Ol i Mekim Bel Bilong Papamama i Amamas

“PIKININI, sapos yu kisim gutpela tingting na save, bel bilong mi bai i gutpela tru.” (Sindaun 23:15) Tru tumas, ol papamama Kristen i save amamas taim pikinini bilong ol i kisim savetingting i kam long God. Long Sarere, Septemba 10, 2005, inap 6,859 manmeri bilong planti kantri i bung long gretiuesen bilong namba 119 klas bilong Wastaua Baibel Skul Bilong Gileat. Bel bilong olgeta i amamas tru, na moa yet bel bilong papamama bilong 56 sumatin i winim skul.

David Walker i bin stap longpela taim insait long famili Betel bilong Yunaitet Stets, em i beten bilong kirapim program. Siaman, David Splane bilong Gavening Bodi Bilong Ol Witnes Bilong Jehova, i kirapim gretiuesen program na tokim ol papa na mama olsem: “Mipela i laik mekim bikpela tok amamas tru long yupela. Ol pasin yupela i bin helpim ol pikinini man na pikinini meri bilong yupela long kisim, i bin kirapim ol long mekim wok misineri.” Ating ol dispela papamama i tingting planti, long wanem, ol pikinini bilong ol bai go long ol longwe hap bilong mekim wok misineri. Tasol Brata Splane i tokim ol: “No ken wari long pikinini bilong yupela. Jehova inap lukautim ol gut tru, winim yupela.” Na em i tok moa: “Tingim ol gutpela samting pikinini bilong yupela bai mekim. Long rot bilong ol, ol manmeri husat i karim pen na hevi ol bai kisim samting bilong mekim gut bel bilong ol long namba wan taim long laip bilong ol.”

Rot Bilong Givim Amamas Long Ol Narapela

Siaman i kolim nem bilong 4-pela brata bai mekim tok. Namba wan, Ralph Walls bilong Brens Komiti Bilong Yunaitet Stets, i mekim tok “Ai Bilong Yu i Mas Op i Stap.” Em i tok man i aipas long ol samting bilong spirit em i stap nogut tru, winim man em ai tru bilong em i pas. Ai bilong ol Kristen long kongrigesen Laodisia long taim bilong ol aposel i no op moa long ol samting bilong spirit. Ol dispela Kristen inap kisim helpim, tasol i gutpela moa long mekim ol samting na bai ai bilong yumi i op i stap na yumi no kamap aipas long ol samting bilong spirit. (KTH 3:​14-18) Brata Walls i tok: “Ai bilong yupela i mas op i stap, na yupela i mas kisim wankain tingting olsem Jehova i gat long ol brata i gat wok insait long oganaisesen.” Ol sumatin i winim skul i no ken tingting planti tumas sapos i gat sampela hevi insait long kongrigesen. Bikpela Jisas Krais i save long olgeta samting i save kamap. Em bai stretim ol samting long taim stret.

Bihain long dispela, Samuel Herd bilong Gavening Bodi i bekim dispela askim “Yu Redi?” Man i go raun i mas kisim sampela klos i go wantaim em, na olsem tasol ol sumatin i winim skul i mas kisim ol pasin bilong nupela man olsem klos ol i werim. Ol i mas sori long ol man olsem Jisas i bin mekim. Taim lepraman i tokim Jisas: “Sapos yu laik, yu inap long mekim mi i kamap klin long ai bilong God,” Jisas i tok: “Mi laik. Yu kamap klin.” (Mak 1:​40-42) Brata Herd i tok: “Sapos yupela i laik tru long helpim ol man, bai yupela i painim rot bilong mekim olsem.” Filipai 2:3 i tokim ol Kristen long ting olsem “pasin bilong ol arapela i winim pasin bilong yupela.” Brata Herd i tok: “Pasin daun em i bikpela samting tru, winim save. Yupela i mas i gat pasin daun na bai save bilong yupela inap helpim ol man yupela i bungim long wok autim tok na ol brata na sista insait long kongrigesen.” Bilong pinisim tok em i tokim ol sumatin i winim skul olsem sapos ol i kisim pasin laikim Kristen olsem klos ol i werim, ol i redi long go long ol kantri ol bai mekim wok misineri long en, na wok bilong ol bai kamap gutpela.​—Kolosi 3:​14, NW.

Wanpela tisa bilong Skul Gileat, Mark Noumair, i kirapim tingting bilong odiens taim em i kamapim tok, “Bai Yu Holimpas Dispela Samting?” “Dispela” i makim pasin bilong yumi long tenkyu long gutpela pasin bilong Jehova. Song 103:2 i tok: “Mi mas litimapim nem bilong Bikpela, na mi no ken lusim tingting long ol gutpela samting em i bin mekim long mi.” Lain Israel i no tenkyu long mana i helpim ol long i stap laip, ol i kolim mana olsem “rabis kaikai.” (Namba 21:5) Ol yia i kam na i go na mana i bikpela samting yet bilong helpim ol long i stap laip, tasol ol i no tenkyu long dispela samting. Tisa i tok: “Sapos yupela i lusim tingting long ol samting Jehova i mekim na yupela i ting wok misineri bilong yupela i no bikpela samting, dispela bai mekim na yupela i no gat stretpela tingting long wok Jehova i bin givim long yupela.” Song 103:4 i tok Jehova i save ‘marimari na sori moa yet long yu.’ Ol sumatin bai pilim gutpela-pasin-sori bilong God insait long ol kongrigesen ol bai go long en.

