Yu Redi Long De Bilong Jehova?
“Bikpela de bilong Jehova i klostu. Em i klostu na em i wok long kamap hariap tru.”—SEFANAIA 1:14, NW.
1-3. (a) Baibel i mekim wanem tok long de bilong Jehova? (b) Wanem “de bilong Jehova” i painim yumi?
LONGPELA bilong bikpela de bilong Jehova i no 24 aua. Em wanpela hap taim we God bai kotim na givim strafe long ol man nogut. Dispela de em taim bilong tudak, bikpela belhat, bikpela bel hevi, na bel nogut, olsem na i stret ol man nogut i pret long dispela de. (Aisaia 13:9; Amos 5:18-20; Sefanaia 1:15) Tok profet bilong Joel i tok: “Klostu bai taim nogut i kamap, em De bilong Bikpela. Em i taim bilong Bikpela i mekim save long olgeta lain pipel. Long dispela taim God I Gat Olgeta Strong bai i salim bikpela bagarap i kam.” (Joel 1:15) Tasol long dispela bikpela de, God bai stap Seivia bilong “ol man i bihainim tok bilong em.”—Song 7:10.
2 Dispela tok “de bilong Jehova” i makim kot na strafe God i givim long ol man long narapela narapela taim. Olsem, wanpela “De bilong Bikpela [“Jehova,” NW]” i bin painim ol man bilong Jerusalem taim ol Babilon i bagarapim Jerusalem long 607 B.C.E. (Sefanaia 1:4-7) Wankain samting i bin kamap long 70 C.E., taim God i yusim Gavman Rom bilong givim strafe long lain Juda em ol i bin sakim Pikinini bilong em. (Daniel 9:24-27; Jon 19:15) Na tu, Baibel i tok profet long wanpela “bikpela De bilong God” we em bai ‘pait long ol kantri.’ (Sekaraia 14:1-3) Holi spirit i stiaim Pol long mekim tok i bungim dispela de wantaim taim bilong Krais i kam i stap, em dispela i bin kirap long 1914 taim Jisas i kamap King long heven. (2 Tesalonaika 2:1, 2) Ol samting i wok long kamap i makim olsem de bilong Jehova i klostu tru, olsem na yiateks bilong ol Witnes Bilong Jehova bilong 2007 em i bin stret tru. Ol i kisim long Sefanaia 1:14 (NW), em i tok: “Bikpela de bilong Jehova i klostu.”
3 Bikpela de bilong God i klostu, olsem na nau em i taim bilong yu long redi i stap. Yu ken mekim wanem bilong redi long dispela de? I gat sampela samting moa yu mas mekim bilong redi long de bilong Jehova?
Soim Olsem Yu Redi i Stap
4. Jisas i bin redim em yet long wanem bikpela traim?
4 Long tok profet Jisas Krais i mekim long pinis bilong dispela taim nau yumi stap long en, em i tokim ol disaipel: “Yupela tu i mas redi.” (Matyu 24:44) Taim Jisas i mekim dispela tok, em yet i redi long bungim wanpela bikpela traim—em bai dai olsem ofa bilong baim bek ol man. (Matyu 20:28) Yumi kisim wanem save long ol samting Jisas i bin mekim bilong redi i stap?
5, 6. (a) Olsem wanem pasin bilong laikim tru God na ol man i helpim yumi long redi long de bilong Jehova? (b) Long pasin bilong laikim tru ol man, Jisas i makim wanem gutpela piksa yumi ken bihainim?
5 Long bel olgeta, Jisas i laikim Jehova na ol stretpela lo bilong Em. Hibru 1:9 i tok long Jisas olsem: “Yu save laikim stretpela pasin, na yu no laikim tru pasin nogut. Olsem na God bilong yu yet em i bin kapsaitim wel long yu, bilong makim yu olsem man i gat biknem. Na dispela i mekim yu i amamas moa yet. Ol poroman bilong yu ol i no inap amamas olsem yu.” Jisas i laikim tumas Papa bilong em long heven, olsem na em i stap gut long em. Sapos yumi gat wankain pasin bilong laikim tru God na yumi bihainim ol lo bilong em, orait em bai lukautim yumi. (Song 31:23) Dispela kain pasin laikim na pasin bilong bihainim tok bai helpim yumi long redi long bikpela de bilong Jehova.
