Ol Kristen—Amamas Long Holim Nem Kristen!
“Man i laik amamas, em i mas amamas long Bikpela tasol.”—1 KORIN 1:31.
1. Planti man long nau ol i kisim wanem tingting long lotu?
I NO longtaim i go pinis wanpela man bilong stori long ol samting bilong lotu i bin stori long tingting bilong planti man long lotu bilong ol. Em i tok: “Wanpela bikpela samting i bin kamap long lotu long nau . . . em pasin bilong planti man long pilim les long lotu bilong ol yet.” Em i luksave olsem planti man “i bilip long God . . . ; tasol ol i no tingting tumas long em.”
2. (a) Bilong wanem yumi no kirap nogut olsem planti man ol i les long ol samting bilong spirit? (b) Pasin bilong les inap kamapim wanem ol hevi long ol Kristen tru?
2 Ol sumatin bilong Baibel i no kirap nogut long dispela pasin bilong planti man long les long lotu. (Luk 18:8) Na taim yumi tingim ol lotu, yumi save ol man bai les long en, long wanem, inap longtaim pinis lotu giaman i bin giamanim ol man na mekim ol i bel hevi. (KTH 17:15, 16) Tasol long ol Kristen tru, pasin bilong givim hap bel tasol long lotu inap kamapim sampela hevi. Yumi no ken pilim les long bilip bilong yumi o lusim pasin bilong givim bel long mekim wok bilong God na laikim tok i tru bilong Baibel. Jisas i bin tok lukaut long kain pasin olsem taim em i tokim ol Kristen i stap long taun Laodisia olsem: “Mi save, yu no kol na yu no hat. Mi laik bai yu stap kolpela o yu stap hatpela. Tasol nogat. Yu hat liklik tasol.”—KTH 3:15-18.
Luksave Long Yumi Husat Tru
3. Ol Kristen i ken amamas long wanem ol samting i makim ol i Kristen?
3 Bilong daunim pasin bilong les long ol samting bilong spirit, ol Kristen i mas luksave long ol i husat tru na ol i mas amamas long ol i stap Kristen. Yumi stap olsem ol wokboi bilong Jehova na disaipel bilong Krais, na Baibel i stori long ol pasin i makim yumi. Yumi “witnes” bilong Jehova, yumi “wanwok bilong God,” taim yumi autim “gutnius” long ol arapela man. (Aisaia 43:10; 1 Korin 3:9; Matyu 24:14) Yumi ol man bilong “laikim tru ol arapela” long lain bilong yumi. (Jon 13:34) Ol Kristen tru em ol man “i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.” (Hibru 5:14) Yumi stap “olsem ol lait namel long ol lain manmeri bilong dispela graun.” (Filipai 2:15) Na yumi wok strong long “wokabaut stret namel long ol haiden.”—1 Pita 2:12; 2 Pita 3:11, 14.
4. Olsem wanem ol man i lotuim Jehova ol i ken save long ol samting i no save makim ol?
4 Ol man i lotu tru long Jehova i save tu long ol samting i no save makim ol. “Ol i no bilong dispela graun,” wankain olsem Lida bilong ol, Jisas Krais, em i no bilong dispela graun. (Jon 17:16) Ol i no pas wantaim “ol haiden,” em “tingting bilong ol i paul olgeta, na save bilong ol i olsem tudak . . . na ol i stap ausait long laip bilong God.” (Efesus 4:17, 18) Olsem na ol disaipel bilong Jisas i save “lusim pasin bilong givim baksait long God” na ol i “lusim olgeta laik nogut bilong dispela graun.” Ol i “tingting gut na wokabaut stret.” Tru, ol i stap “namel long ol manmeri bilong dispela graun,” tasol ol i “bihainim pasin bilong God.”—Taitus 2:12.
