Amamas Long Naispela Graun Bilong Yumi

OL SAVEMAN bilong ol sta i luksave olsem graun bilong yumi, nem bilong em Earth, i olsem wanpela liklik samting tru olsem das tasol namel long bikpela ples antap. I no gat narapela hap long ol sta na planet samting we ol samting i gat laip i stap long en. Earth tasol i stret tru long ol samting i gat laip i ken i stap long en.

Na tu, yumi inap i stap amamas long dispela gutpela graun. Yumi amamas long pilim hat bilong san long taim bilong kol! Bel bilong yumi i save kirap taim yumi lukim naispela kala bilong skai taim san i go daun o i kam antap, a? San i kirapim yumi long amamas, tasol i no dispela samting tasol. Bilong yumi ken i stap laip, yumi mas i gat san.

Inap planti milion yia strong bilong graviti bilong san i bin holim graun na ol narapela planet na ol i raunim gut san. Na olsem ol stiuden i lainim long skul, sola sistem bilong yumi i save raunim namel bilong Milkiwe galaksi bilong yumi. Tasol long galaksi bilong yumi, san em i wanpela tasol bilong 100 bilion sta samting i save raunim namel bilong galaksi.a

Milkiwe galaksi i pas insait long wanpela lain galaksi i gat 35 galaksi long en. Sampela bikpela lain galaksi i gat planti tausen galaksi. Sola sistem bilong yumi bai i no inap stap gut sapos em i stap insait long wanpela kain lain galaksi olsem. Long buk The Privileged Planet, Guillermo Gonzalez na Jay W. Richards i tok i no gat planti hap bilong ples antap we “em i stret tru bilong ol samting i gat laip i ken i stap long en olsem hap yumi stap long en.”

Yu ting laip hia long graun i bin kamap nating? O i gat as tru na laip i kamap hia long dispela naispela planet?

Planti man i kisim tingting olsem i gat wanpela man olsem Krieta i bin wokim dispela graun bilong ol samting i gat laip i ken i stap long en.b Planti handet yia i go pinis, wanpela man Hibru i bin stori long graun na skai. Em i tok: “Taim mi lukim skai yu bin wokim, na taim mi lukim mun na olgeta sta yu bin putim i stap antap, mi save ting olsem. Mipela man i wanem samting?” (Song 8:​3, 4) Dispela man i bilip olsem i mas i gat wanpela Krieta. Yu ting tingting bilong em i stret long nau long taim bilong bikpela save bilong saiens?

[Ol Futnot]

[Blok/Piksa long pes 3]

“Taim yu stap longwe na lukim, Earth i lait olsem wanpela blupela ston i dia tumas i stap long tudak bilong ples antap.”​—The Illustrated Science Encyclopedia​​—Amazing Planet Earth.

[Kredit Lain]

Globe: U.S. Fish & Wildlife Service, Washington, D.C./NASA