“Bosim Gut Wokabaut Bilong Yupela”

“Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”​—SINDAUN 14:15.

1, 2. (a) Ol samting i bin painim Lot long Sodom i lainim yumi long wanem samting? (b) Wanem mining bilong dispela tok “bosim gut wokabaut”?

TAIM Abraham i tokim Lot long go pas long makim wanem hap graun em i laik sindaun long en, Lot i lukluk long hap i gat planti wara na i “olsem naispela gaden bilong Bikpela.” Ating ples i luk gutpela tru bilong famili bilong em i ken sindaun long en, olsem na “Lot i tok long em bai i kisim olgeta graun long ples daun bilong wara Jordan” na em i wokim kem klostu long Sodom. Tasol dispela ples i no gutpela, long wanem, klostu long dispela hap i gat ‘ol manmeri bilong taun Sodom em ol i nogut tru. Ol i save mekim ol kain kain sin nogut tru long ai bilong Bikpela.’ (Stat 13:​7-13) Taim Lot na famili bilong em i stap long dispela hap, ol i karim ol bikpela hevi tru. Bihain, Lot na ol pikinini meri bilong em i sindaun insait long hul bilong ston. (Stat 19:​17, 23-26, 30) Em nau, samting pastaim Lot i ting i gutpela, em i samting nogut.

² Stori bilong ol samting i bin painim Lot i givim skul long ol wokman bilong God long nau. Taim yumi mas wokim disisen long ol samting, yumi mas tingim ol hevi inap painim yumi na yumi mas was gut, nogut namba wan tingting yumi kisim long wanpela samting i no stret. I stret Baibel i tokim yumi olsem: “Yupela i mas bosim gut wokabaut bilong yupela.” (1 Pita 1:13) Tok Grik ol i tanim olsem “bosim gut wokabaut” i makim “tingting klia.” Saveman bilong Baibel, R.C.H. Lenski i tok, tingting i klia i makim olsem “tingting i stap isi na i skelim gut ol samting na dispela i helpim yumi long wokim ol gutpela disisen.” Nau yumi ken skelim ol samting i save kamap em yumi mas tingting klia long en.

Skelim Wok Bisnis

3. Bilong wanem yumi mas was gut sapos wanpela i askim yumi long insait long wanpela wok bisnis?

³ Tingim olsem wanpela man i gat gutpela nem o wanpela wanbilip i lotuim Jehova i singautim yu long insait long wanpela wok bisnis. Em i amamas na toktok long bisnis bai kamap gutpela na em i kirapim yu long mekim samting hariap, nogut yu lus long kisim dispela gutpela samting. Ating yu kirap piksaim long tingting olsem yu na famili bai i gat gutpela sindaun, o yu inap kirap tingting olsem dispela bai helpim yu long lusim bikpela haptaim moa long mekim ol wok bilong spirit. Tasol Sindaun 14:15 i tok: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.” Amamas man i kisim taim em i kirapim nupela bisnis inap mekim na em i no ting olsem bisnis inap pundaun, o em i no ting ol samting bai i no wok gut o ol hevi inap painim em. (Jems 4:​13, 14) Long kain taim olsem, em i bikpela samting long tingting klia!

4. Olsem wanem yumi ken ‘was gut long ol pasin yumi mekim’ taim yumi tingting long insait long wok bisnis?

⁴ Man i gat savetingting em bai skelim gut wok bisnis paslain long em i wokim disisen long em bai insait long en o nogat. (Sindaun 21:5) Taim man i mekim olsem, planti taim dispela i kamapim long ples klia ol hevi em pastaim em i no bin tingim. Tingim dispela: Wanpela man i laik kisim dinau bilong kirapim wok bisnis, na em i tok em bai givim bikpela winmani long yu sapos yu givim dispela mani long em. Ating yu ting dispela i gutpela samting, tasol wanem ol hevi inap kamap? Olsem wanem? Man i kisim dinau em i tok orait long bekim dinau maski bisnis i kamap gutpela o nogat, o em bai bekim tasol dinau sapos bisnis i wok gut? Sindaun bilong yu bai gutpela yet sapos mani bilong yu i lus taim dispela bisnis i pundaun? Tingim ol dispela askim tu: “Bilong wanem man hia i wok long askim ol narapela man long givim dinau long em? Ol beng i ting dispela bisnis bilong em i no inap kamap gutpela?” Taim yu lusim haptaim bilong tingim ol hevi inap kamap, dispela bai helpim yu long skelim gut dispela wok bisnis na kisim stretpela tingting long en.​—Sindaun 13:16; 22:3.

