Jehova—Wanpela God i Stret Yumi Save Long Em

ATING yu no luksave olsem yu lus long kisim wanpela gutpela samting long i stap bilong yu. Sapos yu no save gut long God, em nau, yu lus long kisim wanpela gutpela samting. Bilong wanem? Long wanem, planti milion manmeri i kisim save olsem, taim ol i kisim save long God bilong Baibel ol i save kisim planti gutpela samting long i stap bilong ol. Ol i kisim ol dispela gutpela samting taim ol i kirap nupela long save long God na i go inap bihain bihain.

God Jehova, em Man bilong kamapim ol tok bilong Baibel, em i laik bai yumi mas kisim save long em. Man bilong raitim song i tok: “Mi laik bai yu mekim olsem, na bai ol i ken save tru, yu wanpela tasol, yu Bikpela [“Jehova,” NW ], na yu God Antap Tru, na yu save bosim olgeta hap bilong graun.” Em i save olsem taim yumi kisim save long em dispela bai helpim yumi. “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” Taim yumi kisim save long God, em God Antap Tru, dispela bai helpim yumi olsem wanem?​—⁠Song 83:18; Aisaia 48:⁠17.

Em bai stiaim tingting bilong yumi bilong helpim yumi long karim ol hevi i save painim yumi long olgeta wan wan de, na em bai helpim yumi long wetim ol gutpela samting bai kamap bihain, na tingting na bel bilong yumi bai i stap isi. Na tu, taim yumi kisim save gut long Jehova dispela bai kirapim yumi long kisim narapela kain tingting long ol bikpela tok i bin kamap long olgeta hap long nau. Wanem ol dispela bikpela tok?

I Stap Bilong Yu i Gat As Bilong En?

Maski ol man i wokim ol kain kain nupela masin, planti man long nau i gat ol wankain bikpela askim, olsem: ‘I gat wanem as na mi stap? Wanem samting bai painim mi long bihain? Yumi stap bilong mekim wanem?’ Sapos wanpela man i no kisim gutpela bekim long ol dispela askim, i stap bilong em bai i no gat as tru bilong en. Olsem wanem? Planti man i save pilim olsem? Long 1997, wanpela lain long Jemani i bin skelim tingting bilong ol man na ol i kamapim olsem 50 pesen bilong ol man i tok, planti taim o sampela taim ol i pilim olsem i stap bilong ol i no gat as bilong en. Ating ol man i stap long hap bilong yu ol i gat wankain tingting.

Sapos i stap bilong wanpela man i no gat as bilong en, orait em bai hatwok long putim ol mak bilong winim. Planti man i laik stretim dispela samting ol i sot long en na ol i kisim wanpela wok i gat biknem o ol i bungim planti mani samting. Tasol ol i no save long as bilong i stap bilong ol, olsem na dispela i mekim na ol i tingting planti. Sampela ol i bel hevi na ol i no laik i stap laip. Kain samting i painim wanpela naispela yangpela meri, em wanpela nius (International Herald Tribune) i stori long em olsem “em i kamap bikpela insait long wanpela famili i gat planti mani na em inap kisim planti samting.” Maski em i gat planti gutpela gutpela samting, em i pilim olsem em i stap wanpis na i stap bilong em i no gat as bilong en. Em i kisim planti marasin bilong slip na kilim i dai skin bilong em yet. Ating yu save long sampela narapela manmeri ol i bin stap wanpis na kilim i dai skin bilong ol yet.

Tasol olsem wanem? Yu bin harim ol man i tok olsem saiens inap tokim yumi long as bilong i stap bilong yumi? Wanpela nius (Die Woche) bilong Jemani i tok: “Maski ol tok bilong saiens i tru, ol i no kamapim gut bekim bilong sampela samting bilong lotu na i stap bilong man. Bilip bilong evolusen, na ol samting bilong saiens, dispela i no save helpim man long i stap bel isi na i no save strongim bel bilong man.” Ol samting ol saientis i painim pinis i stori planti long ol samting i gat laip na i kamapim stori long ol samting i save helpim graun long i stap gut na ol samting inap i stap laip. Tasol saiens i no inap tokim yumi long as na yumi stap na wanem samting bai painim yumi long bihain. Sapos yumi wet long saiens i helpim yumi, bai yumi no inap kisim bekim bilong ol askim long as bilong i stap bilong yumi. Olsem na wanpela nius (Süddeutsche Zeitung) i tok, “i mas i gat man bilong soim rot long ol man.”

Man bilong wokim yumi em inap tru long soim rot long yumi, a? Em i bin wokim ol man na putim ol long graun, olsem na em i save long as bilong i stap bilong ol. Baibel i tok olsem Jehova i bin wokim ol man na bai ol inap i go sindaun long olgeta hap bilong graun na bosim olgeta samting i stap long en. Long olgeta samting ol i mekim, ol i mas kamapim ol pasin bilong em, olsem stretpela pasin, gutpela tingting na save, na pasin sori. Taim yumi kisim save long as na Jehova i wokim yumi, bai yumi save long as bilong i stap bilong yumi.​—⁠Stat 1:​26-28.

