gutpela samting i kamap. Papa i kamap wanpela Witnes na dispela i mekim na mipela famili olgeta i amamas. Olsem na taim ol i singautim mi na fopela brata bilong Denmak long i go long namba 8 klas bilong Skul Gileat, olgeta long famili bilong mi i strongim mi long i go. Skul i stap inap long faipela mun na em i kirap long Septemba 1946. Em i kamap long wanpela naispela hap long South Lansing, New York.

Skul Gileat na Bihain Long en

Skul Gileat i opim rot long mi long kisim ol gutpela nupela pren. Wanpela apinun, mi wantaim Harold King bilong Inglan mipela i wokabaut raun long hap bilong skul na mitupela i wok long toktok long wanem hap ol bai salim mipela taim skul i pinis. Harold i tok, “Mi no ting olsem em i laspela taim bilong mi long lukim ol waitpela maunten long nambis bilong Dover.” Em i tok stret, tasol em i mas wet inap long 17 yia bilong lukim gen ol dispela maunten, na 4 na hap yia bilong ol dispela 17 yia em i bin stap wanpis long wanpela rum long haus kalabus long Saina!a

Taim mipela i gretiuet pinis long skul, ol i salim mi i go long Texas, Amerika, bilong mekim wok olsem wasman raun, olsem go lukim ol kongrigesen bilong ol Witnes Bilong Jehova na helpim ol long ol samting bilong spirit. Ol brata sista i amamas tru long mi kam. Ol brata long Texas i amamas long wanpela yangpela man bilong Yurop i pinis nau tasol long Skul Gileat i stap wantaim ol. Tasol mi stap 7-pela mun tasol long Texas na ol i singautim mi i go long hetkota bilong ol Witnes Bilong Jehova long Brooklyn, New York. Long dispela hap, Brata Knorr i makim mi long mekim wok long ofis, na em i tokim mi long lain long olsem wanem ol i save mekim wok long olgeta dipatmen. Orait taim mi go bek long Denmak, mi mas mekim wok long ol samting mi lainim pinis, na bai olgeta samting mipela i mekim long brens long Denmak i ken kamap wankain olsem long Brooklyn. Dispela tingting ol i kamapim em i bilong helpim wok long olgeta brens i kamap wankain na kamap gutpela. Bihain Brata Knorr i salim mi i go long Jemani.

Mekim Wok Long Save Mi Kisim

Taim mi kamap long Wiesbaden, Jemani, long Julai 1949, planti ol biktaun bilong Jemani i bagarap yet i stap. Ol brata i go pas long wok bilong autim tok long dispela hap, em ol brata ol man i bin mekim nogut long ol long taim Hitler i kirap bosim Jemani long yia 1933. Sampela i bin i stap inap 8-pela i go 10⁠-⁠pela yia samting long kalabus na long ol banis kalabus nogut tru! Mi bin wok wantaim ol dispela wokman bilong Jehova inap 3 na hap yia. Dispela gutpela pasin bilong ol i kirapim mi long tingim tok bilong savemeri Gabriele Yonan bilong Jemani, em i tok: “Sapos ol dispela Kristen i no bin sanap strong aninit long gavman dikteta, ating bihain long Auschwitz na ol Natsi bai yumi no bilip olsem yumi inap long bihainim ol tok Kristen bilong Jisas.”

Wok bilong mi long brens i wankain olsem wok mi bin mekim long brens long Denmak, olsem bilong soim wanpela nupela pasin bilong mekim ol wok bilong oganaisesen na mekim long wankain pasin. Taim ol brata bilong Jemani i kisim save olsem ol senis i kamap i no bilong daunim wok bilong ol​—⁠as bilong ol dispela senis, em taim i kamap pinis bilong ol brens-ofis na hetkota long wok gut wantaim​—⁠ol i amamas na ol i givim bel long wok gut wantaim.

Long 1952 wanpela pas i kam long ofis bilong Brata Knorr i tokim mi long i go long brens long Bern, Swiselan. Ol i makim mi long kamap wasman bilong brens long dispela hap, kirap long Janueri 1, 1953.

