Luksave i Gat Man Bilong Wokim Ol Samting

KLOSTU 150 yia i go pinis, Charles Darwin, em i bilip olsem olgeta samting i gat laip i bin kamap long rot bilong evolusen, na em i tok evolusen i as na i gat kain kain samting i stap. Tasol nau long dispela taim i gat sampela lain i wok long daunim dispela tok bilong evolusen, long wanem, taim ol i wok long skelim ol samting i gat laip, ol i luksave olsem ol samting i bin kamap long rot bilong bikpela save tru. Sampela saientis i gat namba ol tu i no bilip long dispela tingting olsem evolusen i as na i gat kain kain samting i stap.

Sampela bilong ol dispela saientis, em ol i no bilip long evolusen, ol i tok i gat narapela as​—ol i kolim intelligent design, o IDa​—na i gat kain kain samting i stap laip, na ol i tok ol lo bilong saiens biology na matematiks i strongim dispela tingting. Ol i strong long ol skul i mas lainim ol sumatin long dispela tingting (ID). Nau long Amerika, na tu long Inglan, Netelan, Pakistan, Serbia, na Teki, bikpela tok pait i stap bilong daunim tok bilong evolusen.

Samting Ol i No Tokaut Long En

Tasol i gat wanpela bikpela samting em planti man i no tokaut long en. Ol i no tokaut olsem i gat wanpela man i bin wokim ol samting. Olsem wanem? Yu ting ol samting long graun i bin kamap nating na i no gat man bilong wokim? Nius The New York Times Magazine i tok, “ol man husat i bilip long intelligent design, ol i no stori liklik long husat em dispela man bilong wokim ol samting.” Wanpela meri bilong raitim stori, Claudia Wallis, em i tok, ol lain bilong intelligent design ol i save “was gut tru, nogut ol i mekim wanpela tok long God.” Na magasin Newsweek i tok, “I.D. i no stori liklik olsem i gat wanpela man bilong tingim na wokim ol samting na dispela man em i husat.”

Tasol yumi no inap abrusim dispela tok olsem i gat man bilong wokim ol samting. Sapos ol man i no laik tingim dispela samting o ol i wok long haitim, olsem i gat man bilong wokim ol samting na dispela man em i husat, orait olsem wanem ol inap save long as tru bilong ol samting bilong ples antap na ol samting i gat laip hia long graun? Ol i no inap tru, a?

Taim ol man i paitim tok i go i kam olsem i gat wanpela man bilong wokim ol samting o nogat, i gat ol askim olsem: Sapos ol i tokaut i gat wanpela man, olsem God, i bin wokim ol samting, dispela bai pasim wok bilong saiens na wok bilong kisim bikpela save moa? Na i stret long ting olsem i mas i gat man bilong tingim na wokim ol samting? Stori i kam bihain long dispela bai stori long ol dispela askim na sampela askim moa.

[Futnot]

[Ol Piksa long pes 3]

Charles Darwin i bilip olsem long rot bilong evolusen i gat kain kain samting i stap

[Kredit Lain]

Darwin: From a photograph by Mrs. J. M. Cameron/U.S. National Archives photo