Yu Mas Mekim Wanem?

Olsem wanem sapos bipo yu no bin painim gutpela bekim bilong ol askim olsem: ‘I gat wanem as na mi stap? Wanem samting bai painim mi long bihain? Yumi stap bilong mekim wanem?’ Baibel i tok yu mas kisim save gut long Jehova. Jisas i tok: “Bilong kisim laip i stap oltaim oltaim, ol i mas wok long kisim save long yu, yu wanpela tasol yu God tru, na long man yu bin salim i kam, em Jisas Krais.” Na tu, yu mas kisim ol pasin bilong God. Wanpela gutpela pasin tru yumi mas kisim em pasin bilong laikim tru ol narapela, na yu yet i mas putim mak olsem yu bai stap aninit long Kingdom bilong God long han bilong Mesaia. Long dispela rot i stap bilong yu bai i gat as bilong en na bai yu inap wetim gutpela samting bai kamap bihain. Ating nau yu kisim pinis bekim bilong ol dispela bikpela askim yu bin tingting planti long en.​—⁠Jon 17:​3, NW; Saveman 12:⁠13.

Olsem wanem bekim bilong ol dispela askim bai helpim yu? Wanpela man, nem bilong en Hans, em i save long dispela samting.a Sampela yia i go pinis em i gat liklik bilip tasol long God, tasol dispela bilip i no senisim ol samting long i stap bilong em. Hans i save kisim drak, pamuk nabaut, stil, na raun long motabaik. Em i tok: “Tasol i stap bilong mi i no gat as bilong en na mi no amamas tumas.” Taim em i gat 25 krismas samting, Hans i pasim tok long kisim save gut long God na em i kirap ritim Baibel. Taim em i kisim save gut long Jehova na em i save long as bilong i stap bilong man, Hans i senisim pasin bilong em na kisim baptais olsem wanpela Witnes Bilong Jehova. Orait nau inap tenpela yia pinis em i bin mekim wok autim tok long olgeta de. Em i tok: “Mekim wok bilong Jehova em i nambawan gutpela wok long i stap bilong yumi. I no gat wanpela samting i winim dispela wok. Taim mi kisim save long Jehova, nau i stap bilong mi i gat as bilong en.”

Tasol planti man i no save tingting tasol long as bilong i stap bilong ol, nogat. Pasin bilong dispela graun i wok long i go nogut moa, olsem na planti man i bel hevi long narapela bikpela samting.

Bilong Wanem Hevi i Kamap?

Taim hevi i kamap, planti taim man i kisim hevi i gat wanpela askim, olsem: Bilong wanem hevi i kamap? Bilong karim dispela hevi em i mas kisim stretpela bekim long dispela askim. Sapos em i no kisim stretpela bekim bilong dispela askim, hevi bai stap yet na em bai bel nogut. Olsem: Yumi ken tingim stori bilong wanpela meri, nem bilong em Bruni.

Bruni, wanpela mama nau em i lapun liklik, em i tok: “Sampela yia i go pinis, liklik pikinini meri bilong mi i dai. Mi bilip long God, olsem na mi go long pris bai em i ken mekim gut bel bilong mi. Em i tokim mi olsem God i kisim Susanne i go long heven, na nau em i wanpela ensel. Dai bilong pikinini meri bilong mi i mekim na bel bilong mi i bagarap olgeta, na mi bel nogut tru long God i bin kisim em.” Bel hevi bilong Bruni i stap inap sampela yia. Bruni i tok moa: “Wanpela Witnes Bilong Jehova i soim mi long Baibel olsem i no gat as long mi bel nogut long God. Jehova i no kisim Susanne i go long heven na em i no wanpela ensel. Sin i stap long skin bilong em na dispela i as bilong sik bilong em. Susanne i slip i stap long matmat na wetim Jehova i kirapim em bek. Na mi kisim save tu olsem em i wokim ol man bilong i stap oltaim oltaim long Paradais long graun, na klostu nau dispela samting bai kamap. Taim mi kisim gut save long Jehova em i wanem kain man, mi pas gut wantaim em, na bel hevi bilong mi i wok long pinis.”​—⁠Song 37:29; Aposel 24:15; Rom 5:⁠12.

Ol kain kain hevi i save painim planti milion man: sampela long famili i kisim nogut, bikpela pait, hangre, o bikpela bagarap bilong win na ren samting. Taim Bruni i kisim save long Baibel olsem Jehova i no gat asua long ol hevi i kamap, na em i no laik bai ol man i kisim hevi, na klostu nau God bai pinisim olgeta pasin nogut, dispela i mekim gut bel bilong Bruni. Pasin nogut i wok long i go bikpela na dispela i olsem mak i kamapim olsem yumi stap long “taim bilong las de” bilong pasin nogut bilong dispela graun. Klostu nau bikpela senis bai kamapim ol gutpela samting, na yumi olgeta i wetim tru dispela.​—⁠2 Timoti 3:​1-5; Matyu 24:​7, 8.

