Wanpela Pasin Bilong Yumi Ol Man
Jodie i gat bisnis long helpim ol man long salim ol samting bilong ol. Em i laik helpim wanpela meri long sekim na salim ol samting bilong susa bilong em i dai pinis. Jodie i sekim ol samting insait long rum, na em i painim sampela olpela bokis. Em i lukluk insait long wanpela bokis na em i kirap nogut tru. I gat ol mani ol i bin pasim long pepa na i hip i stap—inap 82,000 dola olgeta! Jodie wanpela tasol i stap long rum. Em bai mekim wanem? Em bai kisim dispela bokis o em bai tokim meri long mani em i bin painim?
TINGTING bilong Jodie long tupela samting em inap mekim i kamapim klia wanpela pasin bilong yumi man we i mekim na yumi stap narapela kain long ol animal. Buk The World Book Encyclopedia i tok: “Wanpela bikpela pasin bilong yumi ol man, em yumi inap skelim wanem samting yumi mas mekim o yumi no ken mekim.” Taim dok i hangre na em i lukim hap abus i stap long tebol, em i no save skelim olsem em bai kaikai dispela abus o nogat. Tasol Jodie inap skelim samting em i tingting long mekim, i stret o i no stret. Sapos em i kisim dispela mani, em i stil, tasol ating i no gat man bai save na putim em long kot. Tru, dispela mani i no bilong em, tasol meri hia i no save dispela mani i stap. Na tu, ol man long hap bilong Jodie bai ting em i longlong sapos em i givim dispela mani long meri.
Orait sapos wankain samting i painim yu olsem i bin painim Jodie, bai yu mekim wanem? Ol lo bilong bel yu save bihainim, dispela bai stiaim yu taim yu bekim dispela askim.
Ol Lo Bilong Bel—Wanem Mining Bilong En?
Ol lo bilong bel i save “skelim wanem pasin i stret o i no stret.” (Collins Cobuild English Dictionary) Man bilong raitim buk, Eric J. Easton, i tok: “Dispela tok ‘lo bilong bel’ na ‘wanem pasin i stret o i no stret,’ ol i gat wankain mining tasol. Namba wan em tok Grik (ethikos) na namba tu em tok Latin (moralis), tupela wantaim i toktok long lo bilong ol pasin bilong ples na bilong ol tumbuna.”
Inap longpela taim pinis, ol lotu yet i bin makim wanem pasin i stret ol man i mas bihainim. Tok Bilong God, em Baibel, i bin stiaim planti lain man long dispela samting. Tasol long nau planti man long olgeta hap ol i bin sakim lo bilong ol lotu na ol i tok i no gutpela long bihainim, na ol i tok ol lo bilong Baibel i makim wanem pasin i stret em i bilong bipo tasol. Orait ol i gat wanem ol lo i olsem senis bilong en? Buk Ethics in Business Life i tok “save bilong dispela graun i . . . daunim pinis strong ol lotu i bin holim bilong stiaim ol man.” Long nau ol man i no save lukluk long ol lotu bilong painim ol lo bilong bihainim; ol i lukluk long ol man i gat save bilong graun long makim wanem samting i stret o i no stret. Wanpela profesa, em Paul McNeil, i tok: “Mi ting ol dispela saveman i laik mekim wok olsem pris bilong makim wanem pasin i stret ol man i mas bihainim. . . . Long nau ol man i no larim ol lo bilong lotu i stiaim ol nogat, ol i larim ol lo bilong bel i stiaim ol.”
Taim yu gat ol bikpela samting yu mas skelim, olsem wanem yu save skelim wanem pasin i stret na wanem pasin i no stret? Ol lo bilong yu long dispela samting em ol lo God i bin makim o yu yet yu i bin makim?