5. Wanem mining bilong dispela tok “amamas long Bikpela tasol”?
5 Pasin bilong yumi long kliagut long yumi husat tru na pasin bilong yumi long pas gut wantaim King bilong heven na graun i kirapim yumi long “amamas long Bikpela tasol.” (1 Korin 1:31) Yumi amamas long Bikpela olsem wanem? Yumi ol Kristen tru i save amamas long Jehova i stap God bilong yumi. Yumi bihainim dispela tok hia: “Man i laik amamas, em i mas amamas long wanpela samting tasol. Em i mas amamas long em i save long mi, Bikpela. Oltaim mi save laikim tumas olgeta manmeri bilong graun na mi save mekim gutpela na stretpela pasin long ol.” (Jeremaia 9:24) Yumi “amamas,” long wanem, yumi save long God na em i mekim wok long yumi bilong helpim ol arapela.
Em i Hatwok Long Mekim
6. Bilong wanem sampela i hatwok long holimpas stretpela tingting long ol samting i makim olsem ol i Kristen tru?
6 Tru tumas, sampela taim i hatwok long holimpas stretpela tingting long ol samting i makim olsem yumi Kristen tru. Wanpela yangpela man i bin go bikpela long lain Kristen i tok i gat taim we em i no strong tumas long ol samting bilong spirit, em i tok: “I gat haptaim we mi no save long as na mi stap olsem wanpela Witnes Bilong Jehova. Mi bin wok long lain long tok i tru kirap long taim mi bebi yet. Sampela taim mi pilim olsem em i wankain olsem ol narapela lotu, em ol man i orait long en.” Sampela i larim ol samting ol i lukim long ol spot na vidio samting, o ol nius, o tingting bilong ol man i no bihainim tingting bilong God i stiaim pasin ol i bihainim. (Efesus 2:2, 3) Sampela taim sampela Kristen i gat tupela tingting long samting ol yet i mekim na ol i wok long skelim tingting bilong ol long wanem samting i bikpela samting na wanem ol mak ol i laik winim.
7. I stret ol wokboi bilong God i mekim wanem bilong skelim ol yet?
7 Yu ting i no stret long skelim gut tingting bilong yu yet long sampela taim? Nogat. Ating yu inap tingim tok aposel Pol i mekim bilong strongim ol Kristen long skelim ol yet: “Oltaim yupela i mas skelim pasin na tingting bilong yupela yet na painimaut, bilip bilong yupela i stap strong, o nogat. Yupela i mas skelim gut pasin bilong yupela yet.” (2 Korin 13:5) Aposel hia i laik kirapim wanpela gutpela wok bilong painim ol samting bilong spirit man i no strong long en na bai em inap mekim ol samting bilong stretim ol dispela samting. Taim Kristen i wok long skelim bilip bilong em, em i mas painimaut olsem ol tok na pasin bilong em i wankain long ol samting em i tok em i bilipim o nogat. Yumi no laik bai ‘bilip bilong yumi i bagarap olgeta olsem sip i bruk long rip’!—1 Timoti 1:19.
Hatwok Inap Painim Yumi Tu
8, 9. (a) Moses i mekim wanem tok i kamapim tingting bilong em olsem em i no bilip tumas long em yet? (b) Jehova i bekim wanem tok long Moses? (c) Ol tok Jehova i mekim bilong strongim ol man i mekim wanem long yu?
8 Olsem wanem? I stret long ol Kristen husat i no bilip tumas long ol yet long sampela taim ol i mas pilim olsem ol i pundaun pinis? Nogat tru! Bel bilong ol i ken stap isi taim ol i save kain tingting olsem i bin painim ol gutpela witnes bilong God long bipo tu. Olsem Moses, em i kamapim tru bilip bilong em, na stap gut long God na givim bel long mekim wok bilong Em. Taim Moses i kisim wanpela wok em i ting em i no inap mekim, em i tok: “Mi wanem kain man?” (Kisim Bek 3:11) Long tingting bilong em yet, bekim bilong dispela askim i olsem, ‘Mi man nating!’ o ‘Mi no inap mekim!’ I gat kain kain samting inap mekim na ating Moses inap pilim olsem em i no inap mekim dispela wok: Em i bilong wanpela lain em ol i wokboi nating tasol. Lain Israel i bin sakim em. Na maus bilong em i hevi tumas. (Kisim Bek 1:13, 14; 2:11-14; 4:10) Em i wanpela wasman bilong sipsip, wanpela kain wok ol Isip i no laikim tru. (Stat 46:34) Olsem na yumi no kirap nogut long em i pilim olsem em i no fit long kisim bek ol lain bilong God em ol i kalabus i stap!
