Askim

Bilong wanem Baibel New World Translation i tok long Lo 31:2 olsem Jehova i “no ken larim” Moses i stap lida moa bilong ol Israel, tasol sampela Baibel i tok em i no inap mekim olsem?

Long tok Hibru ol inap tanim dispela hap tok long tupela rot, tasol long sampela Baibel dispela ves i makim olsem klostu long taim em i dai, skin bilong Moses i no gat strong moa, olsem na em i no inap mekim bikpela wok bilong i stap lida bilong ol Israel. Wanpela Baibel (The New English Bible) i tanim tok bilong Moses olsem: “Nau mi gat 120 krismas pinis na mi no inap moa long i go i kam long laik bilong mi.” Na narapela Baibel (The New American Bible) i mekim wankain tok: “Nau mi . . . no inap moa long i go i kam long laik bilong mi.”

Tasol Lo 34:7 i soim olsem maski Moses i lapun, strong bilong em i no pinis. Dispela ves i tok: “Moses i gat 120 krismas pinis na em i dai. Na em i strongpela yet, na ai bilong en i gutpela.” Olsem na Moses i gat strong yet long i stap lida bilong ol Israel, tasol i no laik bilong Jehova long em i mekim yet dispela wok. Dispela i kamap klia long tok bilong Moses, em i tok moa olsem: “Bikpela i tokim mi olsem, bai mi no inap brukim wara Jordan.” I luk olsem Jehova i kamapim gen tok em i bin mekim long Moses long wara bilong Meriba.​—Namba 20:​9-12.

Moses i bin i stap longpela taim na em i mekim planti bikpela samting tru, na yumi inap brukim laip bilong em i go long tripela hap, olsem: Inap 40 yia em i stap long Isip na em i “skul long olgeta gutpela save bilong ol Isip, na em i kamap man bilong mekim ol strongpela toktok na ol kain kain strongpela wok.” (Aposel 7:​20-22) Inap 40 yia moa em i stap long Midian. Long dispela hap em i wok long kisim ol gutpela pasin bilong spirit em i mas i gat bambai em i ken i stap lida bilong lain bilong Jehova. Orait long laspela 40 yia bilong em, Moses i stiaim na bosim ol Israel. Tasol nau Jehova i tingting pinis olsem Josua yet bai i stap lida na bringim lain Israel i go brukim wara Jordan na go insait long Graun Bilong Promis, na Moses, nogat.​—Lo 31:3.

Olsem na Baibel New World Translation i kamapim stret mining bilong Lo 31:2. Moses i no ken i stap moa olsem lida bilong ol Israel, tasol i no olsem skin bilong em i no gat strong moa long mekim, nogat, Jehova yet i no larim em i mekim olsem.