5. (a) Jeremaia i mekim wanem gutpela samting taim em i baim wanpela hap graun? (b) Bilong wanem em i gutpela long raitim kontrak long olgeta samting bilong bisnis yu laik insait long en?

⁵ Taim profet Jeremaia i baim wanpela hap graun long kasen bilong em husat i lotuim Jehova, Jeremaia i raitim kontrak long dispela samting long ai bilong ol man. (Jeremaia 32:​9-12) Long nau tu, man i gat savetingting em bai stretim rot na olgeta wok bisnis em i laik insait long en​—wantaim wanblut o wanbilip tu​—em bai raitim kontrak long dispela samting.a Taim yu raitim klia na raitim gut ol tok bilong kontrak, dispela inap mekim na ol hevi i no kamap namel long yupela na yupela i ken stap wanbel. Tasol taim ol wokman bilong Jehova i no raitim kontrak, planti taim ol hevi bilong bisnis i kamap namel long ol. Sori tru, ol kain hevi olsem inap mekim na ol i bel hevi, bel nogut, na ol i no stap gut moa long ol samting bilong spirit.

6. Bilong wanem yumi mas was gut long pasin mangal?

⁶ Yumi mas was gut long pasin mangal tu. (Luk 12:15) Taim man i ting olsem em bai kisim bikpela winmani, dispela inap mekim na em i no ting bisnis em i laik insait long en inap pundaun. Sampela husat i bin mekim gutpela wok bilong Jehova ol i bin pundaun long dispela trap. Baibel i mekim tok lukaut long yumi: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela.” (Hibru 13:5) Taim Kristen i tingting long insait long wanpela wok bisnis, em i mas askim em yet, ‘Mi mas insait long dispela samting?’ Taim yumi no holim planti samting na wok bilong lotuim Jehova i bikpela samting long laip bilong yumi, dispela bai lukautim yumi long ‘ol bikpela hevi.’​—1 Timoti 6:​6-10.

Ol Hevi Bilong Ol Kristen Singel

7. (a) Planti Kristen singel i gat wanem hevi? (b) Taim yumi makim poroman marit, olsem wanem dispela i kamapim olsem yumi stap gut long God?

⁷ Planti wokman bilong Jehova i gat bikpela laik long marit, tasol ol i no painim yet gutpela poroman i stret long ol. Long sampela kantri, ol man i save subim ol narapela long marit. Tasol ating planti taim i no gat rot long bungim ol wanbilip ol inap maritim. (Sindaun 13:12) Tasol ol Kristen i save olsem bilong stap gut long Jehova, ol i mas bihainim tok bilong Baibel long “maritim man i bilip long Bikpela.” (1 Korin 7:39) Ol Kristen singel i mas tingting klia bambai ol i ken sanap strong long taim ol narapela i subim ol long mekim sampela samting o traim i laik pulim ol.

