Yu Inap Bilip Long Ol Tok Promis Bilong Husat?
“OL TOK promis bilong em i gat strong, wankain olsem strong i bin stap long em; tasol ol wok bilong em i samting nating, wankain olsem nau em i stap.”—King Henry the Eighth, em William Shakespeare i bin raitim.
Ol strongpela tok promis em Shakespeare i stori long en, em bilong Kadinal Thomas Wolsey bilong Inglan, em i bin holim bikpela strong long wok politik namel long yia 1500 na 1530. Ating sampela bai tok, dispela tok bilong Shakespeare i stret tu long planti tok promis ol i save harim long nau. Ol bikman i mekim planti tok promis, tasol planti tok bilong ol, ol i no save truim. Olsem na ol man i no save bilip tumas long olgeta tok promis.
Planti Tok Promis i Lus Nating
Long taim bilong bikpela pait bilong Bolkan long 1993 samting, Sekiuriti Kaunsil Bilong Yunaitet Nesen i tokaut olsem taun Srebrenica long Bosnia em “ples ol man i ken i stap gut na no gat birua.” I olsem ol man inap bilip long dispela tok promis bilong ol lain insait long Yunaitet Nesen. Planti tausen refiuji Muslim long Srebrenica i ting olsem. Tasol dispela promis i no gat as bilong en. (Song 146:3) Long Julai 1995, ami bilong ol birua i kam rausim ol ami bilong Yunaitet Nesen i go na ol i kisim dispela taun. Inap 6,000 Muslim ol i lus nating, na ol i kilim i dai olsem 1,200 Muslim em ol i no insait long ami.
Tru tumas, ol man i save brukim planti tok promis long olgeta kain samting. Ol kampani i save putim “planti toksave bilong grisim ol man long baim ol samting, tasol planti toksave ol i giaman tasol,” na ol man i pilim olsem ol i bin giamanim ol tru. Na ol i bel hevi long “planti lain politik i save brukim ol tok promis ol i mekim long taim bilong eleksen.” (The New Encyclopædia Britannica, Volium 15, pes 37) Ol bikman bilong lotu i save tok promis long lukautim lain bilong ol na ol man i save bilip long ol, tasol ol i save mekim pasin nogut tru long ol dispela lain. Na long ol wok olsem ediukesen na wok dokta samting, yumi ting pasin sori na pasin bilong tingim ol man i kirapim ol long mekim dispela wok, tasol sampela bilong ol tu i bin giamanim ol man em ol i gat wok long lukautim na ol i bin bilip long ol, na ol i mekim nogut tru long ol na sampela ol i kilim ol i dai. Olsem na Baibel i tok yumi no ken bilip long olgeta tok!—Sindaun 14:15.
Ol Tok Promis Ol i Save Truim
Tru, planti man i save truim ol tok promis bilong ol, maski dispela i givim bikpela hevi long ol yet. (Song 15:4) Ol man inap bilip tru long tok promis bilong ol, na ol i save truim dispela tok. Sampela i gat laik tru long ol i mas truim tok promis ol i bin tingim gut na mekim. Ol i redi na ol i gat laik long mekim ol samting ol i bin promis long en, tasol ol i no inap tru long mekim. Maski man i gat tingting long mekim ol gutpela samting tru, sampela taim ol samting i save kamap bilong pasim rot bilong em.—Saveman 9:11.
Tasol maski i gat wanem as, planti man i save hatwok long bilipim tok bilong olgeta man. Olsem na yumi laik save: I gat sampela tok promis yumi inap bilip long en? I gat. Yumi inap bilip long ol tok promis bilong Baibel. Plis skelim stori i kamap bihain long dispela, em i toktok long dispela samting. Ating bai yu kisim wankain tingting olsem planti milion manmeri i kisim pinis, olsem yumi inap bilip tru long ol tok promis bilong God.
[Piksa Kredit Lain long pes 3]
AP Photo/Amel Emric