Yu Inap Mekim God i Belgut Tru
OLSEM WANEM? Pasin bilong yumi inap mekim sampela samting long God? God inap belgut? Sampela i ting God em i wanpela strong tasol. Sapos olsem, yu ting wanpela strong inap pilim amamas? Nogat tru. Orait, tingim sampela tok em Baibel i mekim long God.
Jisas Krais i tok: “God em i Spirit.” (Jon 4:24) Ol spirit i narapela kain tru long yumi man bilong graun. Ai bilong ol man i no inap lukim ol spirit, tasol ol spirit i gat bodi—em “bodi bilong heven.” (1 Korin 15:44; Jon 1:18) Sampela taim Baibel i mekim sampela tok piksa na i tok God i gat ai, yau, han, na kain samting olsem.a Na tu, God i gat nem—em Jehova. (Song 83:18, NW ) Olsem na God bilong Baibel em i wanpela man tru i gat bodi spirit. (Hibru 9:24, NW ) “[Em i] God bilong i stap oltaim, na oltaim bai [em i] stap king.”—Jeremaia 10:10.
Jehova em i wanpela man i stap tru, na em inap tingting na mekim wok. Em i gat ol pasin na filings, ol samting em i laikim na ol samting em i no laikim. I gat planti tok long Baibel i kolim ol samting em i amamas long en o bel hevi long en. Ol god ol man i bin wokim na ol piksa bilong lotuim, ol i kamapim ol pasin em ol man i bin wokim ol i as bilong en, tasol God Jehova i gat olgeta strong, em yet i As bilong ol pasin em i bin putim long man.—Stat 1:27; Aisaia 44:7-11.
Jehova em i man bilong “amamas.” (1 Timoti 1:11) Em i save amamas long ol samting em i bin wokim, na tu, em i kisim amamas long kamapim ol laik bilong em. Long maus bilong profet Aisaia, Jehova i tok: “Sapos mi laik mekim wanpela samting, orait mi save mekim tasol. . . . Ol samting mi makim pinis bilong mekim, em bai mi mekim.” (Aisaia 46:9-11) Man bilong raitim song i tok: “Bikpela i ken amamas long olgeta samting em i bin wokim.” (Song 104:31) Tasol i gat narapela samting i givim amamas long God. Em i tok: “Pikinini bilong mi, yu mas kisim gutpela tingting na save na bai mi belgut tru.” (Sindaun 27:11) Tingim—yumi inap mekim God i belgut tru!
Rot Bilong Mekim God i Belgut Tru
Tingim olsem wanem pasin bilong Noa i bin mekim Jehova i belgut tru. Jehova i “amamas long Noa,” long wanem, “wokabaut bilong en i stret long ai bilong God.” Noa i narapela kain tru long ol man nogut long dispela taim. Pasin bilong em long bilip na bihainim tok em samting God i amamas tru long en, olsem na Noa i kamap “pren tru bilong God.” (Stat 6:6, 8, 9, 22) “Noa i bilip long God . . . na em i wokim wanpela sip. Na em wantaim meri pikinini bilong en ol i go insait long sip na ol i stap gut, na ol i no bagarap.” (Hibru 11:7) Jehova i amamas long Noa na em i helpim em na famili bilong em long abrusim bagarap.
Abraham tu i save gut long filings bilong Jehova. Dispela samting i kamap ples klia taim Jehova i tokim Abraham olsem Sodom na Gomora bai bagarap, long wanem, pasin bilong ol i nogut tru. Abraham i save gut long Jehova, olsem na em i save olsem God i no ken bagarapim stretpela man wantaim man nogut. (Stat 18:17-33) Planti yia bihain, Abraham i bihainim tok bilong Jehova long “givim Aisak long God” olsem ofa. Em “i tingting olsem, ‘Sapos Aisak i dai, maski, God em inap long kirapim em bek.’ ” (Hibru 11:17-19; Stat 22:1-18) Abraham i pilim tru tingting bilong God na em i kamapim strongpela bilip na pasin bilong bihainim tok, olsem na “God i kolim Abraham, ‘Pren bilong mi.’ ”—Jems 2:23.
Narapela man i wok long mekim God i belgut tru em King Devit bilong Israel bilong bipo. Jehova i tok long em olsem: “Mi lukim pinis Devit, pikinini bilong Jesi, na bel bilong mi i laikim dispela man. Em bai i bihainim olgeta laik bilong mi.” (Aposel 13:22) Taim Devit i mas pait wantaim traipela man Goliat, Devit i bilip strong long God na em i tokim King Sol bilong Israel olsem: “Bikpela i bin helpim mi, olsem na ol laion na bea i no bin bagarapim mi. Na nau tu em bai i helpim mi, na dispela Filistia bai i no inap kilim mi i dai.” Devit i bilip strong long God, olsem na Jehova i mekim gut long Devit na helpim em long kilim Goliat i dai. (1 Samuel 17:37, 45-54) Devit i laik bai ol wok na ‘ol tok na ol tingting bilong em i ken i orait long ai bilong Bikpela.’—Song 19:14.