8. Wanem samting i painim meri Sulam? Olsem wanem wankain samting inap painim ol meri Kristen long nau?

⁸ Buk Song Bilong Solomon i stori long king i kirap laikim wanpela naispela yangpela meri ol i kolim meri Sulam. King i grisim em long rot bilong planti mani kago, bikpela namba, na switpela tok, maski meri i laikim narapela yangpela man. (Solomon 1:​9-11; 3:​7-10; 6:​8-10, 13) Sapos yu wanpela meri Kristen, wanpela man inap kirap laikim yu, maski yu no laik. Wanpela man long ples wok bilong yu, ating em wanpela husat i gat namba, em inap kirap mekim ol gutpela tok amamas long yu, mekim gutpela pasin long yu, na painim rot bilong stap wantaim yu. Yu mas was gut long ol dispela samting. Tru, ating i no olgeta taim man i mekim dispela kain pasin em i gat tingting long prenim yu o slip wantaim yu, tasol planti taim i olsem. Bihainim pasin bilong dispela meri Sulam na stap olsem “wanpela banis.” (Solomon 8:​4, 10) Sakim strong ol samting man i mekim bilong pulim yu. Taim yu nupela long wanpela ples wok, tokim ol wanwok bilong yu olsem yu wanpela Witnes Bilong Jehova na autim tok long ol taim rot i op. Dispela bai lukautim yu.

9. Wanem ol hevi inap kamap sapos wanpela i kirap prenim man em i no save long em long rot bilong Intenet? (Lukim tu blok i stap long pes 25.)

⁹ Planti man i save laikim ol Intenet Web sait i bilong helpim ol singel long painim poroman marit. Sampela i ting dispela em i rot bilong kisim save long ol man husat ol i no inap bungim long narapela rot. Tasol sapos yu kirap prenim wanpela em yu no save long em, hevi inap painim yu. Long Intenet i hatwok long save wanem tok i stret na wanem tok i no stret. (Song 26:4) Sampela man i giaman na tok ol i wokman bilong Jehova. Na tu, taim wanpela i kirap prenim narapela long rot bilong Intenet, kwiktaim em inap kirap laikim em tru, na dispela inap mekim na em i no tingting klia. (Sindaun 28:26) Maski yumi kirap prenim wanpela long rot bilong Intenet o long narapela rot, em i no gutpela long mekim olsem wantaim wanpela yumi no save gut long em.​—1 Korin 15:33.

10. Olsem wanem ol wanbilip i ken strongim bel bilong ol Kristen singel?

¹⁰ Jehova i save “sori moa yet” long ol wokman bilong em. (Jems 5:11) Em i save olsem sampela taim ol hevi i save daunim ol Kristen singel husat i no laik stap singel, na em i amamas tru long pasin bilong ol long stap gut long em. Olsem wanem ol narapela i ken strongim bel bilong ol? Planti taim yumi mas mekim gutpela tok amamas long pasin bilong ol long bihainim tok na daunim laik bilong ol yet. (Hetman 11:​39, 40) Yumi ken singautim ol tu long bung wantaim yumi bilong narapela i ken strongim narapela. Olsem wanem? Sampela taim yu save mekim olsem? Na tu, yumi ken beten askim Jehova long helpim ol long stap strong long ol samting bilong spirit na kisim amamas long mekim wok bilong em. Taim yumi tingim ol, yumi soim olsem yumi amamas tru long ol dispela gutpela bratasista wankain olsem Jehova i save amamas long ol.​—Song 37:28.

Taim Yumi Gat Sik

11. Ol bikpela sik i save kamapim wanem ol hevi?

¹¹ Yumi save bel hevi stret taim yumi yet o wanpela long famili i kisim bikpela sik! (Aisaia 38:​1-3) Yumi laik painim gutpela dokta na marasin samting, tasol em i bikpela samting long yumi mas bihainim ol stiatok bilong Baibel. Olsem: Ol Kristen i mas bihainim gut tok bilong Baibel long abrusim blut, na ol i mas abrusim ol pasin bilong glasim o oraitim sik em wok bilong ol spirit nogut i insait long en. (Aposel 15:​28, 29; Galesia 5:​19-21) Tasol ol man husat i no gat bikpela save long marasin samting, ating ol i hatwok tru long skelim ol narapela narapela rot bilong oraitim sik. Wanem samting i ken helpim yumi long tingting klia?