Kisim Save Long God

Hans na Bruni i bin save liklik tasol long God. Tupela i bin bilip long em, tasol ol i no save gut long em. Taim tupela i lusim hap taim bilong kisim save gut long Jehova, tupela i kisim gutpela samting. Tupela i kisim bekim bilong ol bikpela askim bilong ol man bilong nau. Dispela i mekim bel bilong tupela i stap isi na tupela i wetim gutpela samting bai kamap bihain. Wankain samting i bin painim planti milion wokman bilong Jehova.

Bilong kisim save long Jehova, pastaim yumi mas skelim gut Baibel. Baibel i tokim yumi long Jehova na wanem samting em i laik yumi mas mekim bilong lotuim em. Sampela long taim bilong ol aposel i bin mekim olsem. Luk, em wanpela saveman na dokta, em i stori long ol manmeri bilong kongrigesen Juda long Beria, Grik, na em i tok, “ol i harim tok bilong Pol [na Sailas], na ol i laikim tru. Na long olgeta de ol i save ritim na skelim tok i stap long buk bilong God, bilong ol i ken save, tok bilong Pol em i tru, o nogat.”​—⁠Aposel 17:​10, 11.

Ol Kristen bilong pastaim i save bung wantaim. (Aposel 2:​41, 42, 46; 1 Korin 1:​1, 2; Galesia 1:​1, 2; 2 Tesalonaika 1:⁠1) Na i wankain long nau. Ol Witnes Bilong Jehova i save bung wantaim long ol miting, na ol dispela miting i helpim ol long i go klostu long Jehova na amamas long lotuim em. Taim yu bung wantaim ol Witnes long hap bilong yu, dispela bai helpim yu long narapela samting moa. Isi isi ol man i wok long kamap wankain liklik olsem God ol i save lotuim, olsem na ol Witnes i wok long kamapim ol pasin em Jehova yet i save kamapim, maski ol i no inap kamapim gut olgeta. Olsem na taim yumi bung wantaim ol Witnes, dispela bai helpim yumi long save gut long Jehova.​—⁠Hibru 10:​24, 25.

Olsem wanem? Yu ting dispela em i bikpela hatwok tumas bilong kisim save long wanpela Man tasol? Tru i gat hatwok bilong en. Tasol dispela i wankain long planti samting yu tingting long kisim long i stap bilong yu, a? Tingim bikpela hatwok wanpela man bilong pilai spot i mas mekim. Jean-Claude Killy, em wanpela man bilong Frans i bin winim medal gol long raun long ais long spot Olimpik, em i stori long samting man i mas mekim bilong kamap nambawan long spot, na em i tok: “Yu mas kirap 10-pela yia paslain long resis i kamap na redi long en inap planti yia na tingting long en long olgeta de . . . Em i wanpela wok yu mas mekim long olgeta de, long skin na tingting bilong yu.” Olgeta dispela taim na strong yu mas lusim bilong insait long wanpela resis em i bilong sotpela taim tasol, ating olsem 10-pela minit! Tasol bai yu kisim planti samting moa​—⁠na em bai stap longtaim​—⁠sapos yu kisim save gut long God.

Wanpela Pasin Pren i Wok Long Kamap Strong Moa

Husat i laik lus long kisim wanpela gutpela samting long i stap bilong em? Ating i no gat wanpela, a? Olsem na sapos yu pilim olsem i stap bilong yu i no gat as tru bilong en o yu laik save long as bilong ol hevi, orait yu mas tingting strong long kisim save long Jehova, em God bilong Baibel. Sapos yu kisim save long em, sindaun bilong yu bai senis na kamap gutpela moa i go inap bihain bihain.

Olsem wanem? Oltaim bai yumi wok yet long kisim save long Jehova? Ol man i bin lotuim em inap planti yia pinis, ol i kirap nogut yet long ol samting ol i bin kisim save long em na long ol nupela samting ol i wok yet long kisim save long em. Taim yumi kisim save long ol dispela samting, dispela i save mekim yumi i stap amamas na i bringim yumi i go klostu moa long em. Yumi ken wanbel long tingting bilong aposel Pol, em i tok: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en. Olsem tok i stap long buk bilong God, ‘Husat i save pinis long tingting bilong Bikpela? Husat i bin givim tingting long em?’ ”​—⁠Rom 11:​33, 34.

[Futnot]

[Rait long pes 5]

Ol man i save kamapim yet ol bikpela askim olsem: ‘I gat wanem as na mi stap? Wanem samting bai painim mi long bihain? Yumi stap bilong mekim wanem?’

[Rait long pes 6]

“Taim mi kisim gut save long Jehova em i wanem kain man, mi pas gut wantaim em”

[Rait long pes 7]

“Mekim wok bilong Jehova em i nambawan gutpela wok long i stap bilong yumi. I no gat wanpela samting i winim dispela wok. Taim mi kisim save long Jehova, nau i stap bilong mi i gat as bilong en”