Strongim Yupela Yet
BAIBEL i kolim dispela tok “han” inap planti handet taim. Long tok ples Hibru, ol man i mekim tok piksa long han bilong makim planti kain kain samting. Olsem: Klinpela han i makim olsem man i no gat asua. (2 Samuel 22:21; Song 24:3, 4) Opim han i makim pasin bilong givim planti samting long ol narapela. (Lo 15:11; Song 145:16) Sapos man i mekim samting em yet inap kisim bagarap long en, dispela i olsem em i putim laip bilong em long han bilong em. (1 Samuel 19:5) Han i hangamap i stap nating i makim bel hevi. (2 Stori 15:7) Na strongim han i makim olsem man i kisim strong bilong mekim wok.—1 Samuel 23:16.
Long nau, em i bikpela samting moa yet long yumi mas strongim yumi yet, o olsem Baibel long tok Hibru i tok, strongim han bilong yumi. Yumi stap long ‘taim bilong planti hevi nogut tru.’ (2 Timoti 3:1) Taim yumi bel hevi, em pasin bilong yumi ol man long givap, na i olsem yumi no gat strong na han bilong yumi i hangamap nating. Yumi lukim planti yangpela i lusim skul, ol man marit i lusim famili, na ol mama i lusim ol pikinini. Yumi ol Kristen i mas strongim yumi yet bambai yumi inap sanap strong na karim ol hevi i kamap taim yumi mekim wok bilong God. (Matyu 24:13) Taim yumi mekim olsem, yumi mekim Jehova i belgut.—Sindaun 27:11.
Rot Bilong Kisim Strong
Ol Juda long taim bilong Esra ol i mas strongim ol yet bambai ol inap pinisim wok bilong wokim gen tempel bilong Jehova long Jerusalem. Olsem wanem ol i bin strongim ol yet? Baibel i tok: “Ol i amamas inap 7-pela de na bihainim pasin bilong Ol Bikpela De Bilong Bret I No Gat Yis. Amamas bilong ol i bikpela moa, long wanem, Bikpela i mekim king bilong Asiria i belgut long ol na em i helpim ol long wokim gen haus bilong God, Bikpela bilong ol.” (Esra 6:22) Yumi save olsem long rot bilong strong bilong em, Jehova i kirapim “king bilong Asiria” long larim ol manmeri bilong God i go bek, na Em i kirapim bel na tingting bilong ol manmeri na ol i pinisim wok ol i bin kirapim.
Bihain, taim ol i mas wokim gen banis bilong Jerusalem, Nehemia i strongim ol wanlain Juda long mekim dispela wok. Baibel i tok: “Mi tokim ol long ol samting God i bin mekim bilong helpim mi. Na mi tokim ol long olgeta gutpela tok bilong king. Orait ol i bekim tok olsem, ‘Gutpela tumas. Yumi kirap nau na mekim dispela wok.’ Ol i tok pinis na ol i go redim ol samting bilong mekim wok.” Ol i strongim ol yet pinis, na nau Nehemia na ol wanlain Juda ol i wokim gen banis bilong Jerusalem insait long 52 de tasol!—Nehemia 2:18; 6:9, 15.
Olsem tasol, Jehova i save strongim yumi long autim gutnius bilong Kingdom. (Matyu 24:14) Em i mekim olsem long rot bilong ol gutpela samting em i givim yumi bilong mekim laik bilong em. (Hibru 13:21) Em i givim yumi ol gutpela tul tru. Yumi gat Baibel, na ol buk, magasin, buklet, tanget, na ol kaset na video, em ol samting Baibel i as bilong ol tok bilong ol, na ol i bilong yumi long yusim long helpim ol manmeri long olgeta hap. Ol buk na nius bilong yumi i kamap long planti tok ples, winim 380. Na tu, long rot bilong ol miting bilong kongrigesen na ol kibung, Jehova i save skulim yumi long pasin bilong mekim wok long ol dispela gutpela tul bilong mekim tru wok bilong yumi.
Long planti rot Jehova i strongim yumi, tasol em i laik bai yumi yet i mas givim bel long mekim wok. Tingim tok em profet Elisa i mekim long King Jehoas. King Jehoas i kam long Elisa bilong kisim helpim long pait long lain Siria em ol i kam pait long em. Elisa i tokim king long kisim sampela spia na paitim graun. Baibel i tok: “Jehoas i paitim graun tripela taim. Profet Elisa i lukim na em i kros na i tokim king olsem, ‘Yu no laik paitim graun 5-pela o 6-pela taim? Sapos yu bin mekim olsem, orait bai yu inap pinisim tru ol Siria. Tasol nau bai yu winim ol inap tripela taim tasol.’ ” (2 King 13:18, 19) Jehoas i no givim bel long mekim wok, olsem na em i no pinisim tru ol long pait.
Yumi tu i mas givim bel long mekim wok sapos yumi laik mekim gut wok Jehova i givim yumi long mekim. Yumi no ken tingting planti long ol hevi inap painim yumi o long wok yumi kisim i hatwok tru long mekim, nogat. Yumi mas wok strong na givim bel olgeta long mekim. Yumi mas strongim yumi yet na bilip long Jehova bai helpim yumi.—Aisaia 35:3, 4.
Jehova Bai Strongim Yumi
Jehova bai helpim na strongim yumi long mekim laik bilong em. Tru, God i no ken wokim mirakel na mekim olgeta samting yumi laik bai em i mekim. Em i laik bai yumi tu i mas mekim sampela samting bilong helpim yumi yet—ritim Baibel long olgeta de, redim ol samting na go oltaim long ol miting, insait oltaim long wok autim tok, na beten oltaim. Sapos yumi wok strong long mekim ol dispela samting taim i gat rot, Jehova bai strongim yumi long mekim ol samting em i laik yumi mas mekim.—Filipai 4:13.
Tingim samting i painim wanpela Kristen taim meri bilong em na mama bilong em ol i dai insait long wanpela yia tasol. Bel hevi bilong em i stap yet taim tambu meri bilong em i lusim pikinini man bilong em na lusim pasin Kristen. Dispela brata i tok: “Dispela i lainim mi olsem yumi no inap makim wanem ol hevi bai painim yumi, o wanem taim o hamas taim ol i mas kamap.” Olsem wanem em i kisim strong? “Pasin bilong beten na mekim stadi bilong mi yet i bin helpim gut mi. Na ol brata sista spirit i helpim mi na dispela i bin mekim gut tru bel bilong mi. Tasol moa yet, mi save nau olsem em i bikpela samting long kamapim gutpela pasin bilong pas gut wantaim Jehova paslain long ol hevi i kamap.”
Maski wanem wanem samting i painim yu, bilip tru long Jehova, na mekim gutpela wok long olgeta samting em i givim bilong strongim yu. Taim yu mekim olsem, bai yu inap mekim gutpela wok tru long wok bilong Jehova na dispela bai litimapim gutpela nem bilong em.—Hibru 13:15.
[Piksa long pes 31]
Jehoas i no bin givim bel long mekim wok, olsem na em i no pinisim tru ol Siria long pait