9 Bilong strongim Moses Jehova i givim em tupela strongpela promis: “Mi bai mi stap wantaim yu. Na nau mi laik givim yu wanpela mak bilong soim yu olsem mi bin salim yu i go long ol Israel. Dispela mak i olsem. Taim yu kisim ol manmeri na yupela i lusim Isip na i kam, bai yupela i lotu long mi long dispela maunten.” (Kisim Bek 3:12) God i tokim wokman bilong em olsem Em bai stap oltaim wantaim em. Na tu, tok Jehova i mekim long Moses i makim olsem Em bai kisim bek lain bilong em. Long bipo yet na i kam inap nau, God i bin mekim ol wankain promis long helpim ol man. Olsem: Long rot bilong Moses em i tokim lain Israel taim ol i laik go insait long Graun Bilong Promis: “Yupela i mas sanap strong . . . God, Bikpela bilong yumi, bai i stap wantaim yupela. Na em bai i no inap lusim tingting long yupela o larim yupela i stap nating.” (Lo 31:6) Jehova i tokim Josua: “Taim yu stap laip, i no gat wanpela lain man inap winim yupela long pait. Mi bai i stap wantaim yu . . . Mi no ken lusim tingting long yu.” (Josua 1:5) Na em i tok promis long ol Kristen olsem: “Bai mi no lusim yu. Bai mi no larim yu i stap nating. Nogat tru.” (Hibru 13:5) Ol kain strongpela helpim i mekim na i stret yumi pilim amamas olsem yumi stap Kristen!
10, 11. Wanem samting i helpim Asap bilong lain Livai long holimpas stretpela tingting long wok em i mekim bilong lotuim Jehova?
10 Inap olsem 500 yia bihain long Moses, wanpela gutpela Livai, nem bilong em Asap, i kamapim tru tingting bilong em. Em i gat tupela tingting long pasin bilong bihainim stretpela pasin—tru dispela pasin i helpim man o nogat. Ol hevi na traim i painim em na em i hatwok long mekim wok bilong God, tasol long seim taim em i lukim sampela man husat i tok bilas long God i kisim biknem na planti samting bilong graun. Dispela i mekim wanem long Asap? Em i tok: “Klostu mi laik pundaun long sin. Mi olsem lek i wel pinis na mi laik pundaun na lusim bilip. Long wanem, mi lukim ol man nogut i kamap maniman na mi mangal long ol samting bilong ol dispela bikhetman.” Em i kirap kisim tupela tingting, pasin bilong lotuim Jehova i helpim ol man o olsem wanem? Asap i kisim tingting olsem: “Mi bin lukaut gut na bel bilong mi i stap klin, na mi no bin mekim sampela sin. Ating dispela em i lus nating, a? Long wanem, God, yu givim pen long mi long san na long nait.”—Song 73:2, 3, 13, 14.
11 Asap i mekim wanem long ol dispela tingting i stap long bel bilong em? Em i laik tok em i no gat dispela kain tingting? Nogat. Em i autim long prea em i mekim long God, olsem yumi lukim long Song 73. Tingting bilong Asap i kirap long senis taim em i go long tempel. Taim em i stap long dispela hap, em i kisim save olsem pasin bilong givim bel tru long God em i stap yet olsem nambawan rot long bihainim. Laik bilong em long ol samting bilong spirit i kamap nupela, na em i kliagut olsem Jehova i no laik tru long pasin nogut na long taim Jehova i makim em bai givim strafe long ol man nogut. (Song 73:17-19) Asap i kisim stretpela tingting na dispela i strongim em long pilim olsem em i gat gutpela wok olsem wanpela wokman bilong Jehova. Em i tokim God: “Mi stap wantaim yu oltaim na yu save holim han bilong mi. Yu save givim mi gutpela tok bilong stiaim wokabaut bilong mi, na bihain bai yu kisim mi na mi stap wantaim yu.” (Song 73:23, 24) Asap i amamas gen long God bilong em.—Song 34:2.
