Askim
Taim King Solomon bilong Israel bilong bipo i lapun pinis em i no stap gut moa long God, olsem na yumi ken ting em i no inap kirap bek o olsem wanem?—1 King 11:3-9.
Baibel i kolim nem bilong sampela man na meri i bin mekim wok bilong God na yumi ken ting ol bai kirap bek, tasol Baibel i no tok, olgeta wan wan man na meri em Baibel i kamapim nem bilong ol, ol bai kirap bek. (Hibru 11:1-40) Tasol long Solomon yet, yumi ken kisim sampela tingting long kot bilong God sapos yumi skelim samting i bin painim em taim em i dai wantaim samting i bin painim sampela manmeri i bin stap gut long God na ol i dai.
Baibel i kolim tupela rot tasol bilong ol man i dai pinis—inap liklik taim ol i no i stap moa, o ol i no ken i stap moa i go inap oltaim oltaim. Ol man em kot bilong God i makim olsem ol i no ken kirap bek, ol i go long “Gehena,” olsem “bikpela hul i gat paia.” (Matyu 5:22; Mak 9:47, 48; KTH 20:14) Sampela i insait long dispela lain, em Adam tupela Iv, na man bilong kamapim Jisas, em Judas Iskariot, na sampela em ol i dai long taim God i bin mekim kot long ol na bagarapim ol, olsem ol lain long taim bilong Noa na ol lain bilong Sodom na Gomora.a Ol man em God i orait long ol i kirap bek, taim ol i dai ol i go long ples matmat bilong ol man—em Baibel long tok ples bilong pastaim i kolim olsem Siol o Hades. Baibel i stori long samting bai painim ol long bihain, olsem: “Solwara i larim olgeta man i dai pinis na i stap long en, ol i go. Na Dai wantaim Ples bilong ol man i dai pinis, tupela tu i larim olgeta man i dai pinis na i stap long han bilong tupela, ol i go. Na man i sindaun long sia king em i lukim pasin olgeta wan wan man i bin mekim, na em i skelim ol long kot bilong en.”—KTH 20:13.
Olsem na ol bilipman em Hibru sapta 11 i kolim nem bilong ol, ol i stap long matmat na ol i wetim taim bilong kirap bek. Sampela namel long ol em ol gutpela wokman bilong God olsem Abraham, Moses, na Devit. Orait nau yumi ken skelim tok Baibel i mekim long indai bilong ol. Jehova i tokim Abraham: “Yu yet bai yu stap bel isi inap long yu kamap lapun tru na yu dai, na bai ol i planim yu.” (Stat 15:15) Jehova i tokim Moses: “Klostu nau bai yu i dai.” (Lo 31:16) Na Baibel i tok long Devit, papa bilong Solomon, olsem: “Devit i dai na ol i planim em long Jerusalem, dispela taun ol i kolim ‘Taun Bilong Devit.’ ” (1 King 2:10) Olsem na dispela tok “dai” na ‘planim em’ i makim olsem ol i go long matmat.
Orait, wanem samting i painim Solomon taim em i dai? Baibel i tok: “Solomon i stap king long Jerusalem inap 40 yia na em i bosim olgeta lain bilong Israel. Orait em i dai na ol i planim em long dispela hap bilong Jerusalem, ol i kolim Taun Bilong Devit.” (1 King 11:42, 43) Olsem na yumi ken ting Solomon i stap long matmat na bihain em bai lusim na i kirap bek.
Em nau, dispela tingting yumi kisim i makim olsem ol narapela man em Baibel i tok ol i “dai” na ol man i “planim” ol long matmat, ol inap kirap bek. Planti king i bin kamap bihain long Solomon ol i no bin stap gut long God, tasol Baibel i mekim dispela kain tok long ol. Yumi no ken kirap nogut long dispela, long wanem, Baibel i tok: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Tru, taim “olgeta manmeri i stap long matmat” ol i kirap bek pinis, long dispela taim tasol bai yumi save tru husat i kirap bek. (Jon 5:28, 29) Olsem na yumi no ken tok stret long wanpela man bilong bipo bai kirap bek tru—yumi mas wet i stap na bilip olsem samting Jehova bai mekim i stret olgeta.
[Futnot]