Wanem Samting i Painim Man Taim Em i Dai?

“Olgeta man i gat wanpela spirit i no save dai, ol man nogut ol tu i gat wanpela spirit i no save dai . . . Ol i kisim strafe long paia i no save pinis, ol i no save dai, olsem na i no gat rot bilong [pinisim] pen bilong ol.” ​—Clement of Alexandria, wanpela man bilong raitim buk olsem 200 yia samting bihain long Krais.

WANKAIN olsem Clement, ol man i tok olsem hel em i wanpela ples bilong kisim pen, ol i bilip olsem ol man i gat wanpela spirit i no save dai. Olsem wanem? Baibel i helpim dispela bilip? Skelim tok Baibel i mekim bilong bekim ol dispela askim.

Olsem wanem? Namba wan man, Adam, i no inap i dai? Taim God i wokim pinis Adam, em i givim dispela tok long em: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:​16, 17) Em nau Adam inap dai.

Wanem samting i painim Adam taim em i mekim sin? God i no tok olsem Adam bai kisim bikpela pen long hel olsem strafe bilong em, nogat. Baibel i tok: “Bai yu wok hat tru long kisim kaikai bilong yu na tuhat bai i kamap long pes bilong yu. Na bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.” (Stat 3:19) Dispela tok bilong God i no makim olsem wanpela hap bilong Adam bai stap laip yet bihain long taim em i dai.

Olsem wanem? I gat wanpela man i no inap i dai? Nogat. Olgeta man i save dai. Long Saveman 3:​19, Baibel i tok: “Pinis bilong yumi man i wankain olsem ol abus. Ol abus i save dai, na yumi man tu i save dai.” God i bin kisim graun na wokim tupela [man na abus], olsem na taim tupela i dai bai tupela i kamap olsem graun gen.” Aposel Pol i tok: “Yumi save, wanpela man [Adam] i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Olgeta man i gat sin, olsem na olgeta man i save dai.

Olsem wanem? Taim man i dai em inap pilim ol samting long bel, o save long wanpela samting? Baibel i tok: “Ol man i gat laip . . . ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting. . . . Yu no inap mekim wok o tingting o kisim gutpela tingting na save long ples bilong ol man i dai pinis.” (Saveman 9:​4, 5, 10) Sapos ol man i dai pinis “ol i no inap save long wanpela samting” na ol i no inap “tingting,” orait olsem wanem ol inap pilim pen long hel? Ol i no inap, a?

Jisas Krais i tok taim man i dai i olsem em i slip tasol.a (Jon 11:​11-​14) Tasol ating sampela bai tok olsem Jisas i bin skulim ol man olsem hel em i wanpela ples i hat na ol sinman bai i go long helpaia. Orait yumi ken skelim tok Jisas i mekim long hel.

[Futnot]