Skulim Ol Pikinini Bilong Yu Long Bekim Tok

PERLA, wanpela meri long Meksiko, i tingim bek taim em i bin liklik, mama bilong em i save helpim em long redim ol sotpela bekim bilong Stadi Wastaua. Nau Perla i gat wanpela pikinini man i gat faipela krismas. Em i save helpim pikinini bilong em olsem wanem? Em i tok, “Pastaim mi yet i mas redim Wastaua. Taim mi mekim olsem, mi painim paragraf em pikinini inap kisimgut tok bilong en, wanpela paragraf we em inap kamapim bekim long toktok bilong em yet. Nau mipela i redim dispela paragraf em i kolim olsem, ‘paragraf bilong mi.’ Mi tokim em long stori long paragraf long rot bilong ol samting i save kamap long olgeta de. Mipela i save traim dispela bekim planti taim. Mipela i mekim wok long wanpela samting em sais bilong en i olsem maikrofon na bai em inap lain gut long holim maikrofon taim em i bekim tok. Mi amamas tru olsem long olgeta miting em i save bekim tok o apim han bilong bekim tok. Planti taim em i save go lukim brata bilong lukautim Stadi Wastaua paslain long miting i kirap na toksave long wanem paragraf em i laik bekim tok long en.”

Jens, wanpela elda long wanpela grup i save mekim tok ples Hindi, em i gat tupela pikinini man, ol i gat tupela na fopela krismas. Taim em na meri bilong em i redim miting wantaim ol pikinini bilong ol, ol i bihainim wanpela kain pasin Jens i bin lainim long papamama bilong em. Em i tok: “Mipela i skelim wanem hap bilong stadi ol pikinini inap kisimgut tok bilong en. Mipela i traim long kamapim long ol, ol bikpela tok o astingting bilong dispela stadi, bihain mipela i kamapim ol askim mipela i laik bai ol i bekim long miting. Planti taim mipela i kirap nogut olsem ol i bekim tok long toktok bilong ol yet. Tok ol i bekim i kamapim klia wanem ol tok ol i kliagut long en. Long dispela rot ol bekim bilong ol i givim biknem long Jehova na i kamapim tu bilip bilong ol.”