Lain i Pinis Long Skul Gileat i Kisim Tok Ol i Pilim Long Bel
LONG Septemba 9, 2006, gretiuesen bilong namba 121 klas bilong Wastaua Baibel Skul Bilong Gileat i kamap long Wastaua Ediukesen Senta long Patterson, New York. Em i wanpela gutpela program.
Geoffrey Jackson, em wanpela memba bilong Gavening Bodi Bilong Ol Witnes Bilong Jehova, em i kirapim program na i tok welkam long 56 manmeri i pinis long skul na 6,366 manmeri bilong planti kantri em ol i bung long gretiuesen. Em i kamapim tok bilong Song 86:11, i tok: “Bikpela, yu mas skulim mi gut long pasin yu laik mi mekim, na oltaim bai mi bihainim laik bilong yu. Lainim mi gut bai mi tingting long yu wanpela tasol, na mi mekim wok bilong yu oltaim.” Brata Jackson i stori long 3-pela samting em dispela Song 86 ves 11 i kolim. Em i tok: “Namba wan hap i toktok long skul; na namba tu i toktok long pasin bilong bihainim tok; na namba tri hap i toktok long laik bilong mekim wok. Dispela 3-pela samting i bikpela samting long yupela ol misineri taim yupela i go long ol kantri yupela bai mekim wok misineri long en.” Bihain em i kolim ol tok na ol inteviu bai kamap, em ol i stori gut long dispela 3-pela samting.
Ol Gutpela Tok Bilong Skulim Ol
William Malenfant, em wanpela brata bilong hetkota, em i kamapim tok “Nambawan Gutpela Rot.” Em i stori long Maria, susa bilong Marta. Wanpela taim Jisas i go long haus bilong tupela, na Maria i sindaun klostu long lek bilong Jisas na harim tok bilong em, dispela i olsem nambawan bikpela samting long em. Jisas i tokim Marta: “Dispela samting Maria i laik kisim, em i gutpela samting tru, olsem na yumi no ken pasim em long kisim dispela gutpela samting.” (Luk 10:38-42) Brata i tok: “Tingim dispela samting. Inap oltaim oltaim bihain Maria bai tingim olsem em i bin sindaun klostu long lek bilong Jisas na em i harim ol gutpela tok i tru, long wanem, em i makim dispela gutpela samting.” Em i tok amamas long ol sumatin i pinis long skul long ol i makim gutpela samting bilong spirit long mekim, na bihain em i tok: “Ol disisen bilong yupela i bin stiaim yupela i go long nambawan gutpela rot long bihainim.”
Orait nau Anthony Morris, em wanpela memba bilong Gavening Bodi, em i mekim tok, “Pasim Jisas Krais Olsem Klos,” na dispela tok i kam long Rom 13:14. Olsem wanem yumi inap mekim olsem? Brata Morris i tok: “Pasin bilong ‘pasim Bikpela Jisas Krais olsem klos’ i makim olsem yumi mas bihainim pasin na tingting bilong Bikpela. Pasin bilong Jisas i mekim na ol man i no pret long em, long wanem, em i save tingim ol tru na ol man i luksave long dispela.” Orait nau brata i stori long olsem wanem ol sumatin i bin kisim planti save long skul na bai ol i ken kliagut long tok i tru ‘i bikpela tru na i longpela moa na i go antap tru na i go daun moa,’ olsem Efesus 3:18 i tok. Tasol em i kirapim ol long tingim tok bilong Efesus 3 ves 19, i tok: “Pasin bilong Krais long laikim tru ol arapela, em i winim olgeta save, tasol yupela i ken save tru long en.” Brata Morris i tokim ol sumatin: “Taim yupela i mekim stadi bilong yupela yet, tingim olsem wanem yupela inap bihainim pasin laikim bilong Krais na ‘pasim Bikpela Jisas Krais olsem klos bilong yupela.’ ”
Ol Laspela Tok Bilong Ol Tisa
Orait nau wanpela tisa bilong Skul Gileat, Wallace Liverance, em i mekim tok. Tim bilong tok i kam long Sindaun 4:7. Em i tok gutpela tingting na save i kam long God em i bikpela samting, na tu, yumi mas kliagut long ol samting, na dispela i helpim yumi long skelim gut olsem wanem wanpela samting i wok wantaim narapela samting, na bai yumi inap kisimgut mining bilong en. Brata i kamapim klia olsem pasin bilong kliagut long ol samting i save kamapim amamas. Olsem, long taim bilong Nehemia, ol Livai i “autim as bilong lo” na bai “ol manmeri i ken save gut.” Bihain ol manmeri i “amamas,” long wanem, “nau ol i save gut long as bilong lo bilong God.” (Nehemia 8:7, 8, 12) Bilong pinisim tok bilong em, Brata Liverance i tok: “Pasin bilong kliagut long Tok Bilong God i save kamapim amamas.”
