Dispela Em “Rot Yupela i Mas Bihainim”

Stori Bilong Emilia Pederson

Ruth E. Pappas i raitim dispela stori

MAMA i karim mama bilong mi, Emilia Pederson, long 1878. Em i kamap wanpela tisa long skul, tasol samting em i gat laik tru long mekim em long helpim ol man long i go klostu long God. Samting i kamapim klia laik bilong Mama long mekim dispela wok em wanpela traipela patrol boks i stap long haus bilong mipela long liklik taun Jasper, Minnesota, long Amerika. Em i kisim dispela boks bilong putim ol samting bilong em bilong i go long Saina, em hap we em i laik mekim wok olsem wanpela misineri. Tasol mama bilong em i dai na em i mas senisim ol plen bilong em na stap bek na lukautim ol liklik bratasusa bilong em. Long 1907, em i maritim Theodore Holien. Na em i karim mi long Disemba 2, 1925​—mi laspela long 7-pela pikinini.

Mama i gat laik tru long painim bekim bilong ol askim em i gat long Baibel. Wanpela askim em i gat em long dispela bilip bilong hel, olsem em ples paia we ol man nogut bai karim bikpela pen. Em i askim wanpela bikman bilong lotu Luteran long kamapim tok bilong Baibel i sapotim dispela bilip bilong hel. Em i tokim Mama olsem, em i no bikpela samting long wanem tok Baibel i mekim​—ol man i mas bilip tasol olsem hel em ples paia bilong kisim pen.

Em Inapim Tru Laik Bilong Em Long Save Long Tok i Tru

Bihain tasol long 1900, liklik susa bilong Mama, em Emma, i go long Northfield, Minnesota, bilong skul long musik. Em i go i stap long haus bilong tisa bilong em, Milius Christianson. Meri bilong tisa em i wanpela Sumatin Bilong Baibel, em nem bilong ol Witnes Bilong Jehova long dispela taim. Emma i tok em i gat wanpela susa husat i save strong long ritim Baibel. Na i no longtaim Misis Christianson i raitim wanpela pas i go long Mama. Dispela pas i gat ol bekim bilong ol askim em Mama i gat long Baibel.

Wanpela de, wanpela Sumatin Bilong Baibel, em Lora Oathout, i kalap long tren long Sioux Falls, South Dakota, na i go long Jasper bilong autim tok. Mama i stadi long ol buk bilong Baibel em i kisim, na long 1915, em i kirap long autim tok i tru bilong Baibel long ol narapela, na tilim ol buk na nius em Lora i bin givim long em.

Long 1916, Mama i harim olsem Charles Taze Russell bai i stap long kibung long Sioux City, Iowa. Mama i laik i go long dispela kibung. Long dispela taim, Mama i gat 5-pela pikinini, na laspela pikinini i gat 5-pela mun tasol, em Marvin. Tasol maski i olsem, Mama wantaim olgeta pikinini bilong em, ol i kalap long tren na ron inap 160 kilomita na i go long kibung long Sioux City. Em i harim ol tok bilong Brata Russell, na lukim “Photo-Drama of Creation,” na i kisim baptais. Taim em i kam bek long haus em i raitim stori bilong kibung na ol i kamapim long nius Jasper Journal.

Long 1922, 18,000 manmeri i bin go long kibung long Cedar Point, Ohio, na Mama em i wanpela bilong ol. Bihain long dispela kibung, em i no bin lusim wok autim tok bilong Kingdom Bilong God. Em i stap olsem gutpela piksa na dispela i kirapim mipela long bihainim dispela tok: Dispela em “rot yupela i mas bihainim”​—Ais. 30:21.

Wok Autim Tok Bilong Kingdom i Karim Kaikai

Long yia 1920 samting, papamama bilong mi i go stap long wanpela haus i stap ausait long taun Jasper. Papa i gat gutpela wok bisnis na em i gat bikpela famili tu bilong lukautim. Em i no save stadi planti taim tumas long Baibel olsem Mama i mekim, tasol em i givim bel long helpim wok bilong autim tok na em i larim ol wasman raun i kam stap long haus. Sampela taim, wasman raun i save mekim wanpela tok long haus bilong mipela, na inap olsem handet manmeri i save kam bung, na ol i pulapim olgeta hap insait long haus.