6 Wanpela bikpela pasin bilong Jisas em pasin bilong laikim tru ol man. Tru tumas, “em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:36) Olsem na Jisas i bin autim gutnius long ol man, na pasin laikim i kirapim yumi tu long autim tok bilong Kingdom long ol man. Yumi laikim tru God na ol man na dispela i kirapim yumi long wok strong long autim tok na dispela i helpim yumi long redi long bikpela de bilong Jehova.—Matyu 22:37-39.
7. Taim yumi wetim de bilong Jehova, olsem wanem yumi ken amamas?
7 Jisas i laikim tumas long bihainim laik bilong Jehova. (Song 40:8) Sapos yumi gat wankain laik, bai yumi amamas long mekim wok bilong God. Olsem Jisas, bai yumi amamas long givim ol samting bilong helpim ol man, na dispela bai mekim yumi amamas tru. (Aposel 20:35) Yes, yumi “amamas long Bikpela na bai em i strongim [yumi].” Taim yumi amamas olsem, bai yumi redi gut long bikpela de bilong God.—Nehemia 8:10.
8. I gat wanem as na yumi mas i go klostu long Jehova long rot bilong beten?
8 Pasin bilong beten strong long God i bin helpim Jisas long redi long ol samting i traim bilip bilong em. Em i bin prea i stap taim Jon i baptaisim em. Jisas i bin beten wanpela nait olgeta taim em i laik makim ol aposel. (Luk 6:12-16) Na ol man i ritim Baibel i pilim tru ol prea Jisas i mekim long laspela nait em i stap laip hia long graun, em ol prea i kamapim tru bel bilong em. (Mak 14:32-42; Jon 17:1-26) Olsem wanem? Yu save beten oltaim olsem Jisas i bin mekim? Beten long Jehova planti taim na lusim bikpela hap taim liklik long beten. Askim holi spirit long stiaim yu, na taim yu luksave long rot holi spirit i stiaim yu long en, orait bihainim kwik dispela rot. Bikpela de bilong God i wok long kam hariap tru, olsem na em i bikpela samting long pas gut tru wantaim Papa bilong yumi long heven. Olsem na no ken lusim taim, long rot bilong beten, go klostu moa long Jehova.—Jems 4:8.
9. Olsem wanem wok bilong mekim nem bilong Jehova i stap holi em i bikpela samting?
9 Jisas i tingting long wok bilong mekim nem bilong Jehova i stap holi na dispela tu i bin helpim em long redi long ol traim bai painim em. Em i skulim ol disaipel long kolim dispela tok insait long prea bilong ol, olsem: “Papa bilong mipela, yu stap long heven, nem bilong yu i mas i stap holi.” (Matyu 6:9) Sapos yumi laik tru long nem bilong Jehova i mas i stap holi, orait bai yumi wok strong long no ken mekim wanpela samting em inap bagarapim nem bilong em. Dispela i mekim na bai yumi redi gut tru long bikpela de bilong Jehova.
Yu Ting Yu Mas Mekim Sampela Senis?
10. Bilong wanem i stret yumi skelim laip bilong yumi?
10 Sapos de bilong Jehova i kam tumora, yu ting tru tru bai yu redi? Em i gutpela long yumi wan wan i skelim laip bilong yumi na painimaut olsem i gat sampela pasin o tingting yumi mas senisim. Laip bilong yumi i sot na yumi no save wanem samting bai kamap tumora, olsem na long olgeta de yumi olgeta i mas tingting long ol samting i helpim yumi long pas gut wantaim Jehova. (Saveman 9:11, 12; Jems 4:13-15) Orait yumi laik skelim sampela samting ating yumi gat wok long senisim long laip bilong yumi.