Olsem wanem long yumi? Olsem wanem yumi inap mekim Jehova i amamas long yumi? Sapos yumi lain na kisim save long filings bilong God, yumi bai save gut long ol samting yumi ken mekim na bai God i belgut tru. Olsem na taim yumi ritim Baibel, i bikpela samting long yumi mas wok strong long kisim save long filings bilong God na bai yumi ‘ken save gut tru long laik bilong em. Na bai Holi Spirit i ken givim yumi olkain gutpela save na tingting, na dispela i ken pulap tru long yumi. Olsem bai yumi inap wokabaut long pasin bilong ol manmeri tru bilong Bikpela, na bai em i laikim olgeta pasin bilong yumi.’ (Kolosi 1:9, 10) Save yumi kisim bai helpim yumi long strongim bilip. Dispela em i bikpela samting, long wanem, “man i no bilip long God, em i no inap bihainim laik bilong God.” (Hibru 11:6) Yes, long rot bilong strongim bilip na bihainim laik bilong Jehova, yumi inap mekim em i belgut tru. Tasol yumi mas was gut, nogut yumi mekim na Jehova i bel hevi.
No Ken Mekim God i Bel Hevi
Ol manmeri long taim bilong Noa i bin mekim Jehova i bel hevi tru. “Long olgeta hap bilong graun ol [manmeri] i wok long pait na bikhet tasol. [God] i lukim pasin nogut i kamap long olgeta hap bilong graun. Em i no lukim wanpela gutpela lain manmeri i stap. Nogat. Olgeta lain manmeri i wok long mekim ol pasin nogut tasol.” God i pilim olsem wanem taim em i lukim pasin pamuk na pait na bikhet? Baibel i tok: “Bikpela i ting i gutpela sapos em i no bin wokim ol manmeri. Na em i bel hevi tru.” (Stat 6:5, 6, 11, 12) God i gat dispela tingting, long wanem, pasin bilong ol man i stap paslain long taim bilong Bikpela Tait i bin kamap nogut tru na nau em i mas senisim tingting bilong em long ol. Em i no ken stap moa olsem Man Bilong Wokim ol, nau em i mas kamap olsem man bilong bagarapim ol.
Na tu, Jehova i bel hevi taim lain bilong em yet, lain Israel bilong bipo, i wok long givim baksait long gutpela rot em i bin soim long ol na ol i no tingim filings bilong em. Man bilong raitim song i tok: “Planti taim ol i bikhet na ol i sakim tok bilong em long ples drai. Na planti taim ol i mekim em i bel hevi. Ol i no lusim pasin bilong traim God bilong Israel, em God bilong mekim gutpela na stretpela pasin olgeta. Ol i traim em na mekim em i kros tru long ol.” Tasol “God i marimari long ol na rausim sin bilong ol, na em i no bagarapim ol. Planti taim em i pasim kros bilong em, na em i no belhat long ol.” (Song 78:38-41) Na maski ol bikhetman Israel i karim hevi bilong ol rong bilong ol, “Bikpela tu i . . . karim pen na hevi wantaim ol.”—Aisaia 63:9.
Maski planti taim God i kamapim olsem em i sori long ol manmeri bilong Israel, ol “i wok long tok bilas long ol man God i salim i kam long ol, na ol i ting tok bilong ol i samting nating, na ol i wok long rabisim ol dispela profet. Olsem na Bikpela i les tru long ol manmeri bilong en na i belhat moa yet long ol, na ol i no inap abrusim bagarap em i laik salim i kam long ol.” (2 Stori 36:16) Pasin bikhet bilong ol i “mekim spirit bilong en i bel hevi tru” olsem na bihain Jehova i no orait moa long ol. (Aisaia 63:10) Wanem samting i kamap long dispela? God i no lukautim ol moa, na samting nogut i painim ol taim ol Babilon i kam na daunim Juda na bagarapim Jerusalem. (2 Stori 36:17-21) Em nau, samting nogut i save kamap taim ol man i makim rot nogut long bihainim, em rot i mekim Man Bilong Wokim ol i bel hevi tru!
Baibel i tokaut klia olsem God i karim bikpela pen na hevi taim ol man i mekim pasin nogut. (Song 78:40, 41) Sampela pasin i nogut tru long ai bilong God em pasin antap, tok giaman, kilim man i dai, majik, pasin bilong glasman, lotuim ol tumbuna, pasin pamuk, pasin sodom, bagarapim marit, mekim maritpasin wantaim wanblut tru, daunim ol man i stap rabis.—Wok Pris 18:9-29; 19:29; Lo 18:9-12; Sindaun 6:16-19; Jeremaia 7:5-7; Malakai 2:14-16.