12. Olsem wanem Kristen i ken holimpas stretpela tingting taim em i skelim wanem marasin samting em bai kisim?

¹² Long rot bilong mekim wok painimaut long Baibel na ol buk na nius Kristen, “man i gat gutpela tingting, em i save was gut long ol pasin em i mekim.” (Sindaun 14:15) Long sampela hap bilong graun i no gat planti dokta na ol haus sik, olsem na ol man inap kisim marasin bilong ples tasol, olsem ol lip bilong bus samting. Sapos yumi tingting long kisim kain marasin olsem, yumi ken kisim gutpela save long dispela long Wastaua bilong Novemba 1, 1987, pes 28-31. Em i stori long ol hevi bilong dispela kain marasin. Ating yumi mas kisim save long ol samting olsem: Dispela dokta bilong ples i save insait long wok bilong ol spirit nogut? As bilong ol samting dokta i mekim em bilip bilong ol man olsem ol god (o spirit bilong ol tumbuna) i kros na ol i kamapim sik o dai, o ol birua i bin mekim sanguma samting? Ol ofa, o singsing majik, o samting bilong ol spirit nogut i insait long wok bilong redim o yusim marasin? (Lo 18:​10-12) Kain wok painimaut bai helpim yumi long bihainim dispela tok: “Yupela i mas skelim gut olgeta tok na pasin. Na yupela i mas holimpas ol gutpela pasin.”b (1 Tesalonaika 5:21) Dispela bai helpim yumi long holimpas stretpela tingting.

13, 14. (a) Olsem wanem yumi ken bihainim stretpela tingting long pasin bilong lukautim helt bilong yumi? (b) Bilong wanem yumi mas bihainim stretpela tingting taim yumi toktok long helt na ol marasin samting wantaim ol narapela?

¹³ Yumi mas bihainim stretpela tingting long olgeta wokabaut bilong yumi, long ol samting bilong helt bilong yumi tu. Taim yumi mekim ol samting bilong lukautim helt bilong yumi, dispela i soim olsem yumi tingim tru laip em i gutpela presen. Taim yumi gat sik, i stret yumi mekim sampela samting. Tasol long nau yumi no inap kisim bodi i gutpela olgeta, yumi mas wet long taim bilong God long “mekim orait ol manmeri bilong olgeta lain man.” (KTH 22:​1, 2) Yumi mas was gut long pasin bilong tingting tumas long helt bilong yumi na yumi no tingim ol samting bilong spirit.​—Matyu 5:3; Filipai 1:10.

¹⁴ Yumi mas bihainim stretpela tingting taim yumi toktok wantaim ol narapela long helt na ol marasin samting. Yumi no ken toktok long ol dispela samting tasol taim yumi bung wantaim ol bratasista bilong spirit long ol miting Kristen na kibung. Na tu, taim man i mas makim wanem marasin samting em bai kisim, em i mas tingim ol stiatok bilong Baibel, maus bilong bel bilong em, na pasin bilong em long stap gut long Jehova. Olsem na em i no gutpela pasin long strong long wanbilip i mas bihainim tingting bilong yumi o yumi strong long em i no ken bihainim maus bilong bel bilong em. Yumi ken askim ol strongpela brata o sista long kongrigesen long helpim yumi, tasol olgeta wan wan Kristen i mas “karim hevi bilong pasin ol yet i mekim,” na “yumi olgeta wan wan bai yumi mas tokim God long as bilong olgeta pasin yumi bin mekim.”​—Galesia 6:5; Rom 14:​12, 22, 23.

