Askim

Sapos Kristen i draivim ka na em i insait long wanpela eksiden we ol narapela i dai, kongrigesen i gat wok long mekim wanem?

Kongrigesen i mas skelim olsem draiva i gat asua long blut o nogat. As na kongrigesen i mas tingim dispela samting i olsem: Ol i laik bai kongrigesen i no ken i gat hap asua long blut. (Lo 21:​1-9; 22:8) Draiva i insait long wanpela eksiden we narapela i dai, em inap i gat asua long blut sapos em i no bin was gut o em i bin sakim wanpela lo bilong rot em gavman i putim. (Mak 12:14) Tasol i gat sampela samting moa kongrigesen i mas tingim.

Long Israel bipo, man i kilim narapela i dai na i ranawe i go long wanpela taun bilong hait, em i mas sanap long kot. Sapos ol i painimaut olsem em i no bin tingting long kilim man i dai, orait ol i larim em i stap long dispela taun na bai man bilong bekim bek dai bilong wanblut bilong em i no ken kilim dispela man. (Namba 35:​6-​25) Olsem na sapos Kristen i draivim ka na eksiden i kamap we narapela i dai, ol elda i mas skelim dispela samting na bai ol i ken save Kristen i gat hap asua long blut o nogat. Tingting bilong polis o disisen bilong kot i no inap bosim olgeta samting kongrigesen bai mekim.

Olsem: Kot inap tok man i gat asua long brukim wanpela lo bilong rot, tasol taim ol elda i skelim dispela samting, ol i kisim save olsem em i no gat asua long blut, long wanem, samting i bin kamapim indai, em samting draiva i no bin save long en na i no gat rot long pasim. O kot inap tok em i no gat asua, tasol taim ol elda i skelim, ol i kisim save olsem em i gat asua long blut.

Disisen bilong ol elda i mas stret wantaim ol tok bilong Baibel na ol samting tru i bin kamap: Draiva yet i tokaut em i bin mekim rong o i gat tupela o tripela man i stap olsem witnes bilong eksiden em ol elda inap bilip long ol. (Lo 17:6; Matyu 18:​15, 16) Sapos ol i kisim save olsem draiva i gat asua long blut, ol i mas makim wanpela komiti bilong harim kot. Sapos komiti i lukim olsem em i hevi tru long rong bilong em, orait ol bai givim em sampela tok bilong Baibel bilong stretim em na putim tambu long em long ol asainmen bilong wok em inap mekim long kongrigesen. Em i no inap holim wok olsem elda o kongrigesen sevan. Na i gat sampela tambu moa ol bai putim long em. Na God bai skelim em long pasin bilong em long em i no bin was gut o tingting gut na nau eksiden na dai i bin kamap.​​—Galesia 6:​5, 7.

Olsem: Sapos i gat bikpela win na ren long taim bilong eksiden, orait draiva i gat wok long was gut moa yet. Sapos em i bin ai slip, em i mas askim narapela long draivim ka.

Olsem wanem sapos draiva i bin kalapim mak bilong spit? Taim Kristen i kalapim mak bilong spit, dispela i soim olsem em i sakim dispela tok, “Samting bilong Sisar, em yupela i mas givim long Sisar.” Na i soim olsem em i no tingim laip i samting holi, long wanem, taim man i spit, eksiden inap kamap na man i dai. (Matyu 22:21) I gat narapela samting tu bilong tingim. Sapos elda i no bihainim gut ol lo bilong rot em gavman i putim o long laik bilong em yet em i save sakim, yu ting em i stap wanem kain piksa long ol brata na sista i ken bihainim?​—1 Pita 5:3.

Sapos Kristen i laik bai ol arapela i mas kamap long wanpela hap long wanpela taim stret, em i no ken makim sotpela taim tumas; nogut ol i kalapim mak bilong spit bilong ol i ken kamap long dispela taim. Na Kristen i draivim ka, em yet i mas skelim gut taim bilong em na bai em i gat bikpela haptaim liklik bilong ron long rot. Sapos em i mekim olsem, bai em i no gat laik long kalapim mak bilong spit​—em bai bihainim ol lo bilong rot em “gavman” i putim. (Rom 13:​1, 5) Dispela bai helpim draiva na bai eksiden i no ken kamap we wanpela i dai na ating draiva i gat asua long blut. Na em bai stap gutpela piksa bilong ol arapela i ken bihainim na bel bilong em i no gat tok.​​—1 Pita 3:​16.