Ol i Save Gut Long Ol i Husat Tru
12, 13. Stori long sampela man Baibel i stori long ol, em ol i bin amamas long pasin bilong ol long pas gut wantaim God.
12 Wanpela rot long strongim tingting bilong yumi long ol samting i makim yumi Kristen tru em pasin bilong skelim na bihainim bilip bilong ol man i bin stap gut long lotuim God, maski hevi i painim ol, ol i amamas long pasin bilong ol long pas gut wantaim God. Tingim Josep, pikinini bilong Jekop. Taim em i yangpela yet ol i salim em olsem wanpela wokboi nating long ol man na ol i kisim em i go long Isip, em planti handet kilomita longwe long papa bilong em na longwe tu long famili i save laikim na sapotim em. Taim Josep i stap long Isip i no gat wanpela man bilong graun em inap askim bilong givim em gutpela tingting i kam long God. Na tu i gat ol samting i kamap i traim pasin bilong em long bihainim stretpela pasin na pasin bilong bilip na wetim God. Tasol em i strong long holimpas ol pasin i makim em olsem wanpela wokman bilong God, na em i strong long bihainim ol pasin em i save i stret. Em i amamas long i stap man i lotuim Jehova maski em i stap long hap i no gutpela tumas. Na tu em i no sem long autim tingting bilong em.—Stat 39:7-10.
13 Inap 800 yia bihain, i gat wanpela yangpela meri Israel husat i stap wokmeri nating bilong Naman, em jeneral bilong ami bilong Siria. Yangpela meri hia i no lusim tingting olsem em yet i save lotuim Jehova. Taim rot i op, em i no pret long autim tok bilong Jehova taim em i kamapim ol tok i makim Elisa olsem wanpela profet bilong God tru. (2 King 5:1-19) Planti yia bihain, yangpela King Josaia i bin kamapim ol bikpela senis bilong stretim bek lotu, stretim tempel, na kisim lain Israel i go bek long Jehova. Em i mekim olsem maski pasin nogut i pulap long dispela taim. Em i amamas long bilip na lotu bilong em. (2 Stori, sapta 34, 35) Taim Daniel na 3-pela poroman Hibru bilong em ol i stap long Babilon ol i no lusim tingting long ol i husat tru, ol i wokboi bilong Jehova. Na maski ol narapela i laik fosim ol o traim ol long mekim samting i no stret, ol i stap gut long Jehova. Em i klia tru, ol i amamas long i stap wokboi bilong Jehova.—Daniel 1:8-20.
Amamas Long i Stap Kristen Tru
14, 15. Wanem ol samting i insait long pasin bilong yumi long amamas long yumi stap Kristen tru?
14 Ol dispela wokboi bilong God i bin mekim gutpela wok, long wanem, ol i bin amamas long i stap gut long God. Olsem wanem long yumi long nau? Wanem samting i insait long pasin bilong yumi long amamas long i stap Kristen?
15 Wanpela bikpela samting em yumi amamas tru long nem bilong Jehova i stap long yumi, na em i orait long yumi. God i no gat tupela tingting long husat man i bilong Em. Aposel Pol i bin stap long wanpela taim we i gat planti samting i paulim ol man long samting bilong lotu, na em i tok: “Bikpela i save gut long ol manmeri bilong em yet.” (2 Timoti 2:19; Namba 16:5) Jehova i save amamas long “ol manmeri bilong em yet.” Em i tok: “Man i holim yupela em i holim kiau bilong ai bilong mi.” (Sekaraia 2:8, NW ) I klia tru, Jehova i save laikim yumi. Olsem na pasin bilong laikim em tru i as na yumi pas gut wantaim em. Pol i tok: “Sapos wanpela man i givim bel bilong em long God, orait God i save tru long dispela man.”—1 Korin 8:3.