11. Yu putim wanem mak bilong winim long pasin bilong ritim Baibel?
11 Wanpela bikpela samting em gutpela tok ‘gutpela wokboi’ i mekim long pasin bilong ritim Baibel long olgeta de. (Matyu 24:45) Ating yu ken putim mak long ritim na tingim tingim long bel ol tok bilong Baibel kirap long Stat i go long Kamapim Tok Hait long olgeta wan wan yia. Sapos yu ritim 4-pela sapta long olgeta wan wan de, yu inap ritim olgeta 1,189 sapta bilong Baibel insait long wanpela yia. Olgeta king bilong Israel i mas ritim Lo Bilong Jehova “long olgeta de.” I luk olsem Josua i bin mekim wankain samting. (Lo 17:14-20; Josua 1:7, 8) Em bikpela samting long ol elda i mas ritim Baibel long olgeta de, long wanem, dispela i helpim ol long skulim ol man long “bihainim tru olgeta tok bilong God”!—Taitus 2:1.
12. De bilong Jehova i klostu, na dispela i mas kirapim yu long mekim wanem?
12 De bilong Jehova i klostu. Dispela i mas kirapim yu long i go long olgeta miting Kristen na insait long ol inap tru long skel bilong yu. (Hibru 10:24, 25) Taim yu mekim olsem, dispela bai helpim yu long mekim gutpela wok moa long autim tok bilong Kingdom taim yu wok long painim ol manmeri em bel bilong ol i gutpela tru bilong kisim laip i stap gut oltaim. (Aposel 13:48) Ating yu inap mekim sampela wok moa insait long kongrigesen, olsem helpim ol lapun na strongim ol yangpela. Kain wok olsem em samting bilong amamas long en!
Pasin Bilong Yu Long Pas Gut Wantaim Ol Arapela
13. Wanem ol askim yumi ken givim long yumi yet long pasin bilong kamapim nupela pasin?
13 De bilong Jehova i klostu tru. Olsem na yu ting yu mas wok strong moa long ‘kamap nupela man, em man God i mekim i kamap nupela na i stap olsem God yet, long wanem, pasin bilong em i stretpela olgeta na i holi tru’? (Efesus 4:20-24) Taim yu wok long kamapim ol gutpela pasin bilong God, ol arapela bai luksave olsem “Holi Spirit i stiaim wokabaut” bilong yu na yu wok long kamapim ol pasin bilong holi spirit. (Galesia 5:16, 22-25) Yu inap kolim sampela samting em yu na famili bilong yu i mekim na dispela i soim olsem yupela i kamapim nupela pasin? (Kolosi 3:9, 10) Olsem: Yu gat nem long mekim gutpela pasin long ol wanbilip na ol arapela? (Galesia 6:10) Pasin bilong stadi oltaim long Baibel inap helpim yu long kamapim ol gutpela pasin bilong God em ol bai helpim yu long redi long de bilong Jehova.
14. Bilong wanem man i mas prea long kisim holi spirit taim em i wok long kisim pasin bilong bosim gut bel bilong em?
14 Olsem wanem sapos yu save belhat kwik na yu save yu gat wok long bosim gut bel bilong yu? Dispela pasin em i hap bilong pasin holi spirit inap kamapim insait long yu. Olsem na bihainim tok bilong Jisas na beten long kisim holi spirit, olsem: “Yupela i mas prea na askim God long givim ol samting long yupela, na em bai i givim long yupela. Yupela i mas wok long painim samting, na bai yupela i lukim. Yupela i mas paitim dua, na God bai i opim long yupela. . . . Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.”—Luk 11:9-13.
