Ol Man i Askim
Bilong Wanem Ol Witnes Bilong Jehova i No Save Insait Long Woa?
Ol Witnes Bilong Jehova, maski ol i stap long wanem wanem hap bilong graun, long bipo yet na i kam inap long nau, ol i no save insait long ol pait i kamap namel long ol kantri o pait i kamap namel long ol lain man insait long kantri yet. Inap 50 yia i go pinis, buk Australian Encyclopædia i tok: “Ol Witnes Bilong Jehova i no save insait liklik long woa.”
Wanpela bikpela as na ol Witnes i no save insait long woa em olsem: Sapos ol i insait long woa, dispela bai i bagarapim maus bilong bel bilong ol em ol bilip Kristen i skulim pinis. Ol i skulim maus bilong bel bilong ol long ol tok na pasin bilong Bikpela Jisas Krais. Em i tokim ol disaipel bilong em long laikim ol wantok bilong ol. Em i tok tu olsem: “Yupela i mas laikim ol birua bilong yupela, na yupela i mas mekim gutpela pasin long ol man i save bel nogut long yupela.” (Luk 6:27; Matyu 22:39) Taim wanpela disaipel bilong em i yusim bainat bilong helpim Jisas, Jisas i tokim em: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.” (Matyu 26:52) Long toktok na long pasin bilong em, em i kamapim klia tru olsem ol disaipel bilong em i no ken tru mekim wok long ol samting bilong pait.
Narapela as na ol Witnes Bilong Jehova i no save insait long woa em ol i insait long wanpela bikpela lain bilipman i stap long olgeta hap bilong graun. Woa bai i mekim na wanbilip bai pait long wanbilip na dispela bai brukim lo Jisas i givim long ol disaipel bilong em long “laikim tru ol arapela man bilong lain bilong [em].”—Jon 13:35.
Dispela ol stiatok long laikim tru ol man em tok ol Witnes Bilong Jehova i no kolim nating tasol long maus, nogat, ol i save bihainim tru long i stap bilong ol. Olsem, tingim pasin bilong ol long taim bilong Wol Woa 2, long 1939-1945. Long Yunaitet Stets, gavman i bin kalabusim inap olsem 4,300 Witnes Bilong Jehova, long wanem, ol i no laik insait long pait. Long Briten, gavman i bin kalabusim olsem 1,500 Witnes, na insait long en i gat olsem 300 meri em ol i no laik mekim ol samting bilong helpim woa. Long Natsi Jemani, gavman i tok na ol i kilim i dai winim 270 Witnes, long wanem, ol i no laik insait long pait. Aninit long gavman Natsi, ol i bin kalabusim moa long 10,000 Witnes long ol kalabus na ol banis kalabus nogut. Ol Witnes long Japan tu i bin kisim bikpela bagarap. Famili bilong ol man husat i dai long Wol Woa 2 o ol narapela woa i mas save olsem i no gat tru wanpela Witnes Bilong Jehova i insait long kilim i dai ol dispela man o meri.
Ol laspela tok bilong Wolfgang Kusserow i kamapim klia tru tingting bilong ol Witnes Bilong Jehova long woa. Long 1942, gavman Natsi i katim nek bilong dispela man Jeman i gat 20 krismas, long wanem, em i no laik insait long woa. (Aisaia 2:4) Em i tokaut long ai bilong kot bilong ami olsem: “Mi kamap bikpela olsem wanpela Witnes Bilong Jehova, na tok bilong God i stap long Ol Skripsa Holi i skulim mi. Nambawan bikpela lo i holi tru na i winim olgeta arapela lo em i givim long ol man em olsem: ‘Yupela i mas laikim God, Bikpela bilong yumi. Na yupela i mas laikim ol wantok olsem yupela i laikim yupela yet.’ Ol narapela lo i tok: ‘Yupela i no ken kilim i dai ol arapela manmeri.’ Olsem wanem? Man Bilong Wokim yumi i putim ol dispela lo bilong ol diwai long bihainim?”—Mak 12:29-31; Kisim Bek 20:13.
Ol Witnes Bilong Jehova i bilip olsem Jehova, em God i Gat Olgeta Strong, em wanpela tasol bai i kamapim bel isi tru long graun. Ol i save lukluk long em long inapim promis bilong em olsem em bai “mekim i dai pait long olgeta hap graun.”—Song 46:9.