De Bilong Gretiuesen—Gutpela De Tru
“YUMI bung long wanpela gutpela de tru. San i lait gut. Skai i blupela. Gras i grinpela. Ol pisin i singsing. Ol samting i makim olsem dispela de bai i gutpela tru, na yumi bai i no bel hevi. Jehova em i God bilong kamapim ol gutpela samting. Em i God bilong mekim gut long man.”
Long rot bilong dispela tok, Brata Samuel Herd, wanpela memba bilong Gavening Bodi bilong ol Witnes Bilong Jehova, i kirapim program bilong klas namba 117 bilong Wastaua Baibel Skul Bilong Gileat. Em long Septemba 11, 2004. Program ol i kamapim i gat ol gutpela tok em Baibel i as bilong en na sampela ekspiriens bilong ol sumatin taim ol i skul na sampela ekspiriens bilong ol misineri. Em nau, em i gutpela de tru bilong ol 6,974 i bung long Wastaua Ediukesen Senta long Patterson, New York, na long ol ples bung long Brooklyn na Wallkill, em ol inap harim na lukim program long rot bilong vidio.
Tok Bilong Strongim Ol Sumatin
John Kikot, wanpela memba bilong Brens Komiti Bilong Yunaitet Stets, em i mekim gutpela tok long “Holimpas Amamas na Mekim Wok Misineri.” Em i tok ol sumatin bilong Gileat i gat nem olsem ol i lain bilong amamas, na amamas bilong ol i stap ples klia long dispela gretiuesen. Save bilong Baibel ol i kisim long taim ol i skul i bin mekim ol sumatin i amamas, na nau ol i gat rot long helpim ol arapela long kisim wankain amamas. Ol i mekim olsem wanem? Em long rot bilong givim ol yet long mekim wok misineri bilong ol. Jisas i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Taim ol i bihainim God Jehova, em i gutpela ‘God bilong amamas’ husat i opim rot long ol man i ken kisim tok i tru, ol nupela misineri bai inap long holimpas amamas bilong ol.—1 Timoti 1:11.
Tok i kamap bihain long dispela i kam long narapela memba bilong Gavening Bodi, em David Splane, nem bilong tok bilong em, “Bai Yu Stap Wanbel Wantaim Ol Arapela?” Tru tumas i gutpela long stap wanbel wantaim ol arapela, tasol bilong mekim olsem ating yumi mas “kisim pasin bilong olgeta kain man.” (1 Korin 9:22; Song 133:1) Brata Splane i tok ol sumatin i laik gretiuet ol bai toktok o mekim wok samting wantaim planti ol arapela long wok misineri bilong ol—ol man ol i bungim long autim tok, ol arapela misineri, ol brata na sista i stap long nupela kongrigesen bilong ol, na ol lain i stap long brens ofis na lukautim wok bilong autim tok na skulim ol man. Em i tokim ol long ol samting ol i ken mekim bilong stap wanbel wantaim ol man: Save gut long tok ples, tingim pasin bilong ples, tingim ol arapela misineri na no ken bisi long ol samting i bilong ol yet tasol long save long en, na harim tok bilong ol man i go pas long wok.—Hibru 13:17.
Bihain tisa bilong Skul Gileat, Lawrence Bowen i tok: “Yu Bihainim Tingting Bilong Husat?” Em i tokim ol sumatin olsem ol man i “skelim ol samting long ai nating” ol i no bin bilip olsem Jisas em i Mesaia. (Jon 7:24) Yumi ol man i gat sin, olsem na yumi mas was gut, nogut yumi “bihainim tingting bilong ol man” na yumi no “bihainim tingting bilong God.” (Matyu 16:22, 23) Ol man i save tingim ol samting bilong spirit, ol tu i mas wok oltaim long stretim tingting bilong ol. Kain olsem sip i stap long solwara, wok bilong stretim tingting bilong yumi long nau inap helpim yumi long winim mak na yumi no ken bagarap long ol samting bilong spirit olsem sip i save bagarap long rip. Wok bilong stadi oltaim long Baibel inap helpim yumi long “bihainim tingting bilong God.”
Narapela tisa bilong Skul Gileat, Wallace Liverance, em i mekim laspela tok long dispela hap bilong program. Aisaia 55:1 i as bilong tok, na tok bilong em i olsem, “Bai Yu Baim Wanem Samting?” Em i kirapim olgeta sumatin long “baim” nupela strong, amamas, na ol samting bilong helpim man i stap laip i kam long ol tok profet bilong God bilong taim bilong yumi. Tok profet bilong Aisaia i kamapim olsem ol dispela tok bilong God i olsem wara, wain, na susu. Tasol olsem wanem man i ken baim sapos em “i no gat mani” na “i no gat pe bilong en”? Brata Liverance i tok man i ken mekim olsem long rot bilong tingim gut ol tok profet bilong Baibel na kisim ol tingting na pasin bilong God olsem senis bilong ol tingting na pasin bilong graun. (Aisaia 55:2, 3, 6, 7) Long dispela rot ol nupela misineri inap stap strong long asainmen bilong ol long ol longwe hap. Planti taim ol man bilong graun i ting bilong i stap amamas ol i mas kisim ol gutpela samting bilong skin. Brata i tok: “No ken bilipim dispela samting.” Em i tok moa: “No ken kisim kain tingting olsem, nogat. Yu mas lusim haptaim bilong stadi na kliagut long Tok Bilong God i gat ol tok profet long en. Em inap givim nupela strong long yu, helpim yu, na givim amamas long wok misineri bilong yu.”
