Go Klostu Long God
Man Bilong Inapim Ol Promis
OLSEM WANEM? Em hatwok long yu trastim ol narapela? Sori tru, yumi stap long graun we ol samting ol man i mekim i wok long bagarapim pasin bilong trastim ol narapela. Sapos wanpela yu save trastim em i bagarapim bel bilong yu—ating em i tok giaman o i no inapim tok promis bilong em—dispela inap mekim na yu pret long trastim ol narapela. Tasol i gat wanpela man em yu inap trastim na em i no inap bagarapim bel bilong yu. Sindaun 3:5 i tokim yumi: “Yu mas bilip strong long Bikpela.” I gat wanem as na yumi mas bilip strong long Bikpela? Bilong bekim dispela askim, yumi ken skelim tok bilong Josua—em man husat i bilip strong long Jehova—tok bilong em i stap long Josua 23:14.
Tingim samting i bin kamap. Klostu nau Josua, em man bilong kisim ples bilong Moses olsem lida bilong Israel, em bai kisim 110 krismas. Em i stap laip longpela taim na em i bin lukim long ai ol bikpela wok Jehova i bin mekim bilong helpim ol Israel, na tu, em i lukim mirakel Jehova i bin wokim bilong helpim ol Israel long abrusim bagarap long solwara Retsi, winim 60 yia bipo. Nau Josua i tingim bek laip bilong em na em i singautim “ol hetman na ol lida na ol bikman na ol ofisa” bilong Israel. (Josua 23:2) Tok em i mekim i no kamapim tasol savetingting bilong man i gat bikpela krismas, nogat, em i kamapim tu olsem Josua i gat strongpela bilip.
Josua i tok: “Klostu nau bai mi lusim yupela.” Em i save olsem em bai i dai, olsem na inap planti aua em i stap wanpis na tingim tingim ol samting i bin kamap long laip bilong em. Taim em i laik i dai, em i givim wanem tok long ol wanlotu bilong em?
Em i tok moa: “Olgeta samting [Bikpela] i bin promis long mekim, ol i kamap pinis, na i no gat wanpela promis i popaia.” Em tok bilong man husat i gat strongpela bilip long God. Wanem as bilong strongpela bilip bilong em? Josua i tingim bek olgeta samting em i bin lukim, na em i kisim save olsem Jehova i save inapim olgeta tok promis bilong Em—long olgeta taim.a Tok bilong Josua i klia tru: Em i laik bai ol wantok Israel i mas i gat strongpela bilip olsem olgeta tok promis bilong Jehova long ol samting bai painim ol bihain, olgeta dispela promis tu bai kamap tru.
Wanpela dikseneri bilong Baibel i stori long tok bilong Josua 23:14 olsem: “Kamapim olgeta tok promis bilong Baibel; orait skelim ol stori bilong ol samting i bin kamap long dispela graun; na kisim save long olgeta samting i stap long en, bilong painim wanpela tok promis em God i bin kalapim o em i bin lusim tingting long en.” Sapos yumi inap mekim kain wok painimaut olsem, yumi bai kisim wankain save olsem Josua i bin kisim—i no gat wanpela promis bilong Jehova i save popaia, olgeta i save kamap tru.—1 King 8:56; Aisaia 55:10, 11.
Baibel i stori long ol tok promis bilong God em ol i bin kamap tru pinis, sampela bilong ol em ol i wok long kamap tru long nau. Na tu, Baibel i gat ol gutpela tok promis bilong Jehova long ol samting bai kamap bihain.b I gutpela sapos yu yet i skelim ol dispela stori. Taim yu stadi long Baibel, ating dispela bai strongim yu olsem yu inap tru long trastim dispela Man Bilong Inapim ol tok promis.
[Ol Futnot]
a Sampela bilong ol tok promis em Josua i bin lukim ol i bin kamap tru, em olsem: Jehova i givim lain Israel wanpela hap graun bilong ol yet. (Skelim Stat 12:7 wantaim Josua 11:23.) Jehova i kisim bek ol Israel na ol i lusim Isip. (Skelim Kisim Bek 3:8 wantaim Kisim Bek 12:29-32.) Jehova i lukautim lain bilong em long kaikai samting.—Skelim Kisim Bek 16:4, 13-15 wantaim Lo 8:3, 4.
b Bilong kisim sampela save moa long ol tok promis bilong God long ol samting bai kamap bihain, lukim sapta 3, 7, na 8 bilong buk Tru Tru Baibel i Tok Wanem?, em ol Witnes Bilong Jehova i wokim.