Mekim Gutpela Pasin Long Taim Bilong Hevi
APOSEL Pol i tok: “Taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) Ol Witnes Bilong Jehova long olgeta hap i wok long bihainim dispela stiatok long laip bilong ol, olsem mekim gutpela pasin long olgeta man, tasol ol i mekim moa yet long ol wanbilip bilong ol. Planti taim ol man inap lukim dispela pasin bilong ol long taim bilong hevi. Orait, yumi ken stori long ol samting i bin kamap long tripela kantri.
Long Disemba 2002, wanpela strongpela saiklon i bin kamap long Guam. Dispela saiklon i spit tru winim 300 kilomita long wanpela aua. Planti haus i bruk bruk na sampela i bagarap olgeta. Wantu ol kongrigesen i kirap long stretim ol samting na kamapim sampela lain bilong helpim ol famili Witnes em ol i kisim bikpela bagarap moa. Brens ofis bilong Guam i salim ol samting bilong wokim ol haus na sampela wokman bilong stretim ol haus i bin bagarap, na brens ofis bilong Hawaii i sapotim ol. Insait long sampela wik tasol, wanpela lain kapenta bilong Hawaii i kam helpim wok bilong wokim gen ol haus, na bilong helpim ol dispela brata bilong Hawaii sampela asples brata i kisim malolo long wok skin. Pasin bilong amamas na wok gut wantaim em i stap olsem gutpela witnes long ai bilong ol man long komiuniti.
Long wanpela hap bilong taun Mandalay, long Mianma, wanpela bikpela paia i kirap klostu long wanpela Haus Kingdom. Haus bilong wanpela sista i bin lusim wok autim tok na famili bilong em i stap klostu. Win i wok long tromoi paia i kam klostu long haus bilong sista, olsem na em i ran i go long Haus Kingdom na askim ol brata long helpim ol. Long dispela taim ol i wok long stretim Haus Kingdom, olsem na i gat planti brata i stap. Ol i kirap nogut long bungim sista, long wanem, ol i no save olsem em i stap long dispela hap. Wantu ol brata i helpim famili long rausim ol samting bilong ol na putim long hap we ol samting i stap gut. Taim man bilong sista, em i no Witnes, i harim tok long dispela paia, em i hariap i go long haus na i lukim olsem ol brata i helpim pinis famili bilong em. Em i kirap nogut na amamas, na tu, bel bilong em i stap isi, long wanem, long kain taim olsem ol man i save stilim ol samting. Pasin bilong ol brata long mekim gut long famili i kirapim sista na pikinini man bilong em long bung gen wantaim kongrigesen Kristen, na nau ol i go long olgeta miting.
Long sevis yia i go pinis, hangre i laik painim planti manmeri long Mosambik, long wanem, i gat bikpela san na planti kaikai bilong gaden i bagarap. Wantu brens ofis bilong ol Witnes Bilong Jehova i stretim ol samting bilong givim kaikai long ol lain i sot. Wok bilong tilim ol kaikai i kamap long ol Haus Kingdom, bihain long ol miting i pinis. Wanpela sista, em i mama wanpis, i tok: “Mi bel hevi na kam long miting, mi no save bai mi givim wanem kaikai long ol pikinini bilong mi taim mipela go bek long haus.” Gutpela pasin bilong ol brata long givim kaikai long ol i strongim em wantu. Em i tok: “Em i kain olsem mi kirap bek!”
Na tu, ol Witnes i “mekim gutpela pasin” long ol samting bilong spirit, taim ol i autim tok bilong Baibel i mekim gut bel bilong ol man na ol i ken wetim gutpela samting long bihain. Olsem wanpela saveman bilong bipo, ol i bilip olsem: “Ol manmeri i putim yau gut long [savetingting bilong God], bai ol i stap gut. Na bai ol . . . samting nogut i no inap kamap long ol.”—Sindaun 1:33.
[Ol Piksa long pes 31]
1, 2. Tilim kaikai long ol man i sot long Mosambik
3, 4. Bikpela saiklon long Guam i bagarapim planti haus
[Ol Kredit Lain]
Child, left: Andrea Booher/FEMA News Photo; woman, above: AP Photo/Pacific Daily News, Masako Watanabe