15. Yumi mas mekim wanem sapos kros samting i mekim na yumi no pas gut wantaim wanpela wanbilip?
15 Ating kros samting i mekim na yu no pas gut wantaim wanpela wanbilip. Sapos olsem, orait mekim olgeta samting yu inap mekim bilong stretim dispela, na long dispela rot yu ken strongim bel isi na pasin wanbel bilong kongrigesen. (Song 133:1-3) Bihainim tok bilong Jisas i stap long Matyu 5:23, 24 o Matyu 18:15-17. Sapos yu bin larim san i go daun taim yu belhat yet, orait kwiktaim stretim dispela. Planti taim, bilong stretim dispela kain hevi yumi mas redi long fogivim narapela. Pol i tok: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.”—Efesus 4:25, 26, 32.
16. Olsem wanem man o meri marit i mas kamapim pasin sori insait long marit bilong ol?
16 Bilong pas gut wantaim poroman marit, tupela i mas i gat pasin sori na pasin bilong fogivim rong. Sapos yu gat wok long kamapim moa yet pasin laikim na pasin sori long poroman marit bilong yu, orait wok long mekim olsem long rot biong kisim helpim long God na Tok Bilong Em. Yu ting yu gat wok long mekim sampela samting bilong bihainim tok bilong 1 Korin 7:1-5 na bai yu no pilim hevi na tingting long mekim pasin pamuk? Long kain taim olsem, em taim bilong man marit o meri marit long “givim bel” bilong em long poroman marit.
17. Man i mas mekim wanem sapos em i bin mekim bikpela sin?
17 Tasol olsem wanem sapos yu bin mekim wanpela bikpela rong? Kwiktaim mekim ol samting bilong stretim dispela hevi. Plis, kisim helpim long ol elda Kristen. Ol beten na tok kaunsel bilong ol bai helpim yu long kamap strong gen long lotuim God. (Jems 5:13-16) Tanim bel na beten long Jehova. Sapos yu no mekim olsem bai yu pilim olsem yu gat asua yet na bel bilong yu bai i gat tok. Dispela samting i bin painim Devit, tasol pasin bilong autim rong long Jehova i mekim na Devit i kisim bikpela bel isi! Devit i tok: “Sapos God i lusim pinis rong bilong wanpela man, na i rausim sin bilong em, dispela man i ken amamas. Sapos Bikpela i tok olsem, dispela man i no gat rong nau, na dispela man i no save bihainim pasin giaman, orait dispela man i ken amamas.” (Song 32:1-5) Jehova i save lusim rong bilong ol man husat i tanim bel tru long sin ol i mekim.—Song 103:8-14; Sindaun 28:13.
Stap Longwe Long Pasin Bilong Dispela Graun
18. Yu mas i gat wanem tingting long dispela graun?
18 Yu save tingim tru nupela taim Papa bilong yumi long heven i promis long kamapim, a? Olsem na yu gat wanem tingting long ol manmeri i no gat stretpela pasin na ol i stap longwe long God? Satan, em “hetman i save bosim dispela graun,” i no gat strong long bosim Jisas. (Jon 12:31; 14:30) Yu no laik bai Satan na dispela graun bilong em i bosim yu, a? Olsem na yu mas bihainim tok bilong aposel Jon, em i tok: “Yupela i no ken laikim ol pasin bilong graun na olgeta samting bilong graun.” Dispela em i gutpela tok, long wanem, “dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.”—1 Jon 2:15-17.
19. Yumi laik kirapim ol yangpela Kristen long putim wanem ol mak bilong winim?
19 Olsem wanem? Yu save helpim ol pikinini bilong yu long ol i no ken larim ‘pasin bilong dispela graun i mekim ol i kamap doti long ai bilong God’? (Jems 1:27) Satan i laik hukim na kisim ol pikinini bilong yupela olsem man i laik hukim na kisim pis. I gat kain kain yut grup na oganaisesen i mekim ol yangpela i pas gut wantaim dispela graun Satan i bosim. I gat wanpela oganaisesen tasol bai abrusim bagarap taim pasin bilong dispela graun i pinis, na ol wokboi bilong Jehova ol i stap pinis insait long dispela oganaisesen. Olsem na yumi laik kirapim ol yangpela Kristen long “wok strong long mekim wok bilong Bikpela.” (1 Korin 15:58) Ol papamama i lotuim God i mas helpim ol pikinini long putim ol mak bilong winim. Em ol mak bai helpim ol long i stap amamas na mekim ol samting i givim biknem long God, na i helpim ol long redi long de bilong Jehova.
