I Gat Wanpela Man Yumi Inap Bilip Tru Long Em?

BIHAIN long taim Banis Berlin i pundaun long 1989, sampela samting i bin stap hait tru ol i kamap ples klia. Olsem: Lydiaa i kisim save olsem, long taim gavman Soselis i bin bosim Is Jemani, ol Stasi, em lain polis bilong gavman, ol i raitim lista bilong ol samting em i bin mekim, em ol samting bilong em yet. Lydia i kirap nogut taim em i kisim save long dispela, tasol em i kirap nogut moa yet taim em i kisim save long man i bin givim ol dispela tok long lain Stasi​—⁠em man bilong em yet! Dispela man em Lydia i ting em inap bilip tru long em, i bin kamapim Lydia long ol birua.

Nius The Times bilong London i kamapim stori bilong Robert, em wanpela lapun i bin “rispek tru na laikim na bilip tru” long dokta bilong em. Ol i tok dispela dokta i gat “gutpela pasin na pasin sori.” Orait bihain, wantu Robert i dai. Ating em i kisim hat-atek o sik strok? Nogat. Ol polis i ting dokta i bin go lukim Robert long haus na i givim em sut i gat gip long en, tasol Robert na famili bilong em i no save. Em nau, i luk olsem wanpela man em Robert i bilip tru long em, i kilim Robert i dai.

Em nau, ol lain em Lydia na Robert i bin bilip tru long ol i mekim pasin birua long tupela, na tupela i kisim nogut tru long en. Tru, sampela taim i no gat samting nogut olsem i save kamap long dispela pasin. Tasol planti man i bin lukim olsem man ol i bin bilip long em, em i no stap gut long ol. Nius bilong wanpela lain long Jemani (Allensbacher Jahrbuch der Demoskopie 1998-2002) i save skelim tingting bilong ol man i tok, inap 86 pesen bilong ol man ol i toktok wantaim ol, i tok, man ol i bin bilip tru long em i no stap gut long ol. Ating kain samting olsem i bin painim yu, a? Olsem na yumi no ken kirap nogut long ripot bilong wanpela nius bilong Swiselan (Neue Zürcher Zeitung) long 2002 i tok: “Long ol kantri bilong Wes i gat planti wok bisnis samting, insait long planti yia i go pinis pasin bilong ol poroman long bilip tru long narapela narapela i wok long pinis.”

Em i Kamap Isi Isi, Em i Pinis Hariap

Wanpela dikseneri i tok pasin bilong bilip long ol narapela i olsem: “Yumi bilip olsem ol i no save giaman, na ol i gat gutpela bel, na ol i no ken mekim wanpela samting long laik bilong ol yet bilong nogutim yumi.” Isi isi yumi save kisim pasin bilong bilip long wanpela man, tasol dispela pasin inap pinis wantu tasol. Planti ol i pilim olsem man ol i bin bilip long em, em i no stap gut long ol, olsem na planti man i no laik bilip long narapela. Wanpela ripot ol i kamapim long Jemani long 2002 i tok, ‘Long olgeta 3-pela 3-pela yangpela, inap olsem wanpela tasol i save bilip long ol narapela.’

Yumi ken askim yumi yet olsem: ‘Yumi inap bilip tru long wanpela man? I gutpela yumi bilip long wanpela man em yumi no save, bihain em bai i stap gut long yumi o nogat?’

[Ol Futnot]

[Rait long pes 3]

Wanpela lain bilong skelim tingting bilong ol man i tok, inap 86 pesen bilong ol dispela man i tok, man ol i bin bilip tru long em, em i no stap gut long ol