Yu Inap i Stap Amamas Maski Bel Hevi i Kamap

ATING olgeta man i bin bel hevi long wanpela samting, a? Papa bilong yumi long heven, God Jehova, em tu i bin bel hevi. Em i bin kisim bek ol Israel long wok kalabus long Isip na em i mekim gut tru long ol. Tasol Baibel i tok: “Ol i no lusim pasin bilong traim God bilong Israel, em God bilong mekim gutpela na stretpela pasin olgeta. Ol i traim em na mekim em i kros tru long ol.” (Song 78:41) Tasol oltaim Jehova i bin stap olsem ‘God bilong amamas.’​—1 Timoti 1:11.

Tru tumas, i gat planti samting i mekim na yumi bel hevi. Orait yumi ken mekim wanem na bai bel hevi i no ken tekewe amamas long yumi? Pasin God Jehova i bin mekim taim em i bel hevi long sampela samting inap lainim yumi long wanem samting?

Ol Samting i Kamapim Bel Hevi

Baibel i tok: “Taim nogut i save painim yumi olgeta.” (Saveman 9:11) Wantu tasol pasin raskol, wanpela bagarap, o bikpela sik inap kamapim bikpela bel hevi tru. Baibel i tok tu: “Sapos man i ting long kisim wanpela samting na i wet nating longpela taim, bai em i bel hevi moa yet.” (Sindaun 13:12) Sapos yumi wet long wanpela gutpela samting i kamap, bel bilong yumi i amamas tru, tasol sapos dispela samting i no kamap kwiktaim, yumi bel hevi stret. Yumi ken tingim Duncan,a em i givim bel tru long mekim wok misineri, tasol taim em i wok misineri inap planti yia pinis, em wantaim meri bilong em ol i mas go bek long ples. Em i tok: “Em namba wan taim bilong mi long pilim olsem laip bilong mi i no gat as bilong en. Mi no gat wanpela mak bilong winim. I olsem nau i no gat wanpela samting i bikpela samting.” Samting i givim bel hevi long yumi, em inap i stap longtaim. Dispela samting i bin painim Claire. Em i tok: “Taim mi gat bel inap 7-pela mun, pikinini i lus long bel. Dispela samting i kamap planti yia i go pinis, tasol long nau yet, taim mi lukim wanpela mangi i sanap long pletfom na mekim tok, mi save tingting, ‘Sapos pikinini man bilong mi i stap yet, em bai i gat wankain krismas.’ ”

Yumi save bel hevi tu taim wanpela i rongim yumi, olsem poroman yumi bin pasim tok wantaim long marit em i lusim yumi, o marit i bruk, o pikinini i bikhet, o wanpela poroman i no stap gut long yumi, o wanpela pren i no tenkyu long yumi bin helpim em. Yumi save stap namel long ol manmeri i gat sin, na yumi stap long taim bilong planti hevi, olsem na i gat planti samting inap mekim na yumi bel hevi.

Na ol popaia bilong yumi yet inap mekim na yumi bel hevi. Olsem: Sapos yumi no winim tes long skul, o yumi no kisim wanpela wok, o yumi laikim tru wanpela, tasol em i no gat wankain tingting long yumi, em nau, yumi pilim olsem yumi samting nating. O sapos wanpela yumi laikim tumas em i no stap strong long bilip, yumi inap bel hevi long yumi yet. Mary i tok: “I luk olsem pikinini meri bilong mi i stap strong long bilip, na mi ting mi bin stap gutpela piksa long em i ken bihainim. Tasol taim em i givim baksait long God Jehova na ol lo na stiatok bilong famili, mi pilim olsem mi bin pundaun tru long mekim wok bilong mi. Ol narapela gutpela wok mi bin mekim i no inap senisim dispela tingting. Bel bilong mi i bagarap stret.”

Olsem wanem yumi inap karim ol dispela kain bel hevi? Bilong bekim dispela askim, yumi ken tingim pasin Jehova i bin mekim long kain taim olsem.