Ol Nupela Amamas Long Swiselan

Bihain liklik long taim mi kamap long Swiselan, mi bungim Esther long taim bilong kibung, na bihain liklik mipela pasim tok long marit. Long Ogas 1954, Brata Knorr i tokim mi long go long Brooklyn, na ol i soim mi long wanpela nupela wok. Ol brens-ofis i wok long i go bikpela long olgeta hap, na namba bilong ol tu i go bikpela, olsem na ol i kamapim wanpela nupela pasin bilong mekim ol wok. Ol i brukim olgeta kantri i go long fopela hap, olsem son, na wan wan hap ol i makim ol wasman son long lukautim. Ol i makim mi long lukautim 2-pela hap: Em hap bilong Yurop na Mediterenian.

Mi stap liklik hap taim tasol long Brooklyn, na bihain mi go bek long Swiselan na redim ol samting bilong mekim wok olsem wasman son. Mitupela Esther i marit na em i kam wok wantaim mi long brens-ofis long Swiselan. Long namba wan raun bilong mi, mi go long ol haus misineri na ol haus Betel long Itali, Grik, Saiprus, ol kantri long Midel-Is na bihainim nambis long hap bilong Not Afrika, na Spen na Potugal​​—⁠inap 13 kantri olgeta. Mi go bek na stap liklik long Bern, na bihain mi kirap raun i go long ol narapela kantri bilong Yurop i stap long hap wes bilong ol kantri em Soviet Yunion i bosim. Insait long namba wan yia bilong mi long marit, mi lusim haus brens na mi raun inap 6-pela mun long mekim wok bilong helpim ol brata Kristen.

Sampela Senis Long Sindaun Bilong Mipela

Long 1957, Esther i painimaut olsem em i gat bel, na brens-ofis em i no ples ol papamama na pikinini i ken i stap long en, olsem na mipela i go bek long Denmak na papa i amamas long mipela i ken i stap wantaim em. Esther i lukautim pikinini meri bilong mitupela, Rakel, na papa bilong mi taim mi helpim wok bilong nupela brens-ofis. Mi mekim wok olsem tisa bilong Skul Bilong Wok Kingdom, em skul bilong ol elda, na tu mi mekim yet wok bilong mi olsem wasman son.

Wok bilong wasman son i olsem mi mas i go long ol longwe hap, na dispela i mekim na mi no inap stap tumas wantaim pikinini meri bilong mipela. Dispela i bin kamapim sampela hevi. Wanpela taim mi stap liklik long Paris na mipela i wokim wanpela masin bilong prinim ol buk. Esther na Rakel tupela i kam long tren bilong lukim mi na tupela i kamap long Gare du Nord. Mi wantaim Léopold Jontès, em wanpela brata long brens-ofis, i go long dispela hap bilong bungim tupela. Rakel i sanap i stap long wanpela step bilong tren na i lukluk long Léopold na bihain em i lukluk i kam long mi na em i lukluk i go bek gen long Léopold na bihain em i holimpasim Léopold!

Narapela bikpela senis i kamap taim mi gat 45 krismas. Mi lusim wok fultaim sevis na mi mekim wok skin fultaim bilong lukautim famili bilong mi. Ekspiriens bilong mi olsem wanpela wokman bilong ol Witnes Bilong Jehova i mekim na mi inap long kisim wok olsem wanpela maneja. Mi mekim wok long dispela kampani inap olsem 9-pela yia na Rakel i pinis long skul, olsem na mipela i tingting long i go long ol hap em ol i sot long ol man bilong autim tok.

Mipela i skelim olsem rot i op bilong i go long Nowe, olsem na mi go long wanpela kampani i save givim wok long ol man na mi askim ol long wanpela wok. Bekim ol i givim long mi i no gutpela. I no gat wok bilong wanpela man i gat 55 krismas. Tasol maski i no gat wok, mi toktok wantaim brens-ofis long Oslo na bihain mipela rentim wanpela haus klostu long taun bilong Drøbak, na mi bilip olsem rot bai i op long mi ken painim wanpela wok. Tru tumas, mi painim wanpela wok na dispela i mekim na mipela i amamas long mekim wok bilong Kingdom long Nowe.

