Stap Strong Yet Taim Pikinini i Bikhet Olgeta

WANPELA meri Kristen, nem bilong em Joy,a i bin wok strong long lainim pikinini man bilong em long laikim God Jehova. Tasol taim pikinini i gat 18 krismas samting, em i bikhet na lusim famili. Joy i tok: “Mi pilim bikpela bel hevi stret, winim olgeta narapela bel hevi i bin painim mi. Mi pilim olsem em i sakim mi, na dispela i bagarapim tru bel bilong mi, na mi bel hevi stret. Mi kisim tingting olsem i no gat wanpela gutpela samting inap painim mi.”

Nogut yu tu i bin wok strong long skulim ol pikinini bilong yu long laikim God na mekim wok bilong em, tasol wanpela o sampela bilong ol i givim baksait long em. Olsem wanem yu inap karim dispela bikpela bel hevi? Wanem samting inap helpim yu long stap strong yet long wok bilong Jehova em yu save mekim?

Taim Ol Pikinini Bilong Jehova i Bikhet

Namba wan samting bilong tingim i olsem: Jehova i pilim tru hevi bilong yu. Aisaia 49:15 i tok: “Ating wanpela mama inap lusim tingting long pikinini em yet i bin karim na em i no sori long dispela pikinini em i bin givim susu long en, a? Ating wanpela mama inap mekim olsem, tasol mi no inap tru lusim tingting long yupela. Nogat tru.” Yes, Jehova i save pilim wankain olsem ol papamama. Tingim amamas em i pilim taim ol pikinini bilong em, em ol ensel, i bin litimapim nem bilong em na lotuim em. Taim Jehova i stap “insait long bikpela win na ren” na em i bekim tok long Jop, em i stori long amamas em i bin kisim wantaim gutpela famili spirit bilong em, em i tok: “Taim mi wokim na strongim as bilong dispela graun, yu stap we? . . . Long taim dispela wok i kirap, ol sta i bin lukim na ol i amamas na singim song, na ol ensel i amamas na singaut.”​—Jop 38:​1, 4, 7.

Bihain, God i lukim wanpela ensel, em i gutpela olgeta, i bikhet long em na kamap Satan. Mining bilong dispela nem Satan i olsem “Birua.” Na Jehova i lukim namba wan pikinini man bilong em hia long graun, Adam, na meri bilong em Iv, em ol i gutpela olgeta, ol tu i bikhet. (Stat 3:​1-6; KTH 12:9) Bihain, sampela narapela pikinini spirit, em ol ensel, “i lusim ples bilong ol” na ol i bikhet long God.​—Jut 6.

Baibel i no stori long Jehova i pilim olsem wanem taim sampela pikinini man bilong em, em ol i gutpela olgeta, ol i kirap bihainim pasin bikhet. Tasol Baibel i tok: “Bikpela i lukim pasin bilong ol manmeri long olgeta hap i nogut tru. Ol manmeri i tingting tasol long ol samting nogut. Na Bikpela i ting i gutpela sapos em i no bin wokim ol manmeri. Na em i bel hevi tru.” (Stat 6:5, 6) Jehova yet i bin makim lain Israel olsem lain bilong em, na taim ol i bikhet, dispela i mekim em i “bel hevi.”​—Song 78:​40, 41.

Yumi save tru olsem, Jehova i pilim tru pen na hevi ol papamama i pilim taim pikinini bilong ol i bikhet. Long Baibel, em i bin kamapim ol gutpela tok bilong helpim ol papamama long karim dispela hevi. God i tokim ol long putim olgeta hevi bilong ol long han bilong em, na daunim laik bilong ol yet, na sanap strong na sakim Satan. Nau yumi laik skelim olsem wanem ol dispela tok inap helpim yu long stap strong taim pikinini bilong yu i bikhet olgeta.

Putim Olgeta Hevi Long Han Bilong Jehova

Jehova i save olsem ol papamama i save wari na tingting planti taim ol i ting pikinini bai mekim sampela samting bilong bagarapim em yet o narapela bai bagarapim em. Aposel Pita i kamapim wanpela rot bilong karim dispela hevi na ol narapela kain hevi. Em i tok: “God i save wari long yupela. Olsem na olgeta hevi yupela i karim, yupela i mas putim long han bilong en.” (1 Pita 5:7) Bilong wanem dispela tok em i bikpela samting long ol papamama em pikinini bilong ol i bikhet olgeta?

Taim pikinini bilong yu i liklik, yu bin wok strong long lukautim em na bai i no gat wanpela samting i bagarapim em. Na em i bin amamas long bihainim tok bilong yu. Tasol taim em i go bikpela liklik, pasin bilong em long harim tok bilong yu i go slek liklik. Tasol tingting bilong yu long lukautim em i no slek. Nogat. Ating em i kamap strong moa.