Taim Yumi Gat Hevi

15. Ol hevi inap mekim wanem long yumi?

¹⁵ Ol hevi inap mekim na ol wokman i stap gut long Jehova ol i mekim sampela tok o pasin i no stret. (Saveman 7:​7, NW) Taim bikpela traim i painim Jop, em i kisim sampela tingting kranki na narapela i mas stretim tingting bilong em. (Jop 35:​2, 3; 40:​6-8) Maski “Moses em i man bilong daunim em yet, na i no gat wanpela man long dispela graun i save daunim em yet inap olsem Moses,” wanpela taim em i belhat na em i mekim tok i no stret. (Namba 12:3; 20:​7-12; Song 106:​32, 33) Devit i bosim gut bel na em i no bin kilim i dai King Sol, tasol taim Nabal i toknogutim em na singaut bikmaus long ol wokman bilong em, Devit i belhat na em i no tingting gut. Taim Abigel i toktok gut long em, Devit i kisim gutpela tingting na em i no mekim samting inap kamapim bikpela hevi tru.​—1 Samuel 24:​2-7; 25:​9-13, 32, 33.

16. Wanem samting inap helpim yumi na bai yumi no kirap kwik long mekim samting?

¹⁶ Ol hevi inap painim yumi tu na dispela inap mekim na yumi no bihainim gutpela tingting. Taim yumi skelim gut tingting bilong ol narapela, olsem Devit i bin mekim, dispela inap helpim yumi na bai yumi no kirap kwik long mekim samting na mekim bikpela rong. (Sindaun 19:2) Na tu, Baibel i tokim yumi: “Sapos bel bilong yupela i hat, orait yupela lukaut. Nogut yupela i mekim sin.” (Efesus 4:26) Em i gutpela long yumi wet i go inap long bel i kol na bihain yumi mekim samting o wokim disisen. (Sindaun 14:​17, 29) Yumi ken beten askim Jehova long helpim yumi, na bai ‘bel isi God i save givim yumi, em bai i mekim yumi i stap bel isi tru, na long dispela pasin yumi bai i pas gut wantaim Krais Jisas, na bel na tingting bilong yumi bai i stap gut tru.’ (Filipai 4:​6, 7) Dispela bel isi God i save givim, em bai strongim yumi na i helpim yumi long tingting klia.

17. Bilong wanem yumi mas askim Jehova long helpim yumi long tingting klia na bosim gut wokabaut bilong yumi?

¹⁷ Maski yumi olgeta i wok strong long abrusim ol samting nogut na bihainim savetingting, yumi olgeta i save popaia. (Jems 3:2) Ating klostu yumi laik mekim wanpela bikpela rong na yumi no luksave long dispela. (Song 19:​12, 13) Na i no dispela samting tasol, yumi ol man i no gat save na yumi no gat rait long stiaim wokabaut bilong yumi yet na yumi no tingim Jehova. (Jeremaia 10:23) Yumi amamas tru long em i tokim yumi olsem: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.” (Song 32:8) Yes, taim Jehova i helpim yumi, yumi inap tingting klia na bosim gut wokabaut bilong yumi.

[Ol Futnot]

Bai Yu Bekim Olsem Wanem?

Olsem wanem yumi inap tingting klia

• taim wanpela i singautim yumi long insait long wok bisnis?

• taim yumi laik painim poroman marit?

• taim yumi gat sik?

• taim yumi gat hevi?

[Blok long pes 25]

Yu Inap Bilip Long En o Nogat?

Ol dispela tok i stap long ol Web sait bilong ol singel:

“Maski mipela i wok strong long painimaut olsem ol man i salim tok long dispela Web sait ol i husat, mipela i no inap save ol i husat tru.”

“Mipela i no inap tok promis olsem ol tok bilong dispela Web sait i stret olgeta o inap helpim ol man.”

“Tingting bilong ol man, ol tok bilong helpim man, na ol tok ol man i mekim, na ol narapela tok i stap long [dispela] Web sait i kam long ol man i bin raitim ol dispela tok . . . na ating yumi no ken bilip olgeta long en.”

[Piksa long pes 23]

“Man i gat gutpela tingting, em i save was gut long ol pasin em i mekim”

[Ol Piksa long pes 24, 25]

Olsem wanem ol meri Kristen i ken bihainim pasin bilong meri Sulam?

[Piksa long pes 26]

“Yupela i mas skelim gut olgeta tok na pasin. Na yupela i mas holimpas ol gutpela pasin”