Ol gutpela taim tru em taim olgeta long kongrigesen i go autim tok long hap bilong not em ol teritori kongrigesen i no makim bilong autim tok long en. Mipela i save rentim ol haus long hap ol i makim bilong kem long en, na long olgeta de mipela i save go long ol fam i stap long ol naispela maunten na autim tok long ol man. Mipela i save amamas tru long autim tok bilong Kingdom bilong God long ol dispela gutpela manmeri. Mipela i tilim planti buk na ol magasin, tasol mipela i mas wet inap long yia bihain bilong i go bek na lukim ol. Tasol maski mipela i mekim olsem, ol dispela manmeri i no lusim tingting long mipela! Esther na Rakel i tingim yet wanpela taim mipela i go bek na ol i holimpasim mipela olsem mipela i famili bilong ol em ol i no bin lukim inap longpela taim. Mipela i stap tripela yia long Nowe, na bihain mipela i go bek long Denmak.

Ol Amamas Mipela i Kisim Insait Long Famili

Bihain liklik Rakel i pasim tok wantaim Niels Højer, em wanpela painia, long tupela bai marit. Bihain long ol i marit, Niels na Rakel i mekim yet wok painia i go inap long taim ol i gat ol pikinini. Niels em i wanpela gutpela man marit na gutpela papa i save tingim tru famili bilong em. Wanpela moning em i kisim pikinini man bilong em long baiskol i go long nambis bilong lukim san i kam antap. Wanpela man i save sindaun klostu long ol i askim dispela pikinini man long wanem samting em na papa bilong em i bin mekim long nambis. Em i tok: “Mipela beten long Jehova.”

Sampela yia bihain, mitupela Esther i lukim tupela tumbuna pikinini bilong mitupela i bin kamap paslain, em Benjamin na Nadja, i kisim baptais. Namel long ol lain i sanap lukim tupela i kisim baptais em Niels, na wantu em i kam sanap long pes bilong mi. Na em i lukluk long mi na em i tok, “Ol man tru tru i no save krai.” Tasol i no longtaim na mitupela wantaim i holimpas na krai. Mi amamas mi gat wanpela tambu em mitupela i ken lap na krai wantaim!

Sampela Senis Moa

Mitupela Esther i kisim narapela blesing taim ol i singautim mitupela long i go bek gen na mekim wok long brens-ofis bilong Denmak. Long dispela taim ol i redim ol samting bilong wokim wanpela bikpela brens-ofis long Holbæk. Mi na sampela moa i lukautim wok bilong sanapim haus. Olgeta wok em ol volantia i mekim na ol i no kisim pe long ol wok ol i mekim. Maski em taim bilong bikpela kol nogut tru, long pinis bilong yia 1982, dispela wok bilong sanapim brens-ofis i pinis, na mipela amamas long i go sindaun long dispela gutpela bikpela haus!

I no longtaim na mi wok gen long ofis, em wok mi amamas long mekim, na Esther i mekim wok bilong lukautim telefon. Tasol bihain ol dokta i katim Esther bilong stretim bun antap long lek bilong em, na wanpela yia bihain em i kisim sik long lewa bilong em na dokta i katim em. Maski ol brata long brens i mekim gutpela pasin long mipela, mipela i ting em i gutpela long mipela i mas lusim brens-ofis. Mipela i go i stap long kongrigesen em pikinini meri bilong mitupela wantaim famili bilong em i stap long en.

Long nau sik i stap yet long skin bilong Esther. Tasol mi ken tok tru olsem, long olgeta dispela yia mitupela i bin wok wantaim na i gat planti senis long sindaun bilong mitupela, em i save helpim mi na em i gutpela poroman bilong mi. Maski skin bilong mitupela i no gat strong moa, mitupela i save mekim yet wok autim tok. Taim mi tingting i go bek long i stap bilong mi, mi tingim dispela gutpela tok bilong man bilong raitim song, em i tok: “God, yu bin skulim mi long taim mi liklik yet na i kam inap long nau.”​—⁠Song 71:⁠17.

[Futnot]

a Lukim Wastaua (tok Inglis), Julai 15, 1963, pes 437-​442.

[Piksa long pes 24]

Em ol nupela buk samting ol i salim i kam long brens-ofis long Jemani taim ol i wok long sanapim long 1949

[Piksa long pes 25]

Ol brata mi wok wantaim ol, sampela em ol dispela Witnes i bin lusim ol kalabus nogut tru

[Ol Piksa long pes 26]

Mi na Esther long nau na long de mitupela i marit long Bern Betel, Oktoba 1955

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim