Yu Ting Baibel i Save Pasim Yumi Tumas?

WANPELA yangpela man long Finlan i tok: “Taim mi pikinini yet, papamama i no bin skulim mi long ol lo bilong Baibel. Mipela i no toktok liklik long God.” Long nau planti i go bikpela insait long kain famili olsem. Planti man, na moa yet ol yangpela, i ting ol tok bilong Baibel i bilong ol lain bilong bipo tasol na ol tok bilong en i pasim ol tumas. Ol man i gat laik long bihainim ol tok bilong Baibel, ol narapela i ting ol i stap nogut, long wanem, i gat planti tambu na lo ol i mas bihainim. Olsem na planti i ting mobeta ol i no ritim Baibel na ol i painim narapela rot bilong kisim ol tok bilong stiaim ol.

Wanpela as na ol i kisim dispela kain tingting long Baibel em olsem: Inap planti handet yia pinis ol misin i bin daunim tru ol man. Long yia 500 i go inap 1000 samting, ol man i kolim dispela haptaim olsem Taim Bilong Tudak, Misin Katolik long Yurop i bosim strong olgeta samting long i stap bilong ol man. Sapos man i no wanbel wantaim misin, ol i givim bikpela pen moa long em na ol i ken kilim em i dai tu. Ol narapela lotu i gat nem Kristen i kamap bihain, ol tu i putim planti tambu long ol man. Long nau, taim sampela i harim dispela tok “lotu Kalvin” o “lotu Puritan,” ol i no tingim tasol ol lain bilong sampela kain bilip​—ol i tingim tu ol strongpela strafe ol dispela lotu i save givim long lain bilong ol. Em nau, ol man i tingim ol hatpela pasin na planti tambu bilong ol lotu, olsem na ol i kisim tingting kranki olsem ol tok bilong Baibel i daunim ol man.

Tasol inap olsem 200 yia pinis, ol misin long sampela kantri i bin lusim bikpela strong bilong ol long bosim ol man. Taim ol man i no strong tumas moa long bihainim ol bilip bilong lotu, ol man i ting em rait bilong ol man yet long skelim wanem samting i stret o i no stret. Orait wanem samting i kamap long dispela? Ahti Laitinen, wanpela profesa bilong ol samting bilong kot i tok: “Long nau planti man i no rispek moa long ol lo, na tingting bilong ol man long wanem samting i stret o i no stret i no klia moa.” Na sampela bikman bilong lotu tu i gat wankain tingting. Wanpela bisop Luteran i tok: ‘Mi no laik tingting olsem Baibel o wanpela lotu i helpim yumi long save wanem samting i stret o i no stret.’

Yu Ting i Gutpela Long i Stap Fri Olgeta?

Ating sampela man, na moa yet ol yangpela, ol i ting i gutpela tru sapos ol i stap fri olgeta na i no gat ol tambu i pasim ol. Planti i no laik bai narapela i daunim ol olsem ol i no gat save, o ol i mas bihainim planti lo na tambu. Tasol yu ting olgeta man i mas i stap fri na mekim olgeta samting long laik bilong ol yet? Bilong bekim dispela askim, tingim tok piksa olsem: Wanpela taun i no gat ol trafik lo. Ol draiva i no gat wok long kisim laisens, na polis i no traim save bilong ol man long draivim ka. Ol i ken draiv long laik bilong ol yet, na maski ol i spak ol i ken draiv, na ol i ken spit, na maski long tingim ol stop sain o ol trafik lait samting, na ples ol manmeri i save brukim rot. Yu ting i gutpela sapos yumi stap “fri” long mekim olsem? Nogat tru! Ol samting bai paul nabaut na planti bikpela bagarap bai kamap. Tru, ol trafik lo i save pasim ol man liklik, tasol yumi save ol dispela lo i save lukautim ol draiva na ol manmeri i wokabaut long rot.

Na olsem tasol, Jehova i save tokim yumi long yumi mas i stap olsem wanem. Dispela i save helpim yumi. Sapos em i no soim rot long yumi, orait yumi mas traim traim na popaia nabaut bambai yumi ken lain long ol samting, na dispela bai nogutim yumi yet na ol narapela. Sapos olgeta man i mekim nabaut olsem, na i no gat lo i bosim ol, dispela bai nogut na em inap bagarapim ol man wankain olsem ol i draivim ka long taun i no gat ol trafik lo. Tru tumas, yumi mas i gat sampela lo, na planti man i wanbel long dispela.

“Samting Mi Givim Yupela Bilong Karim, Em i No Hevi”

Tru, ol trafik lo i gat longpela lista bilong ol samting yumi mas mekim o yumi no ken mekim. Tasol Baibel i no gat wanpela longpela lista bilong ol samting yumi mas mekim o yumi no ken mekim. Em i kolim ol stiatok, na ol dispela stiatok i no putim hevi long yumi o daunim yumi. Jisas Krais i mekim gutpela singaut long ol man, olsem: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. . . . Samting mi givim yupela bilong karim, em i no hevi.” (Matyu 11:​28, 30) Aposel Pol i tokim kongrigesen Kristen long Korin: “Sapos Spirit bilong Bikpela i stap long wanpela man, orait i no gat wanpela samting i pasim dispela man. Nogat. Em i stap fri.”​—2 Korin 3:17.

