Bel Isi Bilong Krismas Long Olgeta De Bilong Yia?
“Litimapim nem bilong God i save stap antap tru. Na long graun ol manmeri God i belgut long ol, ol i ken i stap bel isi.”—Luk 2:14, NW.
PLANTI milion manmeri i save long dispela tok bilong ol ensel bilong God taim ol i tokaut long ol wasman i lukautim ol sipsip bilong ol long nait olsem mama i bin karim Jisas. Long taim ol lotu i tok mama i bin karim Jisas, planti lain em ol i tok ol i Kristen ol i save wok strong long mekim pasin bilong ol i kamap gutpela. Long dispela taim bilong Krismas ol i gat bikpela tingting long i stap belgut, bel isi, na mekim gut long ol man—em ol pasin ol ensel i bin tokaut long en—na planti i save kolim dispela olsem bel isi bilong Krismas.
Ol dispela kain gutpela tingting na pasin i save pulim ol man, maski ol i no tingim Krismas olsem wanpela bikpela de bilong lotu. Ol tu i amamas long pasin bilong laikim ol narapela olsem Krismas i save kamapim. Long taim bilong Krismas, planti ol i save kisim malolo long skul na long wok, na dispela i mekim na ol inap bung wantaim famili na ol pren bilong ol, o painim sampela amamas bilong ol yet. Tasol planti manmeri i gat stretpela bel ol i tingim Krismas olsem taim bilong givim biknem long Jisas Krais.
Maski ol i gat wanem tingting long Krismas, planti ol i tokaut olsem ol gutpela tingting na pasin em Krismas i save kamapim, em i no save stap longpela taim. Kwiktaim ol man i save kirap bihainim gen pasin ol i bin mekim pastaim. Wanpela stori, nem bilong en “Bel Isi Bilong Krismas,” em i kamap long wanpela nius bilong Royal Bank Bilong Kanada, i tok: “Planti ‘Kristen’ i save bihainim dispela pasin insait long sampela wik tasol long olgeta yia, na ol i save belgut na mekim gutpela pasin long ol man i go inap long pinis bilong bikpela de Nuyia, na nau ol i ken kirap gen long resis wantaim ol narapela long kisim ol samting bilong ol yet tasol na ol i no tingim bikpela hevi i save kamap long sindaun bilong ol narapela lain.” Na dispela stori i tok moa olsem, “samting i no stret” long dispela bel isi bilong Krismas, em ol man i no save bihainim dispela pasin long “olgeta de bilong yia.”
Maski yu wanbel long dispela tok o nogat, em i save kamapim sampela bikpela askim. Yu ting ol manmeri inap kamapim pasin bilong givim samting long ol narapela man na tingim gut ol long olgeta taim? Dispela tokaut bilong ensel long nait mama i bin karim Jisas, yumi ken bilip olsem bihain em bai kamap tru? O yu ting bel isi tru tru i no inap kamap long graun na em i olsem wanpela tingting nating tasol bilong ol man?