Olsem na taim pikinini bilong yu i bikhet na em i kisim nogut long samting bilong spirit, skin, o bel, yu inap pilim olsem yu gat asua long dispela samting. Joy, em pastaim yumi bin stori long em, em i pilim olsem. Em i tok: “Mi gat tingting olsem mi no bin mekim gutpela wok, na long olgeta de dispela tingting i wok long bagarapim mi. Mi wok long tingim tingim ol samting mi bin mekim long pastaim.” Long kain taim olsem, Jehova i laik bai yu ‘putim olgeta hevi yu karim long han bilong em.’ Sapos yu mekim olsem, em bai helpim yu. Man bilong raitim song i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Song 55:22) Joy i bin kisim kain helpim olsem. Em i tok: “Mi bin toktok wantaim Jehova long olgeta samting mi pilim na tingting long en. I olsem olgeta samting mi pilim i kapsait i kam aut, na dispela i mekim gut tru bel bilong mi.”

Yu no gutpela olgeta, olsem na ating yu bin mekim sampela popaia taim yu bin wok long mekim bikpela long pikinini bilong yu. Tasol i gat wanem as na yu laik tingting long ol popaia tasol? Jehova i no save mekim olsem. Man bilong raitim song i tok: “Sapos yu kaunim olgeta sin bilong mipela bai husat inap long winim kot bilong yu?” (Song 130:3) Maski yu no bin mekim wanpela popaia, dispela i no makim olsem pikinini i no inap bikhet. Olsem na kamapim bel bilong yu long Jehova long rot bilong beten, na em bai helpim yu long karim dispela hevi. Tasol bilong yu yet i ken i stap strong na mekim wok bilong Jehova, na yu no larim Satan i bagarapim yu, i gat sampela samting moa yu mas mekim.

Daunim Yu Yet

Pita i tok: “Yupela i mas daunim laik bilong yupela yet na stap aninit long strongpela han bilong God. Na long taim em yet i makim, em bai i litimapim yupela.” (1 Pita 5:6) Bilong wanem yumi mas i gat pasin daun taim pikinini i bikhet? Long wanem, taim pikinini i bikhet dispela inap mekim na yu bai pilim olsem yu gat asua, na yu pilim pen, na pilim sem tu. Ating yu tingting planti, nogut pasin pikinini i mekim i bagarapim nem bilong famili, na moa yet sapos pikinini i raus long kongrigesen Kristen. Bel i kotim yu na yu pilim sem na dispela inap mekim na yu no laik i go moa long ol miting Kristen.

Long kain taim olsem yu mas yusim gutpela savetingting. Sindaun 18:1 i tok lukaut olsem: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.” Tru yu bel hevi i stap, tasol taim yu go long ol miting Kristen yu inap kisim ol gutpela tok bilong stiaim na strongim yu. Joy i tok: “Pastaim, mi no laik lukim ol man. Tasol mi tokim mi yet olsem em i bikpela samting long bihainim yet pasin bilong i go long ol miting. Sapos mi stap long haus, bai mi tingting tasol long ol hevi bilong mi. Ol miting i helpim mi long tingim ol gutpela samting bilong spirit bilong strongim mi. Mi amamas olsem mi no bin stap wanpis long haus. Sapos mi bin mekim olsem bai mi no inap kisim ol gutpela helpim long ol bratasista bilong mi.”​—Hibru 10:​24, 25.

Tingim tu, olgeta wan wan insait long wanpela famili i mas ‘karim hevi bilong ol yet,’ olsem mekim ol samting wanpela Kristen i mas mekim. (Galesia 6:5) Jehova i tokim ol papamama long laikim na stretim ol pikinini bilong ol. Em i tokim ol pikinini long bihainim tok na givim biknem long papamama bilong ol. Sapos ol papamama i traim bes bilong ol long ‘stretim gut ol pikinini na skulim ol long tok bilong Bikpela,’ orait ol papamama yet bai i gat gutnem long ai bilong God. (Efesus 6:​1-4) Sapos long pasin sori papamama i skulim na stretim pikinini, tasol pikinini i bikhet na i no laik bihainim tok, orait dispela i save bagarapim gutnem bilong pikinini. Sindaun 20:11 i tok: “Yumi lukim pasin bilong wanpela man na yumi ken save, em i gutpela na stretpela man o em i man nogut. Na long wankain pasin tasol, yumi ken save long ol pikinini tu.” Pasin bikhet bilong Satan i no bin bagarapim gutnem bilong Jehova long tingting bilong ol man husat i save long ol samting i bin kamap tru long gaden Iden.

Sanap Strong na Sakim Satan

Pita i tok lukaut olsem: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pita 5:8) Olsem wanpela laion, Satan i save tagetim ol yangpela na ol man i no gat save. Long bipo, ol laion i save raun long Israel na ol i save kilim i dai ol sipsip na bulmakau samting. Sapos wanpela yangpela sipsip i lusim lain sipsip, em i isi tru long laion i kisim em. Maski mama sipsip inap kisim bagarap, em bai pait bilong lukautim pikinini bilong em. Tasol sipsip i bikpela pinis i no inap winim wanpela laion. Olsem na i mas i gat ol strongpela wasman bilong lukautim ol sipsip.​—1 Samuel 17:​34, 35.

