Tok Bilong Jisas i Kirapim Ol Man Long Olgeta Hap

MAN bilong tanim Baibel, Edgar Goodspeed, em i bin tok: “Olgeta tok Jisas i bin givim long ol disaipel na ol narapela man na i stap long 4-pela Gutnius, em inap kolim insait long tupela aua tasol. Tasol yumi ken tok, i no gat wanpela man i bin kirapim tru bel na tingting bilong ol man bilong olgeta hap olsem Jisas i bin mekim.”

Taim Jisas Krais i pinisim wok bilong em long graun long yia 33 C. E., lain bilong em i olsem 120 man na meri. (Aposel 1:15) Long nau, winim 2 bilion manmeri i save tok ol i Kristen. Planti handet milion moa i tingim Jisas olsem wanpela profet. Tru tumas, ol tok bilong em i bin mekim planti samting tru long ol man.

Ol lida bilong graun em ol i no Kristen, ol tu i tokaut olsem Jisas i bin kirapim tru tingting bilong ol man bilong olgeta hap. Olsem: Wanpela tisa bilong lotu Juda, Hyman Enelow, em i tok: “Planti manmeri moa yet i save laikim Jisas na ol i laik kisim save long ol tok bilong em, na em i bin stiaim tingting bilong planti manmeri moa yet, winim olgeta narapela man bilong lotu.” Na Enelow i tok moa: “Tok bilong Jisas i bin mekim planti samting long tingting na bel bilong ol man. Em i bin kirapim ol man long laikim tru ol narapela, na em i bin mekim gut bel bilong ol man, na mekim planti samting bilong helpim ol man, na kirapim ol man long amamas na wetim gutpela samting bai kamap bihain​—⁠long bipo yet i kam inap long nau i no gat narapela man i bin mekim olsem. I gat sampela man i bin kisim biknem na sampela i bin mekim ol gutpela wok bilong helpim ol man, tasol i no gat wanpela man i gat strong long kirapim tingting na bel bilong ol man olsem Jisas. Long olgeta hap ol man i save kirap nogut long ol tok na pasin bilong em.” Na lida bilong ol Hindu, em Mohandas K. Gandhi, i tok: “Mi no save long wanpela man i bin mekim bikpela wok bilong helpim ol man olsem Jisas i bin mekim. Lotu Kristen em i gutpela na i no gat wanpela asua long en.” Tasol em i tok moa: “Asua i stap long yupela ol Kristen. Yupela i no save bihainim liklik ol tok bilong lotu yupela i holim.”

Kirap long bipo yet, Kristendom i no bin bihainim ol tok bilong Jisas. Saveman Cecil John Cadoux i tok: “Long bipo yet, olsem long . . . 140 C.E., ol lida bilong lotu Kristen i bin lukim olsem isi isi lain bilong ol i wok long lusim ol stretpela pasin.” Na em i tok moa: “Pasin bilong lusim isi isi lo ol Kristen bilong pastaim i bin bihainim i mekim na ol lain bilong lotu Kristen i wok long kisim ol pasin bilong dispela graun.”

Inap 300 yia samting bihain long Krais, dispela pasin i go bikpela long taim King Constantine bilong Rom i kamap Kristen. Cadoux i tok: “Ol saveman bilong ol samting i bin kamap bipo ol i lukim pinis na sampela i bel nogut tru long pasin bilong Misin long lusim bilip taim em i kamap pren bilong Constantinus.” Insait long ol planti handet yia bihain long en, ol lain i tok ol i Kristen ol i bin mekim planti pasin nogut i bagarapim nem bilong Krais.

Olsem na yumi tingim ol askim olsem: Jisas i bin skulim ol man long wanem ol tok? Na ol tok bilong em i mas mekim wanem long yumi?

[Piksa long pes 3]

“Mi no save long wanpela man i bin mekim bikpela wok bilong helpim ol man olsem Jisas.”​—Mohandas K. Gandhi

[Piksa long pes 3]

“I no gat wanpela man i bin kirapim tru bel na tingting bilong ol man olsem Jisas.”​—Edgar Goodspeed

[Kredit Lain]

Culver Pictures