Gutpela Sindaun Long Nupela Taim God Bai Kamapim

DAVID,a wanpela Kristen, em i go stap long Amerika. Em i ting i gutpela em i mekim olsem. Em i no laik lusim meri pikinini bilong em, tasol em i ting olsem sapos em i gat sampela mani moa, bai em inap helpim em yet wantaim famili bilong em long kisim gutpela sindaun. Olsem na taim ol wanblut i singautim em long kam stap long New York, em i orait long dispela na kwiktaim em i kisim wok mani long dispela hap.

Tasol bihain, ol samting i no kamap olsem em i bin ting. Em i no gat bikpela haptaim moa long mekim ol wok bilong God. Klostu em i lusim bilip long God. Em i no luksave gut long dispela samting, na bihain em i mekim wanpela rong. Orait nau em i luksave olsem em i bin tingim tumas ol gutpela samting bilong skin na isi isi dispela i bin pulim em long lusim olgeta samting i bikpela samting tru long em. Em i mas mekim sampela senis.

Olsem David, long olgeta yia planti man i save lusim kantri bilong ol we ol man i stap rabis tru na ol i go sindaun long narapela hap, long wanem, ol i laik helpim famili bilong ol long mani. Tasol planti taim dispela i save nogutim ol long ol samting bilong lotu. Sampela i laik save, ‘Kristen inap wok long kisim planti mani na stap gut long ai bilong God wantaim?’ Ol man bilong raitim buk na ol bikman bilong lotu ol i tok yu inap. Tasol olsem David na sampela moa i lain pinis, i hatwok tru long mekim tupela samting wantaim.​​—Luk 18:24.

Mani i No Samting Nogut

Tru, man yet i bin wokim mani. Olsem planti narapela samting man i bin wokim, mani yet i no samting nogut. Em olsem senis bilong kisim narapela samting, em tasol. Olsem na taim man i mekim stretpela wok long mani, mani inap helpim em. Baibel i tok, “mani . . . i save helpim yumi long taim nogut”​—em inap lukautim yumi na bai yumi no stap rabis. (Saveman 7:​12) Long sampela man, “mani i gutpela samting bilong mekim olgeta kain wok.”​​—Saveman 10:19.

Baibel i tok yumi mas wok strong na no ken les. Yumi mas lukautim famili tru bilong yumi, na sapos hap mani i stap yet, orait yumi gat samting bilong “helpim ol man i sot long ol samting.” (Efesus 4:​28; 1 Timoti 5:8) Baibel i kirapim yumi long amamas long ol samting yumi holim, em i no tok yumi mas sakim olgeta laik bilong skin, nogat. Em i tok yumi mas amamas long ol samting yumi kisim long hatwok yumi save mekim. (Saveman 5:​18-​20) Baibel i stori long sampela bilipman na meri em ol i maniman.

Sampela Bilipman Em Ol i Gat Planti Mani

Abraham, wanpela gutpela wokboi bilong God, i bin kisim planti sipsip na bulmakau, na planti silva na gol, na planti handet wokman na wokmeri. (Stat 12:5; 13:​2, 6, 7) Stretpela man Jop, em tu i bin holim planti samting​​—planti bulmakau na sipsip samting, bikpela lain wokboi, na planti gol na silva. (Jop 1:3; 42:​11, 12) Ol dispela man i maniman, na mani ol i holim i bikpela mani long nau tu. Tasol maski ol i maniman, ol i save stap gut long God.

God i kolim Abraham “stretpela man.” Abraham i no surik long helpim ol man na em i no tingim tumas mani kago bilong em. (Rom 4:​11; Stat 13:9; 18: 1-8) Na God i tok long Jop: “Jop em i gutpela man tru na i no gat asua long ai bilong mi.” (Jop 1:8) Oltaim Jop i redi long helpim ol rabisman na ol man i mas i gat helpim. (Jop 29:​12-​16) Abraham na Jop i bilip strong long God, ol i no bilip long mani bilong ol.​​—Stat 14:​22-​24; Jop 1:​21, 22; Rom 4:​9-​12.

King Solomon tu i wankain. Em i sindaun long sia king bilong God long Jerusalem, na God i givim em gutpela tingting na save, na biknem na planti mani tu. (1 King 3:​4-​14) Inap planti yia em i stap gut long God. Tasol taim Solomon i lapun, em i “no bihainim tru” Jehova. (1 King 11:​1-8) Samting i painim Solomon i kamapim klia olsem pasin bilong holim planti mani inap kamapim sampela hevi. Tingim sampela.

Sampela Hevi

Wanpela bikpela hevi tru i olsem: Man inap kirap laikim tumas mani na ol samting mani inap baim. Long sampela man, mani i kirapim ol long kisim planti mani moa, tasol mani ol i kisim i no save inapim ol. Taim Solomon i nupela king, em i lukim dispela pasin long sampela. Em i tok: “Sapos bel bilong man i skrap long kisim planti mani, orait oltaim bai em i ting em i sot long mani. Sapos man i tingting long kamap maniman, orait olgeta samting em i kisim i no inapim em.” (Saveman 5:​10) Bihain, Jisas na Pol i toksave long ol Kristen olsem ol i mas was gut, nogut ol i kisim pasin bilong laikim tumas mani.​​—Mak 4:​18, 19; 2 Timoti 3:2.

