Jehova i Save Tingim Tru Ol Manmeri Nating

YU TING yumi mas save gut tru long mekim wanpela wok samting o stap narapela kain long sampela rot na bai God i tingim yumi? Abraham Lincoln, em namba 16 presiden bilong Amerika, i bin tok: “Bikpela i laikim ol manmeri nating. Olsem na em i wokim planti bilong ol.” Planti manmeri i pilim olsem ol i samting nating tasol na i no gat wanpela gutpela samting i stap long ol. Dispela tok man nating inap makim olsem man i stap rabis o em i no gutpela tumas o i no gat nem o namba samting. Yu laik bung wantaim wanem kain manmeri? Ol manmeri i gat pasin antap, na ol man i save strong long bosim narapela? O yu laik bung wantaim ol manmeri i gat pasin pren, pasin daun, na ol i gat gutpela bel na ol i save tingim ol narapela?

Long nau pasin bilong pretim na mekim nogut long ol narapela na tok bilas i go bikpela, olsem na sampela i hatwok long bilip olsem God i save tingim ol. Wanpela man bilong ritim dispela nius i tok: “Insait long famili bilong mi, narapela i no kamapim olsem ol i laikim narapela. Ol i save daunim mi na mekim tok pilai na lap long mi. Olsem na taim mi liklik yet mi save ting mi nogut tasol na mi no inap mekim wanpela gutpela wok. Ol dispela tingting bilong bipo i stap strong yet long bel bilong mi na i laik daunim mi taim hevi i painim mi.” Tasol i gat as na yumi ken bilip olsem God i save tingim tru ol manmeri nating.

Jehova i Tingim Ol Manmeri Nating

King Devit i tok: “Bikpela i gat biknem na yumi mas litimapim biknem bilong em moa yet. Em i antap tru na yumi no inap save olgeta long biknem bilong en.” (Song 145:⁠3) Maski Jehova i gat biknem na em i antap tru, dispela i no pasim em long tingim yumi na sori na mekim gutpela pasin long yumi. (1 Pita 5:⁠7) Olsem na man bilong raitim song i tok: “God i save stap klostu long ol manmeri i gat hevi. Na em i save helpim ol manmeri bilip [“bel,” NW] bilong ol i bagarap.”​​—⁠Song 34:⁠18.

Ol samting i pulim tingting bilong ol manmeri olsem naispela skin, biknem, o planti mani, ol i no bikpela samting long ai bilong God. Lo God i givim long ol Israel i soim olsem God i save sori long ol rabisman, ol pikinini papamama bilong ol i dai pinis, ol meri man bilong ol i dai pinis, na ol man bilong narapela kantri. God i tokim ol Israel, em bipo ol i bin karim planti pen na hevi long Isip, olsem: “Yupela i no ken mekim nogut long man bilong narapela kantri i stap wantaim yupela, o putim hevi long em. . . . Yupela i no ken mekim nogut long meri, man bilong en i dai pinis, o long pikinini, papa i dai pinis. Sapos yupela i mekim nogut long ol na ol i krai long mi long helpim ol, bai mi harim singaut bilong ol.” (Kisim Bek 22:​21-​24) Profet Aisaia tu i bilip tru long pasin bilong God long tingim ol rabisman. Em i tok: “Yu bin i stap olsem strongpela ples hait bilong ol rabisman i sot long ol samting, na ol i stap gut long taim bilong hevi. Belhat na kros bilong ol man nogut i olsem strongpela win i kam sakim banis na i olsem hat bilong san i kamap long ples wesan. Tasol long taim bilong win na ren yu bin karamapim ol rabisman na ol i stap gut, na yu no larim strongpela san i kukim ol.”​​—⁠Aisaia 25:⁠4.

Long taim em i autim tok, Jisas Krais “em i wankain tru olsem God yet,” na em i stap gutpela piksa long ol disaipel bilong em long pasin bilong tingim tru ol manmeri nating. (Hibru 1:⁠3) Taim em i lukim bikpela lain manmeri “em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.”​​—⁠Matyu 9:​36.

