Yu Ting God i Promis Long Givim Mani Long Yu?
‘God i laik bai yumi gat planti mani, planti ka, gutpela bisnis. Bilip tasol long em, opim paus, na givim em olgeta mani yu inap givim.’
WANPELA niuspepa long Brasil i tok, dispela em wanpela tok sampela lain bilong lotu long Brasil i save mekim. Em wanpela tok planti man i bilipim. Nius Time i stori long wanpela wok painimaut long Amerika long ol lain i tok ol i Kristen, olsem: “Inap 61 pesen i ting God i laik bai ol man i gat planti mani. Na 31 pesen . . . i ting sapos yu givim mani bilong yu long God, God bai givim sampela mani moa long yu.”
Kain bilip olsem i wok long kamap bikpela long ol kantri long Latin-Amerika, olsem Brasil, na planti man i save go long ol lotu i promis long ol inap kisim mani na kago long God. Tasol olsem wanem? Tru God i promis long givim mani kago long ol man i mekim wok bilong em? Ol wokboi bilong God long bipo ol i gat planti mani kago?
Tru, long Ol Skripsa Hibru yumi ritim stori bilong ol man God i bin mekim gut long ol na ol i gat planti mani kago. Lo 8:18 i tok: “God, Bikpela bilong yumi, em yet i save givim yupela strong bilong kisim planti samting. Yupela i no ken lusim tingting long dispela.” Dispela i bin strongim ol Israel long bilip olsem sapos ol i bihainim tok bilong God, em bai givim planti samting long lain bilong ol.
Tasol olsem wanem long ol wan wan wokboi bilong God? Bilipman Jop i gat planti mani kago, na bihain long taim Satan i tekewe olgeta samting bilong em, Jehova i mekim na Jop i kisim bek ol dispela samting, “dabolim olgeta samting em i bin i gat bipo.” (Jop 1:3; 42:10) Abraham tu i gat planti samting. Stat 13:1, 2 i tok em i gat “planti sipsip na meme na bulmakau na planti silva na gol.” Taim ol ami bilong 4-pela king bilong hap Is i kisim Lot, em pikinini man bilong brata bilong Abraham, Abraham “i singautim ol strongpela man long lain bilong en, namba bilong ol inap 318.” (Stat 14:14) Insait long lain bilong Abraham i gat ol dispela 318 “strongpela man” i bin kisim trening long yusim ol samting bilong pait, olsem na ol hauslain bilong Abraham i planti tru. Abraham inap long lukautim dispela bikpela famili bilong em, olsem na yumi ken save em i mas wanpela maniman tru na em i gat planti animal.
Yes, planti gutpela wokboi bilong God long bipo—Abraham, Aisak, Jekop, Devit, Solomon, na sampela moa—ol i maniman. Tasol yu ting dispela i makim olsem God bai helpim olgeta man husat i mekim wok bilong em i kamap maniman? Na taim wanpela i stap rabis, yu ting dispela i makim olsem God i no orait long em? Stori i kamap bihain long dispela bai bekim ol dispela askim.