Tingim Rot Bilong Stretim

God Jehova i bin givim gutpela sindaun tru long namba wan man na meri, tasol ol i no tenkyu long em na ol i bikhet. (Stat, sapta 2 na 3) Bihain pikinini bilong ol, Kein, i wok long kisim tingting nogut. Em i sakim tok lukaut bilong Jehova na kilim i dai brata bilong em. (Stat 4:​1-8) Yumi inap pilim tru bikpela bel hevi Jehova i kisim, a?

Bilong wanem dispela bel hevi i no pinisim amamas bilong Jehova? Long wanem, em i tingting pinis long ol manmeri i gutpela olgeta bai i pulap long graun na em i wok yet long inapim tru dispela tingting bilong em. (Jon 5:17) Olsem na em i givim Kingdom bilong em na ofa bilong baim bek ol man. (Matyu 6:​9, 10; Rom 5:​18, 19) God Jehova i no tingim tumas dispela hevi, em i putim tingting i go long rot bilong stretim hevi.

Baibel i kirapim yumi long tingim ol samting yumi inap mekim, na no ken tingim ol popaia yumi bin mekim bipo. Baibel i tok: “Oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.”​—Filipai 4:8.

Stretpela Tingting Long Bel Hevi

Ol samting inap kamap na i senisim tru i stap bilong yumi. Olsem: Wantu tasol bos inap rausim yumi long wok, o yumi no gat poroman marit moa, o yumi no holim moa wok yumi bin mekim insait long kongrigesen. O bikpela sik inap kamap, o yumi no gat haus moa, o ol pren i lusim yumi. Olsem wanem yumi inap karim hevi bilong ol dispela senis i bin kamap?

Sampela i bin putim mak long ol bikpela samting ol i mas mekim, na dispela i helpim ol. Duncan, em yumi stori pinis long em, em i tok: “Taim mitupela meri bilong mi i save pinis olsem mipela i no inap go bek long wok misineri, bel bilong mipela i bagarap stret. Bihain mipela i putim tupela samting olsem mak bilong winim: wok bilong lukautim Mama, na sapos inap, mekim yet wok autim tok fultaim. Taim mipela mas wokim disisen long sampela samting, mipela i tingting long dispela bai mekim wanem long ol mak mipela i laik winim. Dispela i helpim mipela na mipela i no hatwok long wokim ol gutpela disisen.”

Taim samting i kamap na yumi bel hevi long en, planti taim yumi save tingim dispela tasol. Olsem: Sampela wok bilong yumi i no kamap gutpela, olsem mekim bikpela long pikinini, o lain long mekim wanpela wok, o autim gutnius long hap i gat narapela tok ples. Yumi inap ting, ‘Mi no inap mekim gut wanpela samting.’ Tasol maski namba wan man na meri i bikhet long God, i no olsem God i no inap mekim gut wanpela samting. Na olsem tasol, sapos pastaim sampela wok bilong yumi i no kamap gutpela, i no olsem yumi no inap mekim gut wanpela wok, nogat.​—Lo 32:​4, 5.

Sapos wanpela i rongim yumi, yumi inap bel nogut long dispela. Tasol Jehova i no save mekim olsem. Em i bel hevi long King Devit taim em i slip wantaim meri bilong narapela man na bihain em i wokim rot na ol i kilim i dai man bilong dispela meri. Tasol Jehova i lukim bel bilong Devit olsem em i tanim bel tru, olsem na em i larim Devit i stap yet olsem wokman bilong em. Na gutpela King Jehosafat i bin mekim pasin kranki taim em i wokim kontrak wantaim ol birua bilong God. Profet bilong Jehova i tok: “Yu bin mekim dispela kain pasin, olsem na Bikpela i belhat long yu. Tasol yu save mekim sampela gutpela pasin tu.” (2 Stori 19:​2, 3) Jehova i save olsem wanpela popaia bilong Jehosafat i no makim olsem em i lusim Jehova. Na olsem tasol, sapos ol pren bilong yumi i popaia na yumi no bel nogut long ol, ol i no inap lusim yumi. Ol pren i mekim yumi i bel hevi, ol i gat sampela gutpela pasin tu.​—Kolosi 3:13.