Bilong lukautim ol man i olsem sipsip na bai dispela “laion i singaut,” i no ken kisim ol, Jehova i stretim rot na bai ol wasman bilong kongrigesen i mas wok aninit long “Namba Wan Wasman,” Jisas Krais. (1 Pita 5:4) Pita i tokim ol kain man olsem: “Yupela i mas lukautim gut ol manmeri bilong God. Ol i stap olsem ol sipsip long han bilong yupela. Na yupela i mas amamas long mekim dispela wok, olsem God i laik yupela i mekim. Nogut yupela i bihainim laik bilong ol arapela tasol na mekim. Na yupela i no ken mekim dispela wok bilong kisim pe tasol. Nogat. Yupela i mas i gat laik tru long mekim dispela wok.” (1 Pita 5:​1, 2) Taim yupela papamama i wok wantaim ol dispela wasman, ol inap helpim yangpela long stretim wokabaut bilong em na bihainim laik bilong God.

Taim ol elda Kristen i mas givim sampela tok bilong stretim bikhet pikinini bilong yu, ating yu bai i gat laik long mekim sampela samting na bai pikinini i no ken kisim strafe. Tasol sapos yu mekim olsem dispela em i wanpela bikpela popaia tru. Pita i tok: “Yupela i mas i stap strong long bilip na sakim [Satan]”​—no ken sakim ol wasman.​—1 Pita 5:9.

Taim Strafe i Strongpela Tru

Sapos pikinini bilong yu i no tanim bel na em i wanpela Kristen i baptais pinis, orait em inap kisim strongpela strafe tru i winim ol narapela strafe​—ol inap rausim em long kongrigesen. Krismas bilong em na sindaun bilong em bai makim olsem yu bai toktok o mekim sampela samting wantaim em o nogat.

Sapos krismas bilong pikinini i no winim mak gavman i putim bilong makim man i bikpela pinis na em i stap yet long haus, orait yu gat wok yet long lukautim em long ol samting bilong skin. Em wok bilong yu long stretim pikinini na lainim em long stretpela pasin. (Sindaun 1:​8-​18; 6:​20-​22; 29:17) Ating bai yu gat laik long mekim Baibel stadi wantaim em, we em yet i ken insait long en. Yu inap soim em ol skripsa bilong Baibel na ol buk na nius em “wokboi i gat gutpela tingting” i bin kamapim. (Matyu 24:45) Yu ken kisim em i go long ol miting Kristen na em i mas sindaun wantaim yu long ol dispela miting. Yu laik mekim ol dispela samting, long wanem, yu laik bai em i harim ol gutpela tok bilong Baibel na kirap bihainim.

Tasol bai yu no mekim wankain pasin long rauspela pikinini i bikpela pinis na em i no stap moa wantaim yupela long haus. Aposel Pol i tokim ol Kristen long Korin: “Sapos wanpela man yupela i save kolim brata long Krais, em i mekim pasin pamuk o em i mangal long ol samting bilong ol arapela man o em i lotu long ol giaman god o em i tok bilas o em i spak o em i stilim samting bilong narapela man, orait yupela i no ken i stap wantaim em. Nogat. Na tu, yupela i no ken kaikai wantaim kain man olsem.” (1 Korin 5:11) I gat sampela samting famili i mas mekim wantaim na ating i gat as na papamama i mas toktok wantaim rauspela pikinini, tasol papamama Kristen i mas strong long ol i no ken bung na toktok nating wantaim em.

Taim ol wasman Kristen i mas givim strafe long pikinini i mekim bikpela rong, i no savetingting long sakim tok bilong ol o tok olsem samting ol i mekim​—em Baibel i as bilong en​—em i liklik samting. Sapos yu go long sait bilong dispela bikhet pikinini bilong yu, dispela i no helpim pikinini long sakim Satan. Nogat. Taim yu mekim olsem, dispela inap bagarapim yu yet long ol samting bilong lotu. Tasol sapos yu sapotim tok na wok bilong ol wasman, orait yu bai stap “strong long bilip” na dispela bai helpim tru pikinini bilong yu.​—1 Pita 5:9.

Jehova Bai Strongim Yu

Sapos pikinini bilong yu i bikhet, tingim, dispela samting i no painim yu tasol, nogat. Wankain samting i bin painim ol arapela papamama Kristen. Maski wanem kain traim i painim yumi, Jehova inap strongim yumi.​—Song 68:19.

Beten askim Jehova long helpim yu. Bung na poroman wantaim ol bratasista insait long kongrigesen Kristen. Wanbel long strafe ol wasman bilong kongrigesen i givim. Taim yu mekim olsem, dispela bai helpim yu long stap strong. Na taim yu stap gutpela piksa, ating dispela bai mekim na pikinini bilong yu bai bihainim singaut Jehova i mekim bilong kam bek long em.​—Malakai 3:​6, 7.

[Ol Futnot]

[Ol Piksa long pes 18]

Kisim strong long rot bilong beten na long kongrigesen Kristen