Tingim Taim Bihain Long Bikpela De Bilong Jehova
20. Bilong wanem yumi mas wok long tingim laip oltaim?
20 Yu inap stap bel isi na wetim de bilong Jehova sapos yu wok long tingim laip oltaim. (Jut 20, 21) Yu wet long kisim laip oltaim long Paradais, olsem na yu save yu inap kamap yangpela gen na yu gat laip i stap oltaim bilong mekim ol gutpela wok yu laik mekim na kisim moa save long Jehova. Yumi man i save long “liklik hap tasol” bilong ol samting bilong God, tasol yu inap kisim save long Em inap oltaim oltaim. (Jop 26:14) Em wanpela gutpela samting tru yu inap mekim!
21, 22. Bai yumi na ol manmeri i kirap bek inap toktok long wanem ol samting?
21 Long Paradais, ol man i kirap bek inap stori long yumi long ol samting bilong bipo em yumi no save long en. Enok bai stori gut long yumi long olsem wanem em i bin strongim bel na autim tok bilong Jehova long ol manmeri nogut. (Jut 14, 15) Noa bai stori long ol samting em i bin mekim bilong wokim sip. Abraham na Sara bai stori long tingting bilong ol taim God i tokim ol long lusim gutpela sindaun long Ur na i go sindaun long ol haus sel. Esta i ken stori long olsem wanem em i bin sambai long lain bilong em na paulim plen bilong Haman long bagarapim ol. (Esta 7:1-6) Tingim tu stori Jona bai kamapim long em i bin stap 3-pela de insait long bel bilong wanpela bikpela pis, na Jon Bilong Baptais bai stori long em i pilim olsem wanem taim em i baptaisim Jisas. (Luk 3:21, 22; 7:28) Bai yumi amamas long lainim kain kain samting!
22 Long Taim Bilong Wan Tausen Yia Bilong Krais i Stap King, ating bai yu gat gutpela wok long helpim ol man i kirap bek long “save gut long God.” (Sindaun 2:1-6) Long nau, yumi amamas long lukim ol man i kisim save long God Jehova na ol i bihainim save ol i kisim! Tasol tingim amamas yumi bai kisim taim Jehova i blesim wok yumi mekim bilong lainim ol man bilong bipo bipo na bel bilong ol i kirapim ol long bihainim tok ol i lainim!
23. Yumi mas tingting strong long mekim wanem?
23 Yumi ol manmeri bilong Jehova i no inap tingim na kaunim ol gutpela samting yumi kisim long nau. (Song 40:5) Yumi tenkyu tru long ol samting God i givim yumi bilong helpim yumi long pas gut wantaim em. (Aisaia 48:17, 18) Maski yumi gat wanem kain sindaun, yumi laik givim bel olgeta long mekim wok bilong God taim yumi wetim bikpela de bilong Jehova.
Bai Yu Bekim Olsem Wanem?
• “De bilong Jehova” em wanem samting?
• Olsem wanem yu ken soim olsem yu redi long de bilong Jehova?
• Bikpela de bilong God i klostu, olsem na ating i gat wanem ol senis yumi mas mekim?
• Yu wet long mekim wanem taim de bilong Jehova i pinis?
[Piksa long pes 12]
Jisas i bin soim olsem em i redi long karim ol hevi
[Piksa long pes 15]
Em bai wanpela gutpela wok tru long helpim ol man i kirap bek long kisim save long Jehova