Painim Gutpela Gavman
“Planti kantri moa i mas kisim helpim long ol arapela kantri na dispela i bin kamapim planti hevi long olgeta hap em ol wan wan kantri yet i no inap stretim. Olgeta kantri i mas wok gut wantaim, long dispela rot tasol yumi inap winim ol bikpela hevi i save painim ol lain man.”—Ghulam Umar bilong Pakistan, saveman bilong wok politik.
SINDAUN bilong ol manmeri long graun i kain kain. Sampela i gat planti samting tru bilong skin, tasol planti manmeri i wok hat long kisim liklik samting tasol bilong i stap laip. Ol manmeri i stap nau long dispela taim bilong ol kompiuta na kain kain nupela save, ating ol i kisim bikpela skul na save i winim ol lain manmeri bilong bipo, tasol planti manmeri moa i hatwok tru long painim wok mani. Maski i luk olsem ol manmeri i stap fri moa long mekim ol samting, winim bilong bipo, planti milion manmeri i pret na ol i tingting planti. Ating i gat planti gutpela wok samting ol man inap kisim, tasol ol man i gat namba na ol man i no gat namba i insait long pasin korapsen na sakim lo, olsem na planti man i ting i no gat gutpela samting ol i ken wetim i kamap.
Planti kain kain bikpela hevi i painim ol manmeri, em ol hevi wanpela kantri, o sampela kantri, i no inap long stretim. Olsem na planti man i tok olsem bilong gutaim na bel isi i ken i stap long olgeta hap bilong graun, olgeta kantri i mas wanbel na stap aninit long wanpela gavman. Albert Einstein em i bin sapotim dispela kain tingting. Long 1946 em i tok: “Mi bilip strong olsem klostu olgeta manmeri bilong graun i laik sindaun gut na i stap bel isi . . . Laik bilong ol manmeri long i stap bel isi inap kamap tasol long rot bilong kamapim wanpela gavman bilong bosim olgeta hap bilong graun.”
Bihain long fifti yia, ol i no bin inapim yet dispela bikpela laik bilong ol manmeri. Niuspepa Le Monde bilong Paris, Frans, i mekim lista bilong ol hevi i kamap long nau, na i mekim tok olsem: “Yumi mas kamapim wanpela gavman bilong olgeta hap i gat ol kot, ol wokman bilong lukautim ol samting, na ol lo, na taim i gat pait bilong bagarapim na pinisim wanpela lain olgeta, kwiktaim dispela gavman inap mekim sampela samting bilong stretim hevi. Ol man i mas orait long dispela tingting olsem bihain Graun olgeta em i wanpela kantri.” Husat o wanem samting i gat pawa na save bilong kamapim dispela samting na bai yumi ken save ol manmeri i gat gutpela sindaun long bihain?
Yu Ting Yunaitet Nesen Inap Mekim?
Planti manmeri i bilip olsem Yunaitet Nesen bai kamapim bel isi long olgeta hap bilong graun. Yu ting Yunaitet Nesen em wanpela gavman inap bringim gutaim na bel isi long graun? Ol man politik i save mekim planti switpela tok i kirapim tru tingting bilong ol man na i olsem ol dispela samting bai kamap. Olsem: Long wanpela tokaut (Millennium Declaration) bilong yia 2000, Yunaitet Nesen Jeneral Asembli i mekim dispela strongpela tok: “Mipela bai mekim olgeta samting mipela inap mekim bilong ol manmeri i ken i stap fri long ol hevi bilong woa, maski em i kamap insait long kantri yet o namel long ol kantri, ol woa i bin pinisim laip bilong winim 5 milion manmeri insait long 10-pela yia i go pinis.” Kain tokaut olsem i mekim na planti man na ol oganaisesen i amamas na givim biknem long Yunaitet Nesen na planti manmeri i laikim em, na em i kisim tu 2001 Prais Nobel. Long dispela rot, lain Norwegian Nobel Committee i givim biknem long Yunaitet Nesen, na ol i tok “i gat wanpela rot tasol bilong kamapim pasin bilong wok gut wantaim em long rot bilong Yunaitet Nesen.”
Maski i gat ol dispela kain tok, yu ting Yunaitet Nesen, em ol i bin kamapim long 1945, em i dispela gavman inap bringim bel isi tru long graun? Yumi ken tok nogat, long wanem, ol kantri i stap memba bilong en ol i tingim sindaun bilong ol yet tasol, na ol samting bilong litimapim kantri bilong ol yet, dispela i bagarapim ol samting Yunaitet Nesen i laik mekim. Bilong kamapim tingting bilong ol manmeri, edita bilong wanpela niuspepa i tok Yunaitet Nesen “em i kain olsem samting bilong skelim na kamapim tingting bilong ol manmeri bilong olgeta hap” na “ol hevi ol i mas toktok long en em ol samting ol i bin paitim tok i go i kam inap planti yia pinis, tasol ol hevi i stap yet.” Dispela askim i stap yet: Tru tru olgeta kantri inap kamap wanbel long wanpela taim bihain?
Baibel i tok olsem klostu nau dispela kain pasin wanbel bai kamap. Olsem wanem dispela samting bai kamap? Na wanem gavman bai kamapim dispela samting? Bilong kisim bekim, plis ritim stori i kamap bihain long dispela.
[Piksa long pes 3]
Einstein i tok olsem yumi mas i gat wanpela gavman i bosim olgeta hap graun
[Kredit Lain]
Einstein: U.S. National Archives photo