Tingim tu ol man Jisas i makim bilong kamap ol aposel bilong em​—⁠ol man i tok ol aposel ‘i no bin skul na ol i man nating tasol.’ (Aposel 4:​13) Bihain long i dai bilong Jisas, ol disaipel i stat long singautim olgeta kain man long harim Tok bilong God. Aposel Pol i tok, “sapos wanpela man i no bilip o narapela man [“man nating,” NW ]” ol inap kam insait long kongrigesen Kristen na kamap bilipman. (1 Korin 14:​24, 25) God i no makim tasol ol man i gat biknem o planti save samting, nogat, God i makim planti manmeri nating long mekim wok bilong em. Pol i tok: “Ol brata, yupela i mas tingim taim God i bin singautim yupela na yupela i kamap Kristen. Planti bilong yupela i no bin i stap olsem saveman long ai bilong ol man bilong dispela graun. Na planti bilong yupela i no bin i gat strong. Na planti bilong yupela i no bilong ol lain famili i gat biknem. Tasol ol man God i makim, em ol man i gat kranki tingting long ai bilong ol arapela man, na long dispela pasin God i semim tru ol saveman bilong dispela graun. Na ol man ol arapela i save lukim olsem man i no gat strong, em God i bin kisim bilong semim ol man i gat strong. Na em i kisim ol man i no gat nem long dispela graun, em ol man ol arapela i save lukim olsem ol rabis samting na olsem ol samting nating. Na long dispela pasin God i save mekim ol man i gat biknem na strong i kamap olsem samting nating. Olsem na i no gat wanpela man i ken litimapim nem bilong em yet long ai bilong God.”​​—⁠1 Korin 1:​26-​29.

Olsem na i wankain tu long nau, God i tingim tru yumi. Em i laik “kisim bek olgeta manmeri, bai ol i ken save long as bilong tok tru.” (1 Timoti 2:⁠4) Sapos God i laikim tru ol manmeri bilong graun na em i salim Pikinini bilong em i kam dai bilong helpim yumi, i no gat as long pilim olsem Em i no laikim yumi o yumi samting nating tasol. (Jon 3:16) Jisas Krais i tokim ol disaipel, i bikpela samting long mekim gut long ol brata spirit bilong em i no gat nem liklik, i olsem ol i mekim gut long Jisas yet. Em i tok: “Olgeta samting yupela i bin mekim long wanpela bilong ol dispela brata bilong mi i no gat nem liklik, ol dispela samting yupela i bin mekim long mi.” (Matyu 25:40) Olsem na maski ol man bilong graun i gat wanem tingting long yumi, sapos yumi laikim tok i tru, yumi gutpela samting tru long ai bilong God.

Francisco,a bilong Brasil, em papa bilong em i dai pinis, i bin pilim olsem bihain long em i kisim pasin bilong pas gut wantaim God. Em i stori olsem: “Pasin bilong kisim save long Jehova na oganaisesen bilong em i helpim mi long karim hevi bilong bel i no stap isi, na sem. Mi kisim save olsem Jehova i save tingim tru yumi wan wan.” Long tingting bilong Francisco, Jehova i stap olsem Papa tru tru.

Tingim Ol Yangpela Manmeri

Jehova i save tingim tru olgeta wan wan yangpela man na meri. Maski yumi yangpela o lapun, yumi no ken kisim pasin antap. Tru ating yumi gat sampela save long ol wok o sampela gutpela pasin em bihain God i ken mekim wok long en. Jehova i save long ol samting yumi mas stretim na skul long en bilong mekim olgeta wok yumi inap tru long mekim. Olsem: Tingim dispela stori i stap long 1 Samuel sapta 16. Long tingting bilong Samuel, i luk olsem ol narapela man i winim mak bilong stap king, winim Devit, olsem na Jehova i kamapim as na em i makim Devit, laspela pikinini bilong Jesi long kamap king bilong Israel. Em i tok: “Yu no ken ting long em i longpela bun o long em i luk naispela na bai mi makim em. Nogat. Mi no laik bai dispela man [bikbrata bilong Devit] i kamap king. Long wanem, mi no save skelim ol man olsem ol man i save skelim. Nogat. Ol man i save lukluk long bodi. Tasol mi save lukim tingting na laik bilong man na mi skelim ol.”​​—⁠1 Samuel 16:⁠7.