Sampela samting yumi save bel hevi long en, yumi ken ting ol i samting bilong skulim yumi bambai ol wok bilong yumi long bihain i ken kamap gutpela. Taim yumi mekim wanpela rong, yumi inap bel hevi long yumi yet. Tasol sapos yumi wok long mekim ol samting bilong stretim dispela rong, bai yumi inap kamap gutpela gen. Taim King Devit i mekim rong na em i bel hevi stret long em yet, em i tok: “God, taim mi no autim sin bilong mi yet, mi krai nogut long san na long nait. . . . Bihain mi bin autim sin bilong mi long yu. . . . Mi autim pinis na yu lusim asua bilong mi na sin bilong mi tu.” (Song 32:​3-5) Sapos yumi save olsem yumi no bin mekim ol samting God i laik bai yumi mekim, yumi mas askim em long lusim rong bilong yumi na senisim pasin bilong yumi, na tingting strong olsem bihain bai yumi bihainim gut tok bilong em.​—1 Jon 2:​1, 2.

Redi Nau Long Karim Bel Hevi

Yumi ken save tru olsem sampela kain bel hevi bai painim yumi olgeta. Yumi ken mekim wanem bilong redi long karim? Yumi ken tingim ol tok bilong Bruno, em wanpela man Kristen i bin karim wanpela bel hevi em dispela i bin senisim i stap bilong em. Em i tok: “Bikpela samting tru bilong helpim mi long karim dispela bel hevi, em mi wok yet long mekim olgeta samting pastaim mi bin mekim bilong strongim mi long pas gut wantaim God. Mi kisim save pinis long as na God i larim dispela pasin nogut bilong graun i stap yet. Mi bin wok inap planti yia long pas gut wantaim Jehova. Mi tenkyu tru long mi bin mekim olsem. Mi save Jehova i bin stap wantaim mi na dispela i helpim mi long karim dispela bel hevi i bin painim mi.”

Taim yumi tingting long taim bihain, yumi ken save tru long wanpela samting, olsem: Maski yumi yet o ol narapela i mekim sampela samting yumi bel hevi long en, God yet i no inap mekim wanpela samting na bai yumi bel hevi long en. God i tok, insait bilong nem bilong em, Jehova, i olsem, “Mi bai kamap wanem wanem kain mi laikim.” (Kisim Bek 3:​14, NW) Olsem na yumi inap bilip tru olsem em bai kamap wanem wanem kain em i mas kamap bilong truim ol tok promis bilong em. Em i bin tok promis olsem long rot bilong Kingdom bilong em, laik bilong em bai kamap “long graun olsem ol i save bihainim long heven.” Olsem na aposel Pol i tok: “Mi bilip tru olsem, . . . dai o laip, o ol ensel o ol strongpela spirit, . . . o ol arapela samting i stap nabaut, dispela olgeta i no inap pasim laik bilong God, em dispela laik em i givim yumi long Krais Jisas.”​—Matyu 6:10; Rom 8:​38, 39.

Yumi ken bilip na wetim God i truim ol tok promis em i bin mekim long maus bilong profet Aisaia, olsem: “Lukim, mi wokim nupela skai na nupela graun. Na ol man bai i no inap tingim moa ol samting i bin kamap bipo.” (Aisaia 65:17) Em i gutpela samting tru long yumi ken wetim taim i kamap na bai olgeta bel hevi yumi bin kisim i no inap kamap moa long tingting bilong yumi!

[Futnot]

[Rait long pes 13]

Sapos pastaim sampela wok bilong yumi i no kamap gutpela, i no olsem yumi no inap mekim gut wanpela wok

[Rait long pes 14]

Baibel i kirapim yumi long tingim ol samting yumi inap mekim, na no ken tingim ol popaia yumi bin mekim bipo

[Ol Piksa long pes 15]

God i amamas, long wanem, ol samting em i tingting pinis long mekim bai kamap tru, maski ol man bilong graun i mekim planti pasin kranki

[Piksa long pes 16]

Sapos yumi putim ol samting bilong God i stap nambawan samting, dispela bai helpim yumi long karim ol bel hevi