Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:

• Taim yumi kisim save long famili bilong Safan, dispela i helpim yumi olsem wanem?

Safan em kuskus bilong King Josaia bilong Juda. Em i gat namba insait long kingdom bilong Juda, na em i sapotim wok bilong king long stretim bek lotu i tru. Tupela pikinini man bilong Safan i bin helpim Jeremaia. Na narapela pikinini man na tupela tumbuna pikinini man i mekim wok long namba bilong ol long helpim lotu i tru. Yumi tu i mas mekim wok long namba na mani samting bilong yumi bilong helpim lotu i tru.​​—⁠12/15, pes 19-​22.

• Olsem wanem Irene Hochstenbach i winim bikpela hevi bilong skin na em inap mekim wok bilong Jehova?

Taim em i gat 7-pela krismas, em i kamap yaupas. Tasol maski em i stap olsem, em i lain long toktok wantaim ol narapela na nau em i raun wantaim man bilong em (wasman raun) taim em i raun lukim ol kongrigesen long Netelan.​​—⁠1/1, pes 23-26.

• Wanem tupela nupela buk bilong stadi yumi kisim long “Ol Man Bilong Givim Bel Long Autim Tok Bilong Kingdom” Kibung Distrik?

Ol Kristen long olgeta hap bilong graun i bin amamas long kisim nupela buk Worship the Only True God, em ol i wokim bilong stadi long en wantaim ol man bihain long ol i stadi pinis long buk Save i Bringim Man Long Laip Oltaim; na narapela em buk Draw Close to Jehovah, em i stori long ol pasin bilong Jehova na ol samting em i mekim. Na buk i toktok tu long olsem wanem yumi ken bihainim ol pasin bilong Jehova.​​—⁠1/15, pes 23-24.

• Wanem insait bilong tok bilong Sindaun 12:​5, em i tok: “Ol stretpela man i tingting oltaim long mekim pasin i stret”?

Samting ol gutpela man i tingting long en, dispela i save kirapim ol long mekim pasin i stret. Pasin bilong laikim tru God na ol narapela man, dispela i save kirapim bel bilong ol stretpela man, olsem na ol i laik mekim gutpela pasin tasol.​​—⁠1/15, pes 30.

• Wanem samting inap helpim man long kisim stretpela tingting long wok?

Long taim yumi liklik yet, em i gutpela long lain long ting olsem pasin bilong mekim wok em i bikpela samting. Baibel i kirapim yumi long wok strong, na lusim les pasin. (Sindaun 20:⁠4) Na tu, em i strongim ol Kristen long ol i no ken tingting tasol long mekim wok. Yumi mas save olsem wok bilong God i mas i stap olsem bikpela samting long laip bilong yumi. (1 Korin 7:​29-​31) Na tu, ol trupela Kristen ol i bilip tru olsem God bai i no lusim ol.​​—⁠2/1, pes 4-6.

• Wanem hap bilong Baibel i kolim tok alta long namba wan taim?

Long Stat 8:​20, em i stori long alta Noa i bin wokim taim em i lusim sip bihain long Bikpela Tait. Tasol ating Kein na Abel i bin mekim wok long ol alta taim ol i mekim ol ofa. (Stat 4:​3, 4)​​—⁠2/15, pes 28.

• Olsem wanem sampela Kristen i ken mekim gutpela wok taim sindaun bilong ol i senis?

Sampela i orait long ol senis o ol yet i mekim ol senis long wok mani bilong ol na bai ol i ken lusim bikpela hap taim moa bilong mekim wok autim tok. Sampela narapela i tromoi bikpela hap taim moa na mekim bikpela wok moa bilong God taim wok bilong famili i go daun liklik, olsem taim pikinini bilong ol i go bikpela na i marit.​​—⁠3/1, pes 19-​22.

• Olsem wanem stori bilong Jona na aposel Pita i helpim yumi long tingim ol narapela olsem Jehova i save tingim ol?

Yumi save long pasin bilong Jona na Pita long tingting kranki long ol samting na long ol i mekim wanem taim samting bilong traim bilip na pasin bilong bihainim tok i kamap. Tasol Jehova i lukim ol gutpela pasin bilong ol na em i wok yet long yusim ol long mekim wok bilong em. Taim ol narapela i bagarapim bel o i daunim yumi, yumi mas tingting long ol gutpela pasin bilong ol em ol pasin yumi bin laikim long pastaim na ol gutpela pasin bilong ol em Jehova i lukim.​​—⁠3/15, pes 16-​19.

• I gat wanem as na long sampela Baibel namba ol i raitim long ol wan wan song na ves long Buk Song i no wankain?

Ol namba ol i raitim long ol ves bilong Buk Song long tok ples Hibru bilong bipo i no wankain long Baibel Septuagint em ol i bin tanim long tok Grik. Ating sampela Baibel long nau i no raitim ol wankain namba, long wanem, sampela i bihainim ol tok bilong Baibel ol i bin raitim long tok Hibru na sampela i bihainim Baibel Septuagint.​​—⁠4/1, pes 31.