16, 17. Bilong wanem ol yangpela na lapun Kristen wantaim ol inap amamas long ol samting bilong spirit ol i bin kisim long ol man i bin lotuim Jehova long pastaim?
16 Ol yangpela husat i bin kamap bikpela insait long lain Witnes Bilong Jehova i mas skelim olsem, pasin bilong ol long i stap Kristen tru i wok long kamap strong moa, long wanem, ol yet i pas gut wantaim God o nogat. Ol i no ken ting sapos bilip bilong papamama i strong dispela bai lukautim ol. Pol i tok long olgeta wan wan wokboi bilong God olsem: “Sapos em i sanap strong long wok bilong en, o sapos em i pundaun, dispela em i samting bilong Bikman bilong em yet.” Pol i tok moa: “Yumi olgeta wan wan bai yumi mas tokim God long as bilong olgeta pasin yumi bin mekim.” (Rom 14:4, 12) Olsem na pasin bilong givim hap bel long bihainim lotu bilong papamama bilong yu i no inap mekim na bai yu inap pas gut wantaim na stap klostu long Jehova.
17 Kirap long bipo na i kam inap nau i bin i gat ol witnes bilong Jehova. Dispela lain witnes i kirap long stretpela man Abel—samting olsem 6,000 yia i go pinis—na i kam long bikpela lain Witnes bilong nau na i go inap long ol manmeri i lotuim Jehova, em ol bai kisim laip oltaim. (KTH 7:9; Hibru 11:4) Yumi tu i insait long lain i stap gut long God na lotuim em. Em nau, yumi kisim gutpela samting tru bilong spirit!
18. Olsem wanem ol samting yumi pilim em i bikpela samting na ol lo yumi bihainim i makim olsem yumi stap narakain long ol man bilong dispela graun?
18 Ol samting yumi pilim em i bikpela samting, ol pasin, na ol lo yumi bihainim i makim olsem yumi Kristen. Dispela em i “rot,” em dispela wanpela rot tasol long bihainim na bilong amamasim God. (Aposel 9:2; Efesus 4:22-24) Ol Kristen i save “skelim gut olgeta tok na pasin” na ol i “holimpas ol gutpela pasin.” (1 Tesalonaika 5:21) Yumi kliagut long ol samting i mekim na pasin Kristen i narapela kain olgeta long ol pasin bilong dispela graun i stap longwe long God. Jehova i save tokaut klia long olsem wanem lotu i tru i narakain long lotu giaman. Long rot bilong profet bilong em Malakai, em i tok: “Na tru tumas bai yupela lukim gen olsem stretpela man i narapela kain long man nogut, na man i mekim wok bilong God i narapela kain long man i no bin mekim wok bilong God.”—Malakai 3:18, NW.
19. Wanem samting i no inap kamap long ol Kristen tru?
19 Pasin bilong amamas long Jehova em i bikpela samting long nau taim ol man i paul nabaut, olsem na wanem samting inap helpim yumi long holimpas pasin bilong amamas long God bilong yumi na tingim tru ol samting i makim olsem yumi i Kristen tru? Ol gutpela tok bilong helpim yumi i stap long stadi i kamap bihain long dispela. Taim yumi skelim ol dispela samting, yumi save olsem: Pasin bilong pilim les long lotu bilong ol i no inap kamap long ol Kristen tru.
Yu Inap Tingim?
• Olsem wanem ol Kristen inap “amamas long Bikpela tasol”?
• Yu bin kisim wanem skul long ol samting Moses na Asap i bin mekim?
• Wanem ol man Baibel i stori long ol, em ol i bin amamas long wok ol i mekim long lotuim God?
• Wanem ol samting i insait long pasin bilong yumi long amamas long i stap Kristen tru?
[Piksa long pes 14]
Inap haptaim, Moses i no bilip tumas long em yet
[Ol Piksa long pes 15]
Planti wokboi bilong Jehova long bipo ol i bin amamas long i stap wokboi bilong Jehova