Tasol ol i no stap fri olgeta. Jisas i tokaut klia olsem yumi mas bihainim sampela lo bilong mekim ol samting God i laikim. Jisas i tokim ol disaipel: “Lo bilong mi em i olsem. Yupela wan wan i mas laikim tru ol arapela, long wankain pasin olsem mi bin laikim yupela.” (Jon 15:12) Sapos olgeta man i bihainim dispela tok, i stap bilong yumi bai i gutpela tru, a? Olsem na ol Kristen i stap fri, tasol ol i no stap fri olgeta. Aposel Pita i tok: “Yupela i mas wokabaut olsem ol man i stap fri. Tasol yupela i no ken ting, ‘Nau mipela i stap fri,’ na yupela i go mekim ol kain kain pasin nogut. Nogat. Yupela i mas wokabaut olsem ol wokboi bilong God.”​—1 Pita 2:16.

Olsem na maski i no gat longpela lista bilong ol lo ol Kristen i mas bihainim, ol i no save bihainim tingting bilong ol yet long wanem samting i stret o i no stret. Ol manmeri i mas i gat ol tok bilong soim rot long ol, na God tasol inap givim long ol. Baibel i tok klia: “Mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Sapos yumi bihainim rot God i makim, dispela bai helpim tru yumi.​—Song 19:11.

Wanpela gutpela samting yumi kisim, em amamas. Dispela yangpela man yumi stori pastaim long em, bipo em i stilman na man bilong giaman. Na tu, em i save mekim pasin pamuk. Tasol taim em i kisim save long ol lo bilong Baibel, em i senisim pasin bilong em na bai i stret wantaim ol dispela lo. Em i tok: “Tru, mi no inap kirap wantu tasol long bihainim olgeta lo bilong Baibel. Tasol mi save ol dispela lo bai helpim mi tru. Wokabaut bilong mi bipo i no bin givim amamas long mi olsem dispela amamas nau mi kisim. Taim yu bihainim ol lo bilong Baibel, bai yu no tingting planti long painim ol kain kain samting. Yu save long as na yu stap laip na wanem samting i stret na wanem samting i no stret.”

Kain samting olsem i bin painim planti milion manmeri. Ol stiatok bilong Baibel i bin helpim ol long i stap gut wantaim ol narapela man, kisim stretpela tingting long wok, lusim ol pasin i save nogutim ol, na dispela i helpim ol long i stap amamas. Markus,a em wanpela yangpela man em bipo em i no bin bihainim ol lo bilong Baibel tasol nau em i save bihainim, na em i stori long i stap bilong em olsem: “Mi save bihainim ol tok bilong Baibel long i stap bilong mi, olsem na nau mi amamas long mi yet.”b

Yu Laikim Wanem Samting?

Orait olsem wanem? Baibel i save pasim yumi? Yumi ken tok yes​—na dispela i bilong helpim yumi olgeta. Tasol yu ting Baibel i save pasim yumi tumas? Nogat. Sapos yumi stap fri long bihainim olgeta laik bilong yumi, planti hevi tasol bai painim yumi. Ol lo bilong Baibel i stret, na ol i save helpim yumi long i stap gutpela na amamas. Markus i tok: “Sampela yia i go pinis na mi lukim olsem pasin bilong bihainim ol tok bilong Baibel em i savepasin. Long planti samting, i stap bilong mi i narapela kain long i stap bilong ol man bilong graun, tasol mi no ting mi bin lus long sampela gutpela samting tru.”

Taim yu bihainim ol tok bilong Baibel long i stap bilong yu na yu lukim olsem dispela i helpim yu, bai yu pilim tru na amamas moa long Tok Bilong God. Na bai yu kisim wanpela gutpela samting moa long en​—bai yu laikim tumas man i As bilong ol dispela lo, em God Jehova. “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”​—1 Jon 5:3.

Jehova em i Man Bilong Wokim yumi na Papa bilong yumi. Em i save wanem samting inap helpim tru yumi. Em i no save pasim yumi​—em i save soim rot long yumi bilong helpim yumi. Jehova i givim gutpela tok long yumi olsem: “Sapos yupela i bin harim tok bilong mi, orait nau yupela inap i stap gut na . . . amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.”​—Aisaia 48:18.

[Ol Futnot]

[Piksa long pes 9]

Jisas i tok ol lo bilong God i givim nupela strong long yumi

[Piksa long pes 10]

Pasin bilong bihainim tok bilong Jehova i helpim yumi long stap amamas na laikim yumi yet