Olsem wanem? Ol yangpela long nau inap bilip olsem Jehova i save tingim tru ol? Tingim Ana, em wanpela yangpela meri Brasil. Olsem planti ol narapela yangpela, tingting bilong em i bagarap taim em i lukim planti korapsen samting na pasin i no stret. Bihain papa bilong em i kirap long kisim em na ol susa bilong em i go long ol miting Kristen. Em i amamas long ol samting em i lainim long Tok bilong God. Ana i stat long ritim Baibel wantaim ol buk na nius Kristen na beten long God Jehova. Isi isi em i kisim pasin bilong pas gut wantaim God. Em i tok: “Mi save amamas long kalap long baiskol bilong mi na i go long liklik maunten klostu long haus bilong mi bilong lukim san i go daun. Mi beten long Jehova na tenkyu long gutpela pasin bilong em. Mi laik kamapim long em olsem mi laikim em tru. Pasin bilong kisim save long God Jehova na ol samting em i tingting long mekim i givim bel isi long mi na mi pilim olsem mi stap gut.” Olsem wanem? Yu tu yu save painim taim bilong tingim tingim gutpela pasin bilong Jehova?

Tru, sindaun bilong yumi inap mekim na i hatwok long pas gut wantaim Jehova. Olsem: Tingim Lidia, taim em i laik kamapim bel bilong em long papa long wanpela samting em i tingting planti long en, papa i tok strong long em olsem: “Tok bilong yu i no gat as bilong en.” Lidia i save olsem papa i laik bai em i lusim tingting long dispela hevi. Lidia i tok: “Pasin bilong stadi long Baibel i helpim mi long save long ol samting mi laik save long en na planti moa. Gutpela pasin bilong Jehova i mekim na em i kamap gutpela pren bilong mi. Nau mi gat gutpela Papa i tingim mi gut na mi inap kamapim tingting na bel bilong mi long em. Mi ken tromoi planti aua long toktok wantaim dispela bikpela Man bilong olgeta hap bilong graun, na mi save tru olsem em bai harim mi.” Ol tok bilong Baibel olsem Filipai 4:​6, 7 i helpim em long pilim gutpela pasin bilong Jehova. Dispela skripsa i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.”

Helpim Yu Long Skin na Spirit

Jehova i tingim olgeta wan wan wokboi bilong em na kongrigesen bilong em long olgeta hap bilong graun. Yumi ken soim olsem yumi laikim tumas Papa bilong yumi long heven taim yumi makim taim bilong toktok wantaim em. Yumi no ken ting pasin bilong yumi long pas gut wantaim Jehova em i samting nating, nogat tru. Oltaim Devit i save tingim pasin bilong em long pas gut wantaim Jehova. Em i tok: “God, yu mas skulim mi long gutpela pasin bilong yu, na soim mi long rot bilong yu. Lainim mi long bihainim tok tru bilong yu, long wanem, yu save kisim bek mi. Long olgeta de mi save wet long yu i helpim mi.”​​—⁠Song 25:​4, 5.

Ating dispela tok bilong pas gut wantaim God i nupela long yu. Maski wanem ol hevi i bungim yu, yu ken bilip tru olsem God Antap Tru bai givim helpim long yu i stret wantaim laik bilong em. (1 Jon 5:​14, 15) Olsem na yu mas lain long kamapim stret samting yu laik beten long en, na tingim tu sindaun bilong yu na ol samting yu mas i gat.