Narapela tisa bilong Skul Gileat, Lawrence Bowen, i toktok long “Bai Yu Kisim Ol Blesing?” Em i tok ol sumatin bilong klas namba 119 bilong Skul Gileat i bin trening strong bilong mekim gut wok misineri. Tasol nau ol i mas pas gut wantaim Jehova na wok em i bin givim long ol. Long Kamapim Tok Hait 14:​1-4 i tok, lain 144,000 ‘i save bihainim Pikinini Sipsip i go long olgeta ples em i laik i go long en.’ Olgeta bilong dispela lain i stap gut long Jehova na Pikinini bilong em maski wanem kain traim i painim ol, na ol i winim mak bilong ol. Brata i tok: “Maski wanem samting i kamap, yumi tu i stap gut long Jehova na long wok em i bin givim long yumi.” Taim ol sumatin i mekim olsem, ol bai kisim ol blesing i kam long Jehova.​—Lo 28:2.

Wok Bilong Ol i Karim Kaikai

Long olgeta wiken long taim bilong skul, ol sumatin i bin autim tok. Taim kuskus bilong skul, Wallace Liverance, i toktok wantaim ol sumatin, samting i kamap ples klia em olsem wok bilong ol sumatin i bin karim kaikai. Ol i bin autim gutnius long tenpela tok ples na kirapim sampela Baibel stadi. Tupela marit i bin kirap stadi long Baibel wantaim wanpela man Saina. Bihain long ol i bin bungim man inap tupela taim, ol i askim em long em i ting olsem wanem long em i wok long kisim save long Jehova. Em i opim Baibel bilong em na tokim tupela long ritim Jon 17:3. Em i ting em i stap long rot i go long laip.

Anthony Morris bilong Gavening Bodi i inteviuim tripela brata bilong Brens Komiti Bilong Ekwado, Kot Diwa, na Ripablik Dominika. Ol dispela brata i tokim ol sumatin olsem ol Brens Komiti i amamas long ol i kam na ol bai helpim ol long stap gut long ples ol bai mekim wok misineri long en.

Orait nau Leonard Pearson bilong famili Betel bilong Yunaitet Stets i toktok wantaim tripela memba bilong Brens Komiti Bilong Demokratik Ripablik Bilong Kongo, Papua Niugini, na Yuganda. Ol dispela brata i strongim ol sumatin i winim skul long givim bel olgeta long wok autim tok. Tupela marit i bin mekim wok misineri winim 21 yia long Kongo i bin helpim 60 manmeri long dediket na kisim baptais. Nau dispela tupela marit i lukautim 30 Baibel stadi, na 22 sumatin bilong ol i save kam long ol miting bilong kongrigesen. I gat planti kaikai long gaden spirit, olsem na nau em i gutpela taim tru long mekim wok misineri.

Wok Strong Long Autim Tok

Gerrit Lösch bilong Gavening Bodi i mekim laspela tok. Tim bilong tok, “Autim Tok Bilong God na Jisas Long De Bilong Bikpela.” Ol kain tok olsem “autim tok,” “man bilong autim tok,” na “tokaut” i stap planti taim long Buk Kamapim Tok Hait. Olsem na Jehova i kamapim klia wok em i laik bai lain bilong em i mekim. Long wanem taim yumi mas mekim dispela wok autim tok? Jon i tok em long taim bilong “de bilong Bikpela.” (KTH 1:​9, 10) Dispela de i kirap long 1914, na em i kam inap long taim bilong yumi na i go inap long taim bihain. Olsem Kamapim Tok Hait 14:​6, 7 i tok, ol ensel i helpim wok bilong autim tok bilong God. Kamapim Tok Hait 22:17 i soim olsem lain remnan bilong ol Kristen God i bin makim i gat wok bilong stiaim wok bilong autim tok bilong Jisas. Tasol yumi olgeta i mas insait long dispela gutpela wok long nau. Long ves 20, Jisas i tok: “Bai mi kam kwiktaim.” Brata Lösch i tokim odiens: “Singaut long ol manmeri olsem, ‘Kam, na kisim wara bilong laip em presen i kam long God.’ Jisas bai kam kwiktaim. Olsem wanem? Yumi redi?”

Fred Rusk, husat i bin stap olsem tisa bilong Skul Gileat inap 11-pela yia, em i pinisim program long rot bilong beten na tok tenkyu long Jehova, na olgeta long odiens i pilim tru dispela. Dispela i pinisim gut dispela de bilong bikpela amamas.

[Blok long pes 13]

OL SAMTING BILONG OL SUMATIN

Hamas kantri ol i kam long en: 10

Hamas kantri ol bai go long en: 25

Hamas sumatin: 56

Krismas bilong ol, averes: 32.5

Hamas yia long tok i tru, averes: 16.4

Hamas yia long fultaim sevis, averes: 12.1

[Piksa long pes 15]

Klas Namba 119 Bilong Wastaua Baibel Skul Bilong Gileat

Nem bilong ol bratasista i stap daunbilo. Namba wan lain i sanap paslain, na namba 8 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.