Askim

Sampela i tok, sip Pol i kalap long en i no bagarap long ailan Malta, long hap saut bilong Sisili, nogat. Sip i bagarap long narapela ailan. Orait sip bilong Pol i bagarap long wanem hap?

Dispela askim i toktok long wanpela tok i kamap nau long dispela taim, olsem sip aposel Pol i stap long en i no bagarap long ailan Malta, em i bagarap long Cephalonia (o Kefallinía) klostu long Corfu long solwara Ionian, long hap wes bilong kantri Grik. Baibel i tok, Pol i lusim Sisaria na i stap kalabus long han bilong wanpela kepten bilong 100 soldia, em Julius bilong Rom, wantaim sampela soldia moa na ol poroman bilong Pol. Olsem yumi lukim long mep, sip i go long Saidon na Maira. Orait ol i lusim sip na kalap long wanpela bikpela sip bilong taun Aleksandria long Isip i save karim wit, na sip i ran i go long hap wes i go long Nidus. Ol i laik brukim solwara Ijien na abrusim poin bilong kantri Grik na i go long Rom, tasol ol i no inap. Strongpela win i sakim sip i go long hap saut, long hap bilong ailan Krit, na ol i bihainim nambis bilong en. Ol i malolo long wanpela ples ol i kolim Gutpela Pasis. Orait bihain sip i “lusim ailan Krit” na “wanpela strongpela win i kirap, em win ol i kolim win bilong hap not” na i wok long “sakim sip strong tru.” Dispela bikpela sip em wit i pulap long en, win i sakim i go i kam inap 14 nait. Orait bihain dispela sip i gat 276 man long en i pas long wanpela ailan em Baibel long tok Grik i kolim olsem Me·liʹte.​—⁠Aposel 27:1–28:⁠1.

Bipo ol man i bin kamapim kain kain tok long dispela ailan Me·liʹte em i wanem ailan tru. Sampela i bin ting em i ailan Melite Illyrica, nau ol i kolim Mljet, i stap long solwara Adriatic klostu long Kroesia. Tasol ating dispela tok i no stret tumas, long wanem, Mljet i stap long hap not, na dispela i no stret wantaim ol narapela hap em Pol i go long en, olsem Sirakyus, Sisili, na wes kos bilong Itali.​—⁠Aposel 28:​11-13.

Planti man bilong tanim Baibel ol i ting Me·liʹte em ailan Melite Africanus, nau ol i kolim Malta. Laspela ples em sip bilong Pol i go long en em Gutpela Pasis, long Krit. Bihain strongpela win i kirap na i subim sip i go long hap wes, long hap bilong Kauda. Win i subim sip i go inap planti de. Yumi ken ting win i mekim na sip i go moa yet long hap wes na kamap long Malta.

Tupela man bilong raitim buk The Life and Epistles of St. Paul, em Conybeare na Howson, ol i tingim dispela win na ‘hap win i subim sip i go long en na sip i trip olsem wanem,’ na tupela i tok: ‘Kirap long Kauda na i go long Malta, em i aninit liklik long 770 kilomita. Olsem na yumi ken ting dispela hap graun ol boskru i kam klostu long en long namba 14 nait, em Malta tasol na i no narapela ailan. I gat planti samting i makim olsem.’

Ating sampela bai ting em narapela ailan, tasol wanpela sip i bagarap long Malta olsem yumi lukim long mep, i olsem em i stret wantaim stori i stap long Baibel.

[Mep/Piksa long pes 31]

(Bilong save ol dispela rait i stap we long pes, lukim buk o magasin)

Jerusalem

Sisaria

Saidon

Maira

Nidus

KRIT

KAUDA

MALTA

SISILI

Sirakyus

Rom

MLJET

GRIK

CEPHALONIA