Bikpela Bel Hevi Bilong i Stap Longtaim

I NO longtaim i go pinis, wanpela man bilong mekim wok painimaut i laik save, ol manmeri em wanpela long famili i dai pinis, ol i krai sori i go inap long hamas yia. Em i salim pas na ol askim long sampela papamama em pikinini bilong ol i bin dai inap sampela yia i go pinis. I no olgeta papamama i bekim pas. Wanpela papa, em Vladimir, pikinini man bilong em i bin dai inap 5-pela yia i go pinis, em i tok bel bilong em i bagarap yet na em i no inap stori long pikinini bilong em.a

Planti papamama em wanpela pikinini bilong ol i dai, ol i gat dispela kain bel hevi i save stap longtaim. Inap 10-pela yia i go pinis, pikinini man bilong William i gat 18 krismas em i bin dring wara na dai. William i tok: “Bikpela bel hevi bilong dispela i stap yet long mi, na em bai stap inap long taim mi dai.” Pikinini man bilong Lucy i dai long wanpela bikpela sik, na 5-pela yia bihain Lucy i tok: “Inap sampela de bihain mi wok long tingting, ‘Dispela samting i no bin kamap tru tru.’ Mi ting mi bin kisim driman nogut na liklik taim bai mi kirap na driman i pinis. Tasol bihain mi kisim tingting olsem pikinini i dai tru, na em i no inap i kam bek moa long haus. Em i bin dai inap 5-pela yia i go pinis, tasol taim mi stap wanpis, sampela taim mi save krai yet long em.”

Bilong wanem bel bilong ol papamama olsem Vladimir, William, na Lucy, i bagarap inap longpela taim? Yumi ken stori long sampela as bilong dispela.

Bilong Wanem Ol i Bel Hevi na Krai Planti?

Taim nupela pikinini i kamap insait long famili, wanpela narakain amamas i save kamap long bel bilong papamama. Taim tupela i holim liklik pikinini, o lukluk long em taim em i slip, o lukim em i lap long ol, dispela i givim bikpela amamas long ol. Ol gutpela papamama i save laikim tumas ol pikinini bilong ol. Tupela i save skulim ol long mekim pasin i stret na mekim gutpela pasin long ol man. (1 Tesalonaika 2:​7, 11) Taim ol pikinini i wok long kisim ol gutpela pasin olsem, papamama i save amamas long ol na ol i kirap tingim ol gutpela samting ol pikinini bai mekim long bihain.

Ol gutpela papamama i save wok strong bambai ol i ken lukautim ol pikinini. Ating long olgeta mun ol i save putim hap mani o sampela samting bilong helpim ol pikinini long kamapim famili bilong ol yet long bihain. (2 Korin 12:14) Dispela bikpela wok bilong givim ol yet, taim, strong, na mani bilong helpim ol pikinini, em i kamapim klia olsem ol papamama i save mekim bikpela long ol pikinini bambai ol i ken i stap laip​—i no bilong i dai. Taim pikinini i dai, papamama i no pinisim wok bilong mekim bikpela long em, na ol samting tupela i gat laik long pikinini i mekim i no inap kamap. Papamama i no inap mekim gutpela pasin sori moa long pikinini​—indai i olsem strongpela banis ston i pasim tupela. Ol i bin laikim tumas pikinini bilong ol, tasol nau em i no stap moa. Ol i pilim bikpela bel hevi tru i hatwok moa long daunim.

Baibel tu i soim olsem papamama i kisim bikpela bel hevi i save stap longpela taim. Taim Jekop i harim tok olsem pikinini bilong em Josep i bin kisim bagarap, Baibel i tok: “Jekop i sori tumas long pikinini bilong en, na em i brukim klos bilong en, na i pasim klos bilong sori. Na long planti de tru em i krai i stap long pikinini bilong en. Olgeta pikinini man na pikinini meri bilong en, ol i kam na mekim ol toktok bilong mekim bel bilong en i kamap gutpela gen. Tasol em i no laik tru na i tok olsem, ‘Mi mas krai long em inap mi go i stap wantaim em long ples bilong ol man i dai pinis [olsem matmat].’ ” Planti yia bihain, Jekop i krai sori yet long pikinini, em Jekop i ting em i dai pinis. (Stat 37:​34, 35; 42:​36-​38) Na Baibel i stori tu long wanpela gutpela meri, nem bilong en Naomi, em tupela pikinini man bilong em i dai pinis. Em i bel hevi nogut tru na em i laik senisim nem Naomi, i olsem “meri bilong belgut,” na ol i mas kolim em “Mara,” i olsem “meri bilong bel nogut.”​—Rut 1:​3-5, 20, 21.

Tasol Baibel i no tokaut tasol long bikpela bel hevi papamama i save kisim. Baibel i soim yumi tu olsem Jehova i save strongim bel bilong ol manmeri em wanpela long famili i dai. Stori i kamap bihain long dispela bai toktok long sampela rot bilong God long mekim gut bel bilong ol manmeri i krai sori long wanpela bilong ol i dai.

[Futnot]