Wanem tingting bilong Jehova long pasin bilong lotuim piksa? Kisim Bek 20:4, 5 i tok: “Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em.” Bilong wanem? Long wanem piksa bilong lotu em samting Jehova “i no laikim tru.” (Lo 7:25, 26) Aposel Jon i tok: “Ol liklik pikinini bilong mi, yupela i mas i stap longwe long olgeta giaman god.” (1 Jon 5:21) Na aposel Pol i tok: “Ol pren tru bilong mi, yupela i mas i stap longwe long pasin bilong lotu long ol giaman god.”—1 Korin 10:14.
Mekim Ol Samting na Bai God i Orait Long Yu
God “i stap wanbel tru wantaim ol man i save wokabaut stret.” “Em i amamas long ol man i save wokabaut stret.” (Sindaun 3:32; 11:20) Tasol ol man i wok long bikhet na sakim stretpela filings bilong em, liklik taim ol bai kisim pe nogut. (2 Tesalonaika 1:6-10) Tru tumas, i no longtaim na em bai pinisim olgeta pasin nogut i save kamap bikpela long nau.—Song 37:9-11; Sefanaia 2:2, 3.
Tasol Baibel i kamapim klia olsem Jehova “i no laik bai wanpela man i lus. Em i laik bai olgeta man i mas tanim bel.” (2 Pita 3:9) Em i laik bai em i ken kamapim sori bilong em long ol stretpela man ol i laikim em tumas; em i no laik bai em i mas kamapim belhat bilong em long ol man i strong long bihainim sin. Jehova i no amamas “long taim ol man bilong mekim sin, ol i dai. [Em i] save amamas long ol dispela man i givim baksait long pasin bilong sin na ol i stap gut.”—Esekiel 33:11.
Em nau, i no olsem man i no gat rot na em i mas kisim belhat bilong Jehova, nogat. “Bikpela em i save sori moa yet long yumi, na oltaim em i save marimari long yumi.” (Jems 5:11) Yumi ken bilip tru olsem ‘God i save wari long yumi. Olsem na olgeta hevi yumi karim, yumi mas putim long han bilong en.’ (1 Pita 5:7) Ol man i mekim God i belgut tru, God bai orait long ol na ol i ken tingting long kamap pren bilong em. Olsem na nau, winim olgeta taim bipo, yumi mas “trai long kisim save long ol pasin Bikpela i save laikim.”—Efesus 5:10.
Em i gutpela samting tru God i bin tingim yumi na kamapim ol gutpela pasin na filings bilong em! Na yu yet inap mekim em i belgut tru. Sapos yu gat laik, mipela i laik kirapim yu long toktok wantaim ol Witnes Bilong Jehova long hap bilong yu. Ol bai amamas long soim yu ol samting i bin helpim ol yet long mekim ol pasin God i save laikim.
[Futnot]
a Lukim blok “Bilong Wanem Baibel i Stori Long God Olsem Em i Wanpela Man?”
[Blok long pes 7]
Bilong Wanem Baibel i Stori Long God Olsem Em i Wanpela Man?
“God em i Spirit,” olsem na yumi no inap lukim em long ai tru. (Jon 4:24) Olsem na bilong helpim yumi long save gut long God, long bikpela strong na ol wok bilong em, Baibel i mekim sampela tok piksa na i stori long God olsem em i wanpela man. Tru, yumi no save bodi spirit bilong God i luk olsem wanem, tasol Baibel i stori long God olsem em i gat maus, nus, ai, yau, han, lek, na bel.— Josua 7:26; Jop 30:20; Song 18:8, 9, 16.
Tasol ol dispela tok i no makim olsem bodi spirit bilong God i gat ai tru na yau tru na han tru olsem yumi man, nogat. Em tok piksa tasol. Ol i bilong helpim ol man long save gut long God. Sapos Baibel i no mekim wok long ol dispela tok piksa, yumi ol man bilong graun bai i hatwok tru long save long God. Tasol dispela i no makim olsem ol man i as bilong ol pasin em Baibel i tok i bilong God Jehova, nogat. Baibel i tok klia, God i wokim ol manmeri i kamap olsem em yet—God i no bin kamap olsem man yet, nogat. (Stat 1:27) “Spirit bilong God” i bin kirapim ol man long raitim Baibel, olsem na taim ol i stori long ol pasin bilong God, ol i kamapim stori God yet i bin mekim long ol pasin bilong em—em ol pasin God i bin putim long man em i wokim. (2 Timoti 3:16, 17) Olsem na ol dispela pasin bilong God ol i no pasin ol man i bin givim long God, nogat; em ol pasin God yet i bin givim long ol.
[Piksa long pes 4]
Noa i mekim ol samting na God i orait long em
[Piksa long pes 5]
Abraham i pilim tru tingting bilong God
[Piksa long pes 6]
Devit i bilip tru long Jehova
[Piksa long pes 7]
Taim yu ritim Baibel, yu ken lain long pasin bilong mekim God i belgut tru
[Piksa Kredit Lain long pes 4]
Courtesy of Anglo-Australian Observatory, photograph by David Malin