Taim mi gat 7-pela krismas, anti bilong mi Lettie i ring na i tok ol neiba bilong em, Ed Larson na meri bilong em, i laik stadi long Baibel. Na i no longtaim na ol i bilipim tok bilong Baibel na bihain ol i singautim neiba bilong ol, Martha Van Daalen, em wanpela mama i gat 8-pela pikinini, long insait long stadi. Martha wantaim famili olgeta bilong em, ol i kamap ol Sumatin Bilong Baibel.a

Long dispela taim, Gordon Kammerud, em wanpela yangpela man husat i save stap sampela kilomita longwe long mipela, i kirap wok wantaim Papa. Ol i bin givim tok lukaut long Gordon olsem: “Was gut long ol pikinini meri bilong bos. Lotu bilong ol i narapela kain.” Tasol Gordon i kirap stadi long Baibel na i no longtaim em i bilip olsem em i painim pinis tok i tru. Tripela mun bihain, em i kisim baptais. Papamama bilong em tu i kamap ol Sumatin Bilong Baibel, na famili bilong mipela ol Holien i kamap gutpela pren bilong famili Kammerud, na famili Van Daalen.

Kisim Strong Long Rot Bilong Ol Kibung

Kibung i kamap long Cedar Point i bin strongim tru Mama olsem na em i no laik tru long lusim ol narapela kibung. Olsem na ol samting mi tingim long taim mi yangpela yet em ol dispela bung mipela i save go long en. Kibung i kamap long Columbus, Ohio, long 1931 i bikpela samting moa, long wanem, long dispela taim ol i kisim dispela nem, Ol Witnes Bilong Jehova. (Ais. 43:​10-12) Na mi tingim tu kibung long Washington, D.C., long 1935, we i gat wanpela tok i tokaut long lain “planti manmeri tru,” em Kamapim Tok Hait i stori long en. (KTH 7:9) Ol sista bilong mi, em Lilian na Eunice, ol tu i insait long 840 manmeri husat i bin kisim baptais long dispela taim.

Famili bilong mipela i go long ol kibung long Columbus, Ohio, long 1937; Seattle, Washington, long 1938; na New York City long 1939. Ol Van Daalen na ol Kammerud na ol narapela i go wantaim mipela, na namel long ron bilong mipela long longpela rot, mipela i wokim kem na slip. Long 1940, Eunice i maritim Leo Van Daalen, na ol i kamap painia. Long wankain yia, Lilian i maritim Gordon Kammerud, na ol tu i kamap painia.

Kibung i kamap long St. Louis, Missouri long 1941, em i wanpela spesel kibung long mi. Long dispela kibung, planti tausen yangpela i kisim buk Children. Dispela kibung i kamapim bikpela senis long laip bilong mi. Bihain liklik, long Septemba 1, 1941, mi wantaim brata bilong mi Marvin na meri bilong em, Joyce, i kamap painia. Long dispela taim mi gat 15 krismas.

Mipela i sindaun long hap i gat ol fam long en, na ol brata i gat fam i painim hatwok long i go long ol kibung, long wanem, kibung i save kamap long taim bilong kisim kaikai. Olsem na bihain long ol kibung, mipela i save bung baksait long haus bilong mipela na stori gen wantaim ol lain husat i no bin go long kibung, long ol tok bilong kibung bambai ol i no lus long ol gutpela tok. Bikpela amamas i save kamap long ol dispela bung.

Skul Gileat na Mekim Wok Long Narapela Kantri

Long Februeri 1943, ol i kamapim Skul Gileat bilong lainim ol painia long kamap misineri. Sikspela long famili bilong ol Van Daalen i insait long namba 1 klas​—ol brata em Emil, Arthur, Homer, na Leo; wantaim kasen bilong ol Donald; na susa bilong mi, Eunice, em meri bilong Leo. Mipela i amamas long tok gutbai tasol mipela i sori tu, long wanem, mipela i no save, bai mipela inap long bung gen, o nogat. Bihain long skul, ol i makim olgeta sikspela long mekim wok misineri long Pueto Riko, long dispela taim i bin i gat olsem sikspela Witnes tasol long hap.

Wanpela yia bihain, Lilian na Gordon wantaim Marvin na Joyce, ol i go tu long namba 3 klas bilong Skul Gileat. Na ol i salim ol tu i go long Pueto Riko. Na long Septemba 1944, long taim mi gat 18 krismas, mi go long namba 4 klas bilong Skul Gileat. Bihain long mi pinis skul long Februeri 1945, mi go long Pueto Riko na wok wantaim brata na tupela susa bilong mi. Em wanpela gutpela ekspiriens tru mi kisim! Maski mipela i hatwok yet long lainim tok Spen, insait long sotpela taim tasol sampela bilong mipela i lukautim 20 Baibel stadi samting. Jehova i blesim dispela wok. Long nau i gat inap olsem 25,000 Witnes long Pueto Riko!