Taim yumi tingim tumas mani na yumi no tingim mani olsem rot tasol bilong baim samting, dispela inap pulim yumi long mekim kain kain rong, olsem pasin giaman na stil. Judas Iskariot, wanpela aposel bilong Krais, em i putim bikman bilong em long han bilong ol birua long 30 mani silva tasol. (Mak 14:11; Jon 12:6) Sampela man i laikim tumas mani, ol i no lotu moa long God, ol i lotu long mani tasol. (1 Timoti 6:​10) Olsem na taim Kristen i laik kisim sampela mani moa, em i mas tingim i gat wanem as tru na em i laik kisim.​​—Hibru 13:5.

Na tu, pasin bilong kisim planti mani inap kamapim sampela hevi i no stap long ples klia. Namba wan: Planti mani tumas inap kirapim man long bilip long em yet. Jisas i tok pasin bilong bungim planti mani “i gat strong long giamanim man.” (Matyu 13:​22, NW) Jems tu i mekim tok lukaut long ol Kristen olsem long olgeta wok ol i mekim, wok bisnis tu, ol i mas tingim God. (Jems 4:​13-​16) Mani inap helpim yumi long lukautim yumi yet, olsem na man i gat mani em i mas was gut, nogut em i bilip long mani bilong em na em i no bilip na wetim God long helpim em.​​—Sindaun 30:​7-9; Aposel 8:​18-​24.

Namba tu: Wok bilong kisim planti mani inap pulim bikpela hap taim na strong bilong man na isi isi dispela inap pulim em long lusim ol wok bilong God. David, yumi stori long em pastaim, i bin kisim save long dispela samting. (Luk 12:​13-​21) Na long ol man i maniman pinis, mani bilong ol inap pulim ol long yusim bikpela hap bilong dispela mani long ol samting bilong amamas o long ol samting bilong helpim em yet.

Taim Solomon i pundaun long ol samting bilong spirit, ating wanpela as bilong dispela i olsem: Em i bin larim ol gutpela samting bilong skin i tekewe gutpela tingting bilong em. (Luk 21:34) Em i save pinis long lo bilong God i tambuim pasin bilong maritim ol meri bilong narapela lain. Tasol bihain, em i kisim 1,000 meri. (Lo 7:3) Bilong amamasim ol dispela meri bilong ol narapela lain, em i insait long lotu bilong ol. Olsem yumi stori pinis, isi isi em i lusim Jehova.

Ol dispela stori i kamapim klia olsem tok bilong Jisas i tru, em i tok: “Yupela i no inap i stap aninit long God na long mani wantaim.” (Matyu 6:​24) Orait Kristen inap mekim wanem bilong karim ol hevi bilong mani i save painim planti man long nau? Na bikpela samting moa, i gat wanpela gutpela taim yumi ken wetim i kamap bihain o olsem wanem?

Gutpela Sindaun Tru Long Bihain

Ol disaipel bilong Jisas i holim wok bilong “mekim olgeta lain manmeri i kamap disaipel”​—Abraham, Jop, na lain Israel i no bin kisim kain wok olsem. (Matyu 28:​19, 20) Bilong mekim dispela wok, yumi mas lusim haptaim na strong, em sapos yumi no mekim dispela wok ating bai yumi mekim ol wok bilong skin tasol. Olsem na bilong yumi ken stap gut, yumi mas bihainim dispela tok bilong Jisas: “Namba wan samting yupela i mas mekim i olsem. Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting tu long yupela.”​​—Matyu 6:​33.

Klostu pasin bilong David long pas gut wantaim God na famili bilong em i laik lus, tasol bihain ol dispela samting i kamap orait gen. Olsem Jisas i tok promis pinis, taim David i putim beten, stadi long Baibel, na wok autim tok i stap nambawan gen, ol arapela samting long laip bilong em i stat long kamap gutpela. Isi isi pasin bilong pas gut wantaim meri pikinini bilong em i kamap gutpela gen. Em i kisim bek amamas bilong em. Em i bihainim yet pasin bilong wok strong. Tru, em i no kamap maniman. Tasol long ol hevi i painim em, em i bin kisim sampela gutpela skul.

David i skelim gen dispela pasin em i bin mekim long go sindaun long Amerika, na em i pasim tok long bel olsem em i no ken larim mani i bosim gen tingting bilong em. Nau em i save olsem ol bikpela samting long i stap bilong em​​—famili i gat pasin laikim, ol gutpela pren, pasin bilong pas gut wantaim God​​—em ol samting yumi no inap baim long mani. (Sindaun 17:17; 24:27; Aisaia 55:​1, 2) Tru tumas, stretpela pasin i save winim planti mani kago. (Sindaun 19:1; 22:1) Nau David, wantaim famili bilong em, i gat strongpela tingting long putim ol bikpela samting i go pas.​​—Filipai 1:​10.

Wok bilong ol man long helpim ol lain long kamapim gutpela sindaun na bihainim stretpela pasin wantaim, dispela i no bin kamap. Tasol God i promis pinis olsem Kingdom bilong em bai kamapim planti gutpela samting bilong skin na spirit inap tru long yumi ken stap gut na amamas. (Song 72:16; Aisaia 65:​21-​23) Jisas i lainim ol man olsem bilong kisim gutpela sindaun, pastaim yumi mas stap gut long ol samting bilong spirit. (Matyu 5:3) Olsem na maski yumi gat planti mani o yumi stap rabis, sapos yumi tingim ol samting bilong spirit na putim i go pas, dispela bai helpim yumi long redi long nupela taim em klostu nau God bai kamapim. (1 Timoti 6:​17-​19) Long dispela nupela taim, ol man bai stap gut long ol samting bilong skin na spirit wantaim.

[Futnot]

[Ol Piksa long pes 5]

Jop i bilip long God, em i no bilip long ol mani kago bilong em

[Ol Piksa long pes 7]

Ol samting i bikpela samting tru, em ol samting yumi no inap baim long mani