Traipela San Bilong Yumi
SAN bilong yumi em i traipela tru. Olsem na sapos yumi mekim graun i go bikpela inap 1,300,000 taim, dispela bai makim stret traipela mak bilong san. Tasol sapos yumi skelim san wantaim ol narapela traipela sta, san em i liklik samting tru.
Tingim, wanem samting inap kamap sapos yumi kisim ol dispela traipela sta tru na putim klostu long san? Sampela i traipela tru, winim mak bilong wokabaut bilong graun i raunim san insait long wanpela yia. I olsem yumi stap insait long dispela sta! Wanpela sta ol i kolim Beteljus, em inap karamapim san na graun wantaim narapela sta i stap klostu long graun, em Jupita. Na narapela sta gen em i gat nem Mu Sefai, em inap karamapim san na graun na Jupita wantaim narapela sta em i stap klostu long Jupita, em ol i kolim Saten—maski dispela sta Saten em i stap longwe tru long graun.
Graun bilong yumi i stap insait long wanpela lain sta ol i kolim Milkiwe. Na dispela lain sta i olsem wanpela lata em i tantanim i go antap. I hatwok long yumi tingim olsem i gat 100,000,000,000 sta samting i stap insait long dispela lain sta, em olgeta i lait i stap, na ol i tanim tanim na raun antap long ples tudak. Sapos yumi sanap long arere bilong dispela lain sta na sutim wanpela lait i go kamap long narapela hapsait bilong en, dispela hap lait bai wokabaut olsem 100,000 yia samting bilong i go kamap long narapela hapsait bilong en, maski dispela lait i siksti tru i go inap olsem 300,000 kilomita long olgeta wan wan sekon.
Tasol narapela lain sta ol i kolim Andromeda, em i wankain na em i stap klostu long lain sta bilong yumi, em Milkiwe, na traipela bilong em i winim Milkiwe inap tupela taim, na em i gat olsem 600,000,000,000 sta i stap long en. Ol saveman em ol i save skelim ol sta samting, ol i painim pinis narapela lain sta, em ol i kolim Makarian 348. Traipela bilong en i winim Milkiwe inap 13-pela taim moa, na sapos yumi sutim wanpela lait long wanpela hapsait i go long narapela hapsait bilong en, bai dispela lait i wokabaut inap 1,300,000 yia samting long kamap long narapela hapsait!
Tasol narapela lain sta ol i kolim Abel 2029, em ol saveman i kisim save long en long nau tasol, traipela bilong en i winim tru lain sta bilong Makarian 348. Ol saveman i ting traipela bilong lain sta bilong Abel 2029 i winim olgeta narapela lain sta. Na tu traipela bilong en i winim Milkiwe inap 60 taim moa. Sapos yumi sutim lait long wanpela hapsait i go long narapela hapsait, dispela lait bai wokabaut i go inap 6,000,000 yia samting bilong kamap long narapela hapsait, na tu i gat olsem 100,000,000,000,000 sta i stap long Abel 2029. Wanpela nius (The New York Times) i tok, dispela lain sta i lait tumas. Na ol samting i no stap nabaut nabaut. Wanpela saveman i skelim dispela lain sta na em i tok, “Dispela lain sta i traipela tru, na olgeta samting i stap long ples stret bilong ol na ol i wok gut wantaim.”
Ating i hatwok long yumi tingim namba bilong olgeta dispela kain kain sta, na tingim hamas kilomita samting ol i stap longwe long graun. Olsem na yumi kisim wanem kain tingting long dispela Bikpela Man i bin wokim olgeta dispela samting na putim long ples stret bilong en? Baibel i tok: “Yupela lukluk i go antap long skai na lukim ol sta samting i stap antap. Husat tru i bin wokim ol? Em Bikpela tasol. Ol dispela samting i olsem lain ami bilong Bikpela. Em i save long namba bilong ol, na em i save long nem bilong wan wan bilong ol, na em i save kolim ol long nem bilong ol.” (Aisaia 40:26) Ol samting Em i wokim i narapela kain tru, na yumi save Bikpela Man bilong wokim yumi em i gat bikpela strong tru!
[Piksa Kredit Lain long pes 30]
U.S. Naval Observatory photo