Taim Laik Bilong God i Kamap Long Graun

TAIM Jisas i skulim ol disaipel long beten, “Mipela i mas bihainim laik bilong yu long graun olsem ol i save bihainim long heven,” em i mekim tok olsem wanpela man i bin stap long heven wantaim Papa. (Matyu 6:10; Jon 1:18; 3:13; 8:42) Jisas i bin stap long heven long taim olgeta samting i kamap long heven na long graun i stret wantaim laik bilong God. Dispela em i taim bilong amamas long mekim ol gutpela wok na belgut long en.​—⁠Sindaun 8:​27-31.

Ol namba wan lain God i bin wokim, em ol spirit, olsem ‘ol ensel bilong Bikpela, ol i gat bikpela strong na ol i save bihainim tok bilong en.’ Bipo na long nau tu, ol i “wokman bilong Bikpela” na ol “i save bihainim laik bilong em.” (Song 103:​20, 21) Olsem wanem? Ol i gat laik bilong ol yet? Ol i gat. Na taim God i wokim graun, dispela “ol ensel i amamas na singaut.” (Jop 38:⁠7) Singaut bilong ol i kamapim amamas bilong ol long samting God i bin mekim bilong kamapim laik bilong em, na ol i mekim laik bilong ol i stret wantaim laik bilong em.

Taim God i wokim pinis graun, em i redim bilong putim ol manmeri long en, na bihain em i wokim namba wan man na meri. (Stat, sapta 1) Yu ting dispela wok tu em inap long ol i ken singaut na amamas long en? Baibel i tok: “God i lukim olgeta dispela samting i gutpela, na em i amamas tru.” Em nau, ol samting em i wokim i gutpela olgeta.​—⁠Stat 1:⁠31.

God i gat wanem laik long tupela tumbuna bilong yumi bilong pastaim na ol pikinini bilong tupela? Olsem Stat 1:28 i tok, dispela tu em i gutpela tru: “[God] i tokim ol olsem, ‘Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.’ ” Bilong inapim tru dispela gutpela wok bilong ol, tupela tumbuna bilong yumi ol i mas i stap laip i go i go​—⁠inap oltaim oltaim​—⁠na ol pikinini bilong ol tu. I no gat wanpela tok i makim olsem bagarap, o pasin bilong daunim ol, o bel hevi, o indai bai painim ol, nogat.

Long dispela taim bipo ol i bin mekim laik bilong God long heven na long graun tu. Ol lain i bihainim laik bilong em ol bai kisim bikpela amamas long mekim. Orait wanem samting i kamap na dispela pasin i pinis?

Wanpela bikpela tok i kamap bilong daunim laik bilong God. Tru, em i no samting God i no inap stretim. Tasol dispela i kirapim wanpela bikpela haptaim bilong bel hevi na em bai mekim na ol man i longlong na i no klia long laik bilong God long ol manmeri. Yumi olgeta i bin kisim hevi long dispela. Wanem dispela bikpela tok i bin kamap?

Laik Bilong God Long Taim Bilong Bikhet

Wanpela ensel bilong God i lukim olsem em i gat rot long paulim laik bilong God long ol man, na em i tingting long mekim ol samting bilong helpim em yet. Ensel i tingim tingim i go na dispela tingting i kamap strong na em i ting em inap mekim tru, na dispela samting i gutpela long em. (Jems 1:​14, 15) Ating em i bin tingting olsem, sapos em inap pulim namba wan man na meri long harim tok bilong em na maski long harim tok bilong God, orait nau God i mas larim narapela i stap king olsem em. Ating em i tingting olsem God i no ken kilim i dai tupela, long wanem, dispela bai makim olsem God i lus pinis long kamapim samting em i tingting pinis long mekim, olsem na Jehova i mas senisim laik bilong em na larim dispela ensel i holim namba em i laikim, na ol man bai bihainim tok bilong em. Bihain dispela bikhet ensel i kisim nem Satan, olsem Birua.​—⁠Jop 1:⁠6.

Orait nau Satan i kamap long meri. Em i tokim meri long sakim laik bilong God na bosim wokabaut bilong em yet. Satan i tok: “Yutupela i no inap i dai. . . . Bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God.” (Stat 3:​1-5) Long tingting bilong meri, dispela em i rot bilong kamap fri, na em i orait long bihainim dispela rot em i ting i gutpela moa. Bihain, em i pulim man bilong em na man i bihainim em.​—⁠Stat 3:⁠6.