Ol Gutpela Ekspiriens na Inteviu
Ol sumatin i bin insait long wok autim tok. Mark Noumair, narapela tisa bilong Gileat, i lukautim hap bilong program we sampela long klas i mekim ol soim long ol samting i painim ol long taim ol i autim tok, tok bilong em i olsem, “Ol i No Sem Long Gutnius.” (Rom 1:16) Odiens i amamas long harim olsem wanem ol sumatin, em ol i save gut long mekim wok autim tok, i bin autim tok long haus, long rot, na long ol stua. Ol sumatin husat i save long ol narapela tok ples, ol i go pas long bungim ol man long teritori bilong kongrigesen em ol i mekim wok long ol dispela tok ples ol sumatin i save long en. Sampela arapela sumatin i mekim gutpela wok long ol buk na nius bilong Baibel em ol Witnes Bilong Jehova i wokim, ol i yusim long mekim ol gobek na bilong kirapim ol man long stadi long Baibel. Ol i ‘no sem’ long autim gutnius.
Brata William Nonkes, em i wok long Dipatmen Bilong Wok Autim Tok, em i mekim ol inteviu long ol misineri bilong longtaim em ol i kam long Bekina Faso, Latvia, na Rasia. Ol i mekim ol gutpela tok i stret long tok, “Jehova i Save Mekim Gut Long Ol Man i Stap Gut Long Em.” Wanpela brata ol i toktok wantaim em, em i kirapim ol sumatin long tingim lain ami bilong Gideon i gat 300 soldia. Olgeta long ami i gat wok bilong mekim na wok bilong ol wan wan i bin helpim Gideon i win. (Hetman 7:19-21) Olsem tasol, ol misineri i no lusim wok bilong ol, bai i kisim gutpela pe.
Wanpela tisa long Patterson, Samuel Roberson, i mekim ol inteviu i stret long tok “Kisim Pasin Bilong Olgeta Kain Man.” Em i toktok wantaim fopela bilong Brens Komiti, ol i kam long Senegal, Guam, Laibiria, na Madagaska. I gat 170 misineri i mekim wok long ol dispela kantri. Ol sumatin bilong gretiuet i bin kisim save long olsem wanem ol Brens Komiti i helpim ol nupela misineri long lain long sindaun gut long asainmen bilong ol. Planti taim dispela i makim olsem ol i mas lain long ol pasin ating ol man long hap bilong Wes bai i ting i narapela kain. Olsem: Long sampela kantri, bai yu lukim ol man, na ol brata insait long kongrigesen tu, ol i save holim han bilong narapela man taim ol i wokabaut, ol i mekim pasin pren tasol. Long sampela hap em brens bilong Guam i lukautim, ol man i save kaikai ol samting i narapela kain. Tasol planti arapela misineri i kam pas i bin lain long kain kain samting olsem, na ol nupela misineri tu inap lain.
Guy Pierce, wanpela bilong Gavening Bodi, em i stori long “Stap Gut Long ‘Kingdom Bilong Bikpela Bilong Yumi.’ ” Em i tokim odiens: “I gat as na Jehova i wokim ol samting. Em i no wokim ol samting bilong stap nating. As na em i wokim dispela graun i no senis. Samting em i tingting pinis long mekim i wok long kamap. No gat wanpela samting inap pasim dispela.” (Stat 1:28) Brata Pierce i strongim olgeta long stap gut long God na daun long wok bos bilong em maski sin bilong namba wan man, Adam, i mekim na i gat ol hevi i stap. Brata Pierce i kirapim ol sumatin olsem: “Yumi stap long taim bilong kot. Yumi no gat bikpela haptaim i stap yet bilong painim ol man i gat gutpela bel na helpim ol long save long tok i tru. Mekim ol samting na bai haptaim i stap yet bilong helpim ol arapela long save long gutnius bilong Kingdom i no ken lus nating.” Ol man i stap gut long Kingdom Bilong God i mas save olsem em bai sambai long ol.—Song 18:25.
Bilong pinisim program, siaman i ritim ol tok amamas long ol brens bilong ol narapela narapela hap bilong graun. Em i givim ol setifiket long ol sumatin, na wanpela bilong ol i ritim pas i kamapim tingting bilong klas olgeta, pas i kamapim bikpela tenkyu long skul ol i bin kisim. Em i gutpela samting bilong pinisim program bilong dispela naispela de tru, em olgeta i bung bai i tingim inap longtaim tru.
[Blok long pes 23]
OL SAMTING BILONG OL SUMATIN
Hamas kantri ol i kam long en: 11
Hamas kantri ol bai go long en: 22
Hamas sumatin: 48
Krismas bilong ol, averes: 34.8
Hamas yia long tok i tru, averes: 18.3
Hamas yia long fultaim sevis, averes: 13.4
[Piksa long pes 24]
Klas Namba 117 Bilong Wastaua Baibel Skul Bilong Gileat
Nem bilong ol bratasista i stap daunbilo. Namba wan lain i sanap paslain, na namba 8 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.