Pasin bilong luksave long ol samting yumi mas kisim em i bikpela samting, olsem beten bilong King Solomon i kamapim taim em i dediketim tempel. Em i tok: “Sapos taim bilong bikpela hangre i kamap long kantri bilong mipela, o wanpela bikpela sik nogut i kamap, o sapos hatpela win i kam na mekim wanpela kain sik i kamap na bagarapim ol kaikai long gaden, o sapos planti grasopa tumas i kam pinisim ol kaikai, o sapos ol birua i kam pait na banisim mipela insait long ol taun bilong mipela, o sapos ol kain kain sik i bagarapim mipela, na long dispela taim sapos wanpela bilong mipela Israel, ol manmeri bilong yu, i pilim tru dispela hevi i bin kamap . . . orait Bikpela, yu stap long ples bilong yu long heven na yu ken harim beten bilong en na lusim sin bilong en na helpim em. Yu tasol yu save long tingting bilong ol man, olsem na yu ken skelim pasin bilong olgeta wan wan man na bekim pe long ol inap long pasin ol i bin mekim.” (2 Stori 6:​28-​30) Tru tumas, yu yet ‘i pilim tru ol hevi’ yu karim. Olsem na em i bikpela samting long kamapim ol samting yu mas kisim na ol laik bilong yu. Sapos yu mekim olsem, “[Jehova] bai i givim yu ol samting yu laikim tru.”​​—⁠Song 37:⁠4.

Strongim Pasin Bilong Yu Long Pas Gut Wantaim Jehova

Jehova i amamas long ol manmeri nating i pas gut wantaim em. Tok Bilong Em i tokim yumi olsem: “ ‘Bai mi stap Papa bilong yupela, na yupela bai i stap pikinini bilong mi.’ Bikpela, em God I Gat Olgeta Strong, em i tok olsem.” (2 Korin 6:​18) Jehova na Pikinini man bilong em i laik bai yumi stap gut na kisim laip oltaim. Dispela i strongim yumi tru long save olsem Jehova bai i helpim yumi long mekim ol wok bilong yumi insait long famili, long ples wok, na insait long kongrigesen Kristen!

Yumi stap long taim nogut. Sik, ol hevi bilong famili, kisim liklik pe long wok, o ol narapela samting inap givim hatwok long yumi. Na ating yumi no save bai yumi mekim wanem bilong karim wanpela hevi o traim. Satan, man bilong sutim tok, i mekim pait bilong spirit long ol manmeri bilong God, na em i putim hevi long yumi na kirapim ol narapela long mekim olsem. Tasol i gat wanpela man i tingim gut yumi na i wok long helpim yumi long kisim pasin bilong pas gut wantaim Jehova. Dispela man em Jisas Krais tasol, em i gat bikpela namba long heven. Baibel i tok: “Yumi yet i no gat strong bilong daunim sin. Tasol yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin. Olsem na yumi ken i go klostu long God, na yumi no ken pret. Em i man bilong marimari. Yumi go long em, na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi.”​​—⁠Hibru 4:​15, 16.

Yumi kisim strong taim yumi kisim save olsem maski yumi no gat nem o planti mani God inap orait long yumi! Taim yu karim bikpela hevi, yu mas i stap olsem man bilong raitim song. Em i bin beten olsem: “Mi no gat strong, na mi no inap helpim mi yet. Tasol yu, Bikpela, yu save tingting long mi. God, yu yet yu man bilong helpim mi, na yu save kisim bek mi. Yu no ken wet, yu mas helpim mi kwik.” (Song 31:​9-​14; 40:17) Yu mas save olsem Jehova i laikim ol manmeri nating i gat pasin daun. Yes, ‘God i save wari long yumi olsem na olgeta hevi yumi karim, yumi mas putim long han bilong em.’​​—⁠1 Pita 5:⁠7.

[Futnot]

[Ol Piksa long pes 29]

Planti bilong ol disaipel bilong Jisas, ol i no bin skul na ol i man nating tasol

[Piksa long pes 30]

Ol Kristen i wok strong long kisim strong long bilip

[Ol Piksa long pes 31]

I no olsem yumi mas i gat namba samting bilong God i ken orait long yumi