Tasol dispela i no laik bilong God long tupela. Em i laik bilong tupela yet. Na dispela bai kamapim bikpela hevi tru long ol. God i tokim ol pinis, sapos ol i bikhet long em bai ol i dai. (Stat 3:⁠3) God i no wokim tupela na bai ol i ken bosim ol yet na i stap gutpela. (Jeremaia 10:23) Na tu, sin bai mekim na skin bilong tupela bai i no gutpela olgeta, na dispela sin na dai bai kalap long ol pikinini bilong tupela. (Rom 5:12) Satan i no inap senisim ol dispela samting.

Yu ting ol dispela samting i kamap i senisim laik bilong God long ol man na dispela graun? Nogat. (Aisaia 55:​9-11) Tasol ol i kamapim sampela bikpela tok em God i mas stretim. Olsem wanem? I tru ol manmeri inap “kamap wankain olsem God” na “save long wanem samting i gutpela, na wanem samting i nogut,” olsem Satan i bin tok? Olsem: Sapos yumi gat bikpela haptaim, yu ting bai yumi yet inap kisim save long wanem samting i stret na wanem samting i no stret, na wanem samting bai helpim yumi na wanem samting bai nogutim yumi? Yu ting i stret yumi mas bihainim olgeta tok bilong God, long wanem, pasin bilong em long bosim ol man i gutpela moa? Olsem wanem? I stret yumi bihainim laik bilong em? Bai yu bekim ol dispela askim olsem wanem?

I gat wanpela rot tasol bilong stretim ol dispela bikpela tok long ai bilong olgeta ensel na olgeta man. God i mas larim ol lain husat i laik bosim wokabaut bilong ol yet long mekim olsem na traim long kisim gutpela sindaun long dispela rot. Sapos God i kilim ol i dai, dispela i no inap stretim ol tok i bin kamap. Tasol sapos em i larim ol man i stap pastaim, dispela bai stretim dispela bikpela tok, long wanem, ol hevi i kamap long pasin bilong bosim ol yet, em bai stap ples klia. God i bin makim olsem em bai stretim dispela tok long dispela rot taim em i tokim meri olsem em bai karim ol pikinini. Long dispela rot ol lain famili bai kamap long graun. Olsem na long nau yumi i stap!​—⁠Stat 3:​16, 20.

Tasol i no olsem God bai larim ol man na dispela bikhet ensel i mekim olgeta samting ol i laikim, nogat. God i no lusim wok king bilong em, na ol samting em i tingting pinis long mekim, em i no lusim. (Song 83:18) Em i kamapim klia dispela samting taim em i tok profet olsem bihain em bai bagarapim ensel i bin kamapim dispela pasin bikhet na pinisim olgeta hevi dispela pasin i bin kamapim long graun. (Stat 3:15) Olsem na kirap long dispela taim bipo ol manmeri bilong graun i bin kisim tok promis olsem ol hevi bai pinis.

Orait pasin tupela tumbuna bilong yumi long pastaim i bihainim i mekim na tupela wantaim olgeta lain pikinini bilong ol long bihain ol i no stap moa aninit long wok king bilong God. Tasol sapos God i laik pasim ol hevi bai kamap long dispela rot tupela i laik bihainim, em i mas subim ol long bihainim laik bilong em long olgeta samting. Sapos em i mekim olsem, em nau, i olsem em i no larim ol i traim pasin bilong bosim wokabaut bilong ol yet.

Tru, ol wan wan man yet inap makim olsem ol i laik i stap aninit long wok king bilong God. Ol i ken kisim save olsem God i gat wanem laik long ol manmeri insait long dispela taim, na ol i ken bihainim dispela laik inap tru long mak ol inap winim. (Song 143:10) Tasol ol hevi bai painim ol, long wanem, insait long dispela taim God i no stretim yet dispela tok olsem ol man inap bosim wokabaut bilong ol yet.

Ol samting i kamap long pasin bilong bihainim wanem rot ol yet i makim, em i kamap klia hariap. Namba wan pikinini bilong Adam tupela Iv, em Kein, em i kilim i dai brata bilong em Abel, long wanem, “pasin bilong en em i nogut, na pasin bilong brata bilong en em i stretpela.” (1 Jon 3:12) Dispela i no laik bilong God, long wanem, God i bin givim tok lukaut long Kein na bihain God i givim strafe long em. (Stat 4:​3-12) Kein i laik bosim wokabaut bilong em yet olsem Satan i tokim ol long mekim, olsem na “em i man bilong Satan.” Sampela man moa i mekim olsem.

