Ol i Strongim Ol Sumatin Bilong Gileat Long Tokaut Long “Ol Strongpela Wok”
BIKPELA lain manmeri inap 6,635 em ol i kam long 52 kantri, ol i stap long gretiuesen bilong klas namba 115 bilong Wastaua Baibel Skul Bilong Gileat long Septemba 13, 2003.
Ol i harim ol gutpela tok bilong Baibel bilong strongim 48 sumatin bilong dispela klas long bringim tok bilong “ol strongpela wok bilong God” i go long ol manmeri bilong 17 kantri. (Aposel 2:11) Em ol kantri we ol dispela sumatin bai mekim wok misineri.
Long tok em i mekim bilong kirapim program, Stephen Lett, em i wanpela memba bilong Gavening Bodi bilong ol Witnes Bilong Jehova na em i siaman bilong program, em i kirapim gen tingting bilong ol sumatin: “Taim yupela i go long ol asainmen bilong yupela, maski yupela i go long wanem hap o wanem ol samting i painim yupela, i gat bikpela lain moa bilong helpim yupela, winim ol lain i birua long yupela.” Brata Lett i kamapim stori i stap long sapta 6 bilong 2 King, na em i kirapim ol sumatin long tingim gen olsem ol inap bilip long God Jehova na planti lain ensel long helpim ol taim ol i tokaut long “ol strongpela wok bilong God.” (2 King 6:15, 16) Ol Kristen long taim bilong ol aposel, ol i bin kisim hevi long han bilong ol birua na ol man i les long harim taim ol i mekim wok bilong autim tok na skulim ol man, na wankain samting i painim ol misineri Kristen long nau. Tasol ol i ken bilip olsem ol bai kisim helpim long heven, na tu, long oganaisesen bilong Jehova long graun.—Song 34:7; Matyu 24:45.
Toktok Long “Ol Strongpela Wok Bilong God”
Bihain long toktok bilong siaman, Harold Corkern, em i insait long Komiti Bilong Brens bilong Yunaitet Stets, em i toktok long tim “Putim Stret Mak Long Samting Yu Laik Mekim—Rot Bilong Kisim Amamas Long Wok.” Brata Corkern i kamapim klia olsem sapos man i wet nating long wanpela samting, dispela inap mekim em i bel hevi, olsem Sindaun 13:12 i kamapim. Tasol planti taim man i bel hevi, long wanem, em i ting long kisim ol samting em i no inap long kisim. Ol sumatin i mas i gat stretpela tingting long ol yet na long ol narapela. Ol i mas save olsem sampela taim ol bai popaia, tasol ol dispela samting i no ken mekim ol i bel hevi tumas taim ol i wok strong long helpim ol narapela long kisim gut save long “ol strongpela wok bilong God.” Brata Corkern i strongim ol nupela misineri long bilip long Jehova, em man “i save mekim gut tru long ol man i wok long painim em.”—Hibru 11:6.
Bihain long dispela, Daniel Sydlik, em wanpela memba bilong Gavening Bodi, em i toktok long tim “Pasin Bilong Kristen Long Bilip na Wet—Em Wanem Samting?” Em i tok: “Pasin bilong bilip na wet em i wanpela gutpela pasin ol Kristen i mas i gat. Em i wanpela lo i makim wanem samting i stret, na i helpim man long kisim stretpela pasin bilong pas gut wantaim God. Man i no Kristen, em i no inap kisim dispela pasin olsem yumi.” Brata Sydlik i stori moa long ol samting i insait long dispela pasin, em ol samting i save helpim man long kisim tingting olsem ol gutpela samting bai kamap maski i gat ol hevi i stap. “Pasin bilong bilip na wet bai givim nupela strong long yumi na bai yumi inap tingting strong long winim ol hevi bilong wan wan de.” Pasin bilong Kristen long bilip na wet i helpim em long amamas long mekim wok bilong Jehova na tingim em olsem God bilong kamapim ol samting em i tingting pinis long mekim.—Rom 12:12.
Wallace Liverance, em kuskus bilong Skul Gileat, em i strongim ol sumatin long “Larim Holi Spirit i Stiaim Wokabaut Bilong Ol.” (Galesia 5:16) Em i stori long olsem wanem Baruk, em kuskus bilong Jeremaia, klostu tru em i lusim pasin bilong larim holi spirit i stiaim wokabaut bilong em. Wanpela taim, Baruk i les olgeta na em i kirap long painim ol gutpela samting bilong em yet. (Jeremaia 45:3, 5) Brata Liverance i kamapim olsem sampela man i bin lusim pasin bilong bihainim Jisas na ol i sakim ol tok i tru bilong ol samting bilong spirit—em samting inap helpim man long abrusim bagarap. Ol i mekim olsem, long wanem, ol i no klia gut long ol samting Jisas i skulim ol long en, na ol i no kisim ol samting bilong skin em ol i gat laik long kisim, olsem na ol i bel hevi. (Jon 6:26, 27, 51, 66) Ol misineri, em wok bilong ol i bilong kirapim ol man long tingim Man Bilong Wokim ol na ol samting em i tingting pinis long mekim, ol inap lainim wanem ol samting long ol dispela stori? Ol i no ken tingting long kisim namba, o long ol man i mas tingim ol, o yusim wanpela asainmen tiokratik long helpim ol yet, nogat.