Narapela tisa bilong Skul Gileat, Mark Noumair, em i mekim tok, “Husat Tru i Birua Bilong Yu?” Long taim bilong pait, sampela soldia i save dai, long wanem, ol wanlain bilong ol yet i save popaia na sutim ol. Em i tok: “Olsem wanem long pait bilong spirit yumi insait long en? Sapos yumi no was gut, yumi inap paul long husat tru i birua bilong yumi na yumi inap bagarapim lain bilong yumi yet.” Pasin bilong jeles inap paulim tingting bilong sampela. Pasin bilong jeles i mekim na King Sol i laik kilim i dai Devit, em wanlotu bilong em, tasol birua tru bilong em, em ol Filistia. (1 Samuel 18:7-9; 23:27, 28) Orait brata i tok moa: “Bai yu mekim wanem sapos yu wok wantaim wanpela misineri i gat save long planti samting? Bai yu mekim sampela tok bilong bagarapim em, o bai yu tingim olsem i gat sampela i winim yu long sampela samting? Sapos yumi tingting strong long ol popaia bilong ol narapela, dispela inap paulim yumi na yumi no luksave long husat tru i birua bilong yumi. Yumi mas pait long birua tru bilong yumi, em Satan.”
Ol Gutpela Ekspiriens na Ol Inteviu
Orait nau Lawrence Bowen, em wanpela tisa bilong Skul Gileat i mekim tok. Nem bilong tok, “Yu Mas Mekim Wok Bilong Autim Gutnius,” na dispela tok i gat ol inteviu na ol ekspiriens long en. Brata i tok, sta i stap daunbilo long 2 Timoti 4:5 long Baibel New World Translation of the Holy Scriptures—With References i tok, mekim wok “bilong misineri.” Na brata i tok moa: “Dispela tok i stret, long wanem, nambawan bikpela wok bilong ol misineri i winim Skul Gileat em long autim gutnius, na dispela klas i bin mekim olsem long olgeta hap ol man i stap long en.” Ol i mekim soim bilong sampela gutpela ekspiriens i bin kamap tru.
Bihain tupela brata i wok long Betel ol i mekim tupela tok, em Michael Burnett na Scott Shoffner. Tupela i toktok wantaim sampela memba bilong Brens Komiti bilong Australia, Babedos, Korea, na Yuganda. Ol tok bilong ol dispela brata i kamapim klia bikpela wok ol i mekim bilong lukautim ol misineri, olsem ol i givim haus long ol na helpim ol misineri taim ol i sik. Ol dispela brata i tok ol misineri i mekim gut wok bilong ol, ol i redi long lain long ol samting bilong kantri ol i mekim wok misineri long en.
Laspela Tok Bilong Kirapim Tingting
John E. Barr, em wanpela memba bilong Gavening Bodi inap longtaim pinis, em i mekim bikpela tok bilong program. Nem bilong dispela tok “Pret Long God na Givim Biknem Long Em.” Em i skelim tok bilong Kamapim Tok Hait 14:6, 7, i tok: “Mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin. Em i singaut strong olsem, ‘Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em.’ ”
Brata Barr i kirapim ol sumatin long tingim 3-pela samting bilong dispela ensel. Namba wan, em i mas autim gutnius bilong i stap oltaim oltaim em dispela gutnius bilong Krais i stap King na em i bosim Kingdom. Brata i tok: “Yumi save tru olsem Krais i kamap King long 1914. Olsem na yumi mas tokaut long dispela gutnius long olgeta hap bilong graun.” Namba tu, ensel i tok: ‘Pret long God.’ Brata i stori gut olsem ol sumatin i winim skul i mas helpim ol Baibel sumatin bilong ol long daun long God na bai ol i no ken mekim wanpela samting em God i no amamas long en. Namba tri, ensel i tok: ‘Litimapim nem bilong God.’ Brata i kirapim ol sumatin long ol i “no ken lusim tingting olsem yumi mekim wok bilong givim biknem long God, na i no bilong litimapim nem bilong yumi yet.” Orait Brata Barr i stori long ‘taim bilong kot i kamap pinis,’ na em i tok, “liklik taim tasol i stap na bai kot i kamap. Planti man moa long ol teritori bilong yumi i mas harim tok bilong gutnius paslain long pinis i kamap.”
Dispela 56 manmeri i winim skul ol i tingim dispela tok taim ol i kisim setifiket bilong ol na ol i redi long i go long olgeta hap bilong graun. Olgeta manmeri i kam bung na ol sumatin i winim pinis skul, ol i pilim tru ol tok i kamap long dispela de.
[Blok long pes 17]
OL SAMTING BILONG OL SUMATIN
Hamas kantri ol i kam long en: 6
Hamas kantri ol bai go long en: 25
Hamas sumatin: 56
Krismas bilong ol, averes: 35.1
Hamas yia long tok i tru, averes: 18.3
Hamas yia long wok painia, averes: 13.9
[Piksa long pes 18]
Klas Namba 121 Bilong Wastaua Baibel Skul Bilong Gileat
Nem bilong ol bratasista i stap daunbilo. Namba wan lain i sanap paslain, na namba 9 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlo, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K; Clancy, S; Fischer, J; Forier, S.