Orait ol man i stap inap 1,500 yia samting long graun na “God i lukim pasin bilong ol arapela manmeri i nogut tru. Long olgeta hap bilong graun ol i wok long pait na bikhet tasol.” (Stat 6:11) God i mas kirap mekim sampela samting bambai ol man i no ken bagarapim graun. Olsem na God i mekim bikpela tait wara i kamap na em i lukautim dispela wanpela stretpela famili tasol i stap laip yet, em Noa, meri bilong em, 3-pela pikinini man bilong em, na ol meri bilong ol. (Stat 7:⁠1) Yumi olgeta i tumbuna pikinini bilong ol.

I kam inap long nau, God i bin soim rot long ol man i gat laik tru long save long laik bilong em. Em i kirapim ol man husat i stap gut long em long raitim ol tok bilong em bilong helpim ol man husat i laik bai em i soim rot long ol. Ol dispela tok i stap long Baibel. (2 Timoti 3:16) Long pasin sori em i larim ol man husat i stap gut long em long ol i ken pas gut wantaim em, na tu, ol i ken kamap pren bilong em. (Aisaia 41:⁠8) Na em i bin givim strong long ol bambai ol inap karim ol bikpela hevi i bin painim ol manmeri insait long ol dispela planti tausen yia ol man i bosim wokabaut bilong ol yet. (Song 46:1; Filipai 4:13) Yumi ken tenkyu tru long ol dispela samting!

‘Ol i Mas Bihainim Laik Bilong Yu’​—⁠Olgeta

Ol samting God i mekim pinis inap long nau, dispela tasol em i no laik bilong em long ol man, nogat. Aposel Pita i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Dispela tok piksa i toktok long wanpela nupela gavman bai bosim ol man na wanpela nupela lain i stap aninit long dispela gavman.

Profet Daniel i tokaut klia olsem: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. . . . Em bai i daunim ol [dispela kingdom] na bagarapim ol arapela king na kingdom bilong en bai i stap oltaim.” (Daniel 2:44) Dispela tok profet i makim olsem dispela pasin i stap nau long graun na i no wok gut, em bai pinis olgeta na Kingdom, o gavman, bilong God bai kisim ples bilong en. Dispela em i gutpela nius tru! Ol dispela pait na pasin bilong ol man long tingim ol yet tasol, dispela i mekim na pasin bilong bagarapim man i go bikpela tru long nau na i luk olsem em bai bagarapim gen graun, tasol bihain ol dispela pasin nogut bai pinis olgeta na yumi no tingim moa.

Wanem taim ol dispela samting bai kamap? Ol disaipel bilong Jisas i askim em: “Wanem taim bai ol dispela samting i kamap, na wanem mak bai kamap bilong makim olsem yu kam i stap na pasin bilong dispela graun i laik pinis?” Hap bekim bilong Jisas i olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”​—⁠Matyu 24:3 (NW ), 14.

Olgeta lain i save, dispela wok bilong autim tok long olgeta hap bilong graun i wok long kamap long nau. Ating yu lukim dispela wok i kamap long hap bilong yu yet. Long buk These Also Believe, Profesa Charles S. Braden i tok: “Ol Witnes Bilong Jehova i bin inapim olgeta hap bilong graun long wok bilong ol long autim tok. . . . I no gat narapela lain bilong lotu long dispela graun i strong tru long autim gutnius bilong Kingdom long olgeta hap olsem ol Witnes Bilong Jehova.” Ol Witnes i save autim tok long 235 kantri samting na long 400 tok ples. Dispela wok em Baibel i tok profet long en, bipo ol i no bin mekim long olgeta hap olsem nau ol i mekim. Em wanpela bilong planti mak i soim olsem klostu nau dispela Kingdom bai senisim ol gavman bilong ol man.

Dispela Kingdom Jisas i tok ol bai autim tok bilong en, em dispela Kingdom tasol Jisas i skulim yumi long beten long en, olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Tru tumas, long rot bilong dispela Kingdom God bai kamapim tru ol samting em i tingting pinis long mekim, olsem laik bilong em, long ol manmeri na long dispela graun.

Wanem samting bai kamap? Kamapim Tok Hait 21:​3, 4 i bekim dispela askim, olsem: “Long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.’ ” Tru tumas, long dispela taim laik bilong God bai kamap olgeta long graun na long heven.a Yu laik insait long en?

[Futnot]

[Piksa long pes 5]

Ol i no bihainim laik bilong God na dispela i kamapim bikpela hevi tru