“Bai Yu Kamap Man Bilong Givim Samting o Man Bilong Kisim Samting?” Tisa bilong Skul Gileat, em Mark Noumair, em i toktok long dispela askim. Tok bilong Hetman 5:2 i as bilong ol tok em i mekim, we ol i bin givim biknem long ol wan wan Israel em ol yet i amamas long insait long ami bilong Barak. Em i tok amamas long ol sumatin bilong Gileat long ol i bin bihainim singaut bilong Man i Winim Barak, em Jisas Krais, na ol i insait moa yet long pait bilong spirit. Ol lain i insait long ami bilong Krais, ol i mas tingting long mekim ol samting na bai bosman bilong ol i ken orait long ol. Brata Noumair i kirapim gen tingting bilong ol sumatin na em i tok: “Taim yumi tingting long amamasim yumi yet, yumi no inap pait moa long birua. . . . Wok misineri em i no samting bilong helpim yu yet. Em samting bilong helpim Jehova, wok bos bilong em, na long laik bilong em i ken kamap. Yumi no mekim wok misineri, long wanem, yumi laik bai Jehova i mekim yumi i amamas, nogat, yumi mekim wok bilong em, long wanem, yumi laikim em.”—2 Timoti 2:4.
Tisa bilong Skul Gileat, em Lawrence Bowen, em i siaman bilong narapela hap long program “Mekim Tok Tru Bilong Yu i Wok Insait Long Bel Bilong Ol.” (Jon 17:17) Em i tok ol sumatin bilong klas namba 115 ol i wokman holi bilong God. Taim ol i stap yet long skul, ol i bin insait long wok autim tok, na painim ol man i gat gutpela bel em ol i laikim tok i tru. Olsem Jisas na ol disaipel bilong em long pastaim, ol sumatin i no bin mekim wanpela tok long ‘tingting bilong ol yet,’ nogat. (Jon 12:49, 50) Ol i givim bel long autim tok i tru em inap helpim man long kisim laip. Ol ekspiriens bilong ol sumatin na ol soim ol i mekim i kamapim klia bikpela samting Baibel i mekim long ol man ol i bin bungim.
Gutpela Tok na Ekspiriens i Strongim Ol
Anthony Pérez na Anthony Griffin, tupela memba bilong Dipatmen Bilong Wok Autim Tok long Yunaitet Stets, ol i mekim ol inteviu wantaim ol memba bilong Komiti Bilong Brens long olgeta hap. Ol dispela man i stori long ol hevi i save painim ol nupela misineri, na ol i skelim ol samting i bin painim ol yet na ol i givim sampela gutpela tok bilong helpim ol sumatin. Sampela hevi olsem em sindaun bilong ol man i narapela kain, san i hat, na tingting bilong ol man long ol samting bilong lotu na wok politik i narapela kain. Wanem samting inap helpim ol nupela misineri long stap gut long nupela hap ol i go long en? Pasin bilong laikim Jehova, laikim ol man, no ken tingim bek ol samting ol i bin lusim, na no ken hariap long mekim samting. Wanpela memba bilong komiti bilong brens i tok: “Ol manmeri long hap mipela i go long en, ol i bin stap long dispela hap inap planti handet handet yia paslain long mipela. Mipela tu inap stap long hap na lain long dispela ples. Taim mipela i bungim ol hevi, mipela i tingim ol olsem rot bilong mekim pasin bilong mipela i kamap gutpela moa. Yupela beten na larim spirit bilong Jehova i helpim yupela, na bai yupela i lukim olsem tok bilong Jisas em i tru olgeta, em i bin tok, ‘Mi save stap wantaim yupela.’ ”—Matyu 28:20.
Samuel Herd, em wanpela memba bilong Gavening Bodi, em i kamapim tok bilong pinisim program, “Toktok Yet Long Ol Strongpela Wok Bilong God.” Taim holi spirit i kam daun long Pentikos 33 C.E., dispela i bin strongim ol disaipel bilong Jisas long tokaut long “ol strongpela wok bilong God.” Wanem samting inap helpim ol nupela misineri long nau long givim bel long tokaut long Kingdom Bilong God? Em dispela wankain holi spirit. Brata Herd i strongim ol sumatin long ‘larim holi spirit i kirapim ol,’ na amamas long asainmen bilong ol, na ol i no ken lusim tingting long skul ol i bin kisim. (Rom 12:11) Brata Herd i tok: “Baibel em i wanpela strongpela samting bilong God. No ken daunim strong bilong en. Tok bilong en i gat laip. Em i kamapim klia tru as bilong ol samting. Mekim wok long en long stretim ol samting long i stap bilong yupela. Larim em i senisim tingting bilong yu. Lukautim gut tingting bilong yu long rot bilong stadi, ritim, na skelim ol Skripsa long bel . . . Putim mak na tingting strong long yusim skul yu bin kisim long Gileat long toktok yet long ‘ol strongpela wok bilong God.’ ”
Bihain long ol i harim gude bilong ol manmeri long ol narapela kantri na ol sumatin i kisim pinis setifiket bilong ol, wanpela sumatin i ritim wanpela pas em klas i raitim bilong tok tenkyu long skul ol i bin kisim. Bilong pinisim dispela bung, Brata Lett i kamapim tok bilong 2 Stori 32:7 na Lo 20:1, 4. Em i kamapim gen ol tok em i bin mekim long kirap bilong program: “Olsem na ol gutpela sumatin, tingim gut dispela samting taim yupela i go, taim yupela i mats i go bilong mekim pait bilong spirit long ol nupela asainmen bilong yupela, Jehova bai mats i go wantaim yupela. No ken lusim tingting olsem i gat bikpela lain moa bilong helpim yupela, winim ol lain i birua long yupela.”
[Blok long pes 25]
OL SAMTING BILONG OL SUMATIN
Hamas kantri ol i kam long en: 7
Hamas kantri ol bai go long en: 17
Hamas sumatin: 48
Krismas bilong ol, averes: 33.7
Hamas yia long tok i tru, averes: 17.8
Hamas yia long fultaim sevis, averes: 13.5
[Piksa long pes 26]
Klas Namba 115 Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.