Yumi Bilip Long Wanpela God Yumi No Save Gut Long Em
LONG olgeta 3-pela 3-pela man long Jemani, 2-pela i bilip long God. Tasol taim ol i askim wan tausen man long stori long God ol i bilip long em, klostu olgeta i kamapim narapela narapela bekim. Wanpela nius bilong Jemani (FOCUS) i tok: “Ol man bilong Jemani ol i gat narapela narapela tingting long God, wankain olsem pasin bilong ol i narapela narapela.” Tru, i gutpela sapos yumi bilip long God, tasol i no gutpela sapos yumi bilip tasol long em na yumi no save gut long em, a?
Dispela pasin, olsem ol man i no save gut long God na ol pasin bilong em i no stap long Jemani tasol, nogat; dispela pasin i stap tu long planti hap bilong Yurop. Wanpela lain i skelim tingting bilong ol man long Ostria, Briten, na Netelan, na ripot i kamapim olsem planti man i ting God i “wanpela samting i gat bikpela strong o em i wanpela samting i stap hait na i hatwok long stori long em.” Long planti yangpela, na tu long planti yangpela i bilip long God, God i olsem samting i stap hait.
Yu Save Gut Long God?
Pasin bilong save long wanpela man i narapela kain long pasin bilong save gut long man. Pasin bilong save long wanpela man—wanpela king i stap longwe, wanpela man i gat nem long pilai spot, wanpela man bilong piksa wokabaut samting—i olsem yu save em i stap. Tasol pasin bilong save gut long man i gat bikpela insait moa bilong en. Em i makim olsem yu save gut long pasin bilong em, na ol samting em i mekim, na tingting bilong em, na ol samting em i laikim, na ol samting em i no laikim, na ol samting em i tingting long mekim bihain. Taim yu save gut long wanpela man dispela i opim rot long pas gut wantaim em.
Planti handet tausen man i tingting pinis olsem sapos ol i gat liklik save tasol long God—o save tasol olsem em i stap—dispela i no inap. Ol i bin mekim ol samting bilong save gut long God. Olsem wanem? Dispela i bin helpim ol? Wanpela man, nem bilong em Paul, em i stap long hap not bilong Jemani, pastaim em i save liklik tasol long God, olsem na em i pasim tok long bel long kisim save gut long Em. Paul i tok: “Bilong save gut long God yu mas lusim bikpela hap taim na strong, tasol bai yu kisim gutpela samting long en. Pasin bilong pas gut wantaim Man bilong wokim olgeta samting bai mekim na sindaun bilong yu long olgeta de bai kamap gutpela.”
Yu ting pasin bilong lusim bikpela hap taim na strong bilong kisim save gut long God i gutpela? Plis ritim stori i kamap bihain long dispela.
[Rait long pes 3]
Pasin bilong save long wanpela man i narapela kain long pasin bilong save gut long man