Askim

Wanem dispela “pait . . . bilong God I Gat Olgeta Strong” long Armagedon, na wanem samting bai kamap long dispela pait?​—KTH 16:​14, 16.

Yumi ken tok, pait bilong Armagedon em wanpela pait bilong olgeta hap bilong graun em bai kamap bihain, na long dispela pait Jisas Krais, em King Jehova i makim, em bai bagarapim ol birua bilong God. Baibel i tok “ol spirit nogut” bai bungim ol ami bilong ol dispela birua, em “ol king bilong olgeta kantri bilong graun,” na ol i bung wantaim bilong “kirapim pait long dispela bikpela de bilong God I Gat Olgeta Strong . . . long dispela hap, long tok Hibru ol i kolim Armagedon.”​—KTH 16:​14, 16.

Dispela ples we ol lain bilong mekim pait ol i bung long en i no wanpela ples tru tru. Mining bilong dispela nem “Armagedon” em “maunten bilong Megido.” (KTH 16:​16, sta) Bipo i no gat wanpela maunten i gat dispela nem. Na tu, “ol king bilong graun, wantaim ol ami bilong ol,” ol i no inap bung tru tru long wanpela ples, nogat. (KTH 19:19) Dispela “hap” i makim samting ol spirit nogut i stiaim ol gavman bilong graun wantaim lain bilong ol long en​—olsem ol bai birua long Jehova na long “ol ami bilong heven,” em “King bilong olgeta king, na Bikpela bilong olgeta bikman,” em Jisas Krais, i bosim ol.​—KTH 19:​14, 16.

Dispela nem “Armagedon” i insait long nem Megido, em wanpela taun bilong bipo long Israel. Megido i stap long hap is bilong maunten Karmel na em i bosim ol bikpela rot ol man bilong wokim bisnis na ol ami i save go kam long en. Na tu, i gat ol bikpela pait i bin kamap long dispela hap na wanpela lain i winim pait na narapela lain i lus. Olsem: “Klostu long wara bilong Megido” Hetman Barak bilong Israel i winim wanpela strongpela ami bilong Kenan, em Jeneral Sisera i bosim. (Hetman 4:​12-​24; 5:​19, 20) Long dispela hap tu, Hetman Gideon i winim ol ami bilong ol Midian. (Hetman 7:​1-​22) Taim Baibel i bungim nem Megido wantaim dispela bikpela pait i laik kamap, em i strongim bilip bilong yumi olsem, long rot bilong Pikinini bilong em God bai winim tru olgeta ami i pait long em.

Orait wanem samting bai kamap? Pait bilong Armagedon bai pinisim olgeta kain pasin nogut. Em bai opim rot na gutpela taim tru bai kamap, i winim olgeta taim bipo. (KTH 21:​1-4) Kingdom Bilong God bai bosim graun long pasin sori na graun bai kamap wanpela paradais em ol stretpela manmeri bai stap long en inap oltaim oltaim.​—Song 37:29.