Ol Hevi i Painim Famili Bilong Mipela

Leo na Eunice i stap bek long Pueto Riko bihain long pikinini man bilong ol, Mark, i kamap long 1950. Long 1952, ol i tingting long i go holide long ples na lukim ol famili. Long Epril 11, ol i kalap long balus. Bihain tasol long balus i lusim graun na flai, em i pundaun long solwara. Leo na Eunice i dai. Mark i bin gat tupela krismas tasol. Em i drip antap long solwara taim wanpela i kisim em i go antap long wanpela bet gumi na ol i givim win long em​—na em i stap laip.b

Faipela yia bihain, long Mas 7, 1957, Mama na Papa i draiv i go long Haus Kingdom na taia bilong ka i slek na ol i mas senisim. Taim ol i wok long senisim taia bilong ka long sait bilong rot, wanpela ka i ron i kam bamim Papa na em i dai. Inap olsem 600 manmeri i bung bilong harim fiuneral tok long dai bilong em, dispela fiuneral tok i autim gutpela tok long ol manmeri long komiuniti, em ol i save rispektim Papa.

Ol Nupela Asainmen

Paslain liklik long Papa i dai, mi kisim nupela asainmen long mekim wok misineri long Ajentina. Long Ogas 1957, mi kamap long taun bilong Mendoza i stap aninit long ol maunten Andes. Long 1958, ol i makim George Pappas, wanpela sumatin bilong namba 30 klas bilong Skul Gileat long kam mekim wok misineri long Ajentina. Mi na George i kamap gutpela poroman, na mipela i marit long Epril 1960. Long 1961, Mama i dai taim em i gat 83 krismas. Em i bin bihainim gut tru dispela rot bilong lotu i tru na em i bin helpim planti long mekim olsem.

Inap 10-pela yia, mi na George i wok wantaim ol narapela misineri long ol narapela narapela haus misineri. Na bihain mipela i mekim wok sekit inap sevenpela yia. Long 1975, mipela i go bek long Amerika bilong lukautim ol famili i sik. Long 1980, ol i singautim man bilong mi long mekim wok sekit long ol hap we ol i save mekim tok Spen. I gat olsem 600 kongrigesen i mekim wok long tok Spen long Amerika. Inap 26 yia, mipela i raun long planti bilong ol dispela kongrigesen na lukim namba bilong ol kongrigesen i winim 3,000.

Ol i Wokabaut Long dispela “Rot”

Mama i kisim amamas tu long lukim ol yangpela insait long famili bilong em i kirap insait long mekim wok autim tok fultaim. Olsem, Carol, pikinini meri bilong bikpela susa bilong mi, Ester, i kirap mekim wok painia long 1953. Em i maritim Dennis Trumbore, na ol i insait long wok autim tok fultaim i kam inap long nau. Narapela pikinini meri bilong Ester, em Lois, i maritim Wendell Jensen. Ol i go long namba 41 klas bilong Skul Gileat na ol i wok olsem misineri long Naijiria inap olsem 15-pela yia. Susa bilong Leo, em Ruth La Londe, na man bilong em Curtiss, i lukautim Mark, em papamama bilong em i bin dai taim balus i bin pundaun. Mark na meri bilong em, Lavonne, i mekim wok painia inap planti yia na mekim bikpela long fopela pikinini bilong ol insait long dispela “rot.”​—Ais. 30:21.

Long famili bilong mi, brata bilong mi Orlen, em i stap laip yet na em i gat 95 krismas samting. Em i stap gut yet long mekim wok bilong Jehova. Mi na George i amamas long insait yet long mekim wok autim tok fultaim.

Ol Samting Mama i Lusim i Stap

Mi holim yet wanpela samting bilong Mama i dia tumas long em​—em wanpela tebol i gat kabot aninit long en. Em presen papa i bin givim long em taim tupela i marit. Insait long wanpela bilong ol dispela kabot, i gat olpela buk bilong em i stap na i gat ol pas na ol stori bilong niuspepa em i bin raitim em ol dispela stori i bin givim gutpela tokaut long ol man long tok bilong Kingdom. Na sampela i gat ol det kirap long 1900 samting. Na insait long kabot tu i gat ol pas i dia tumas long Mama we i kam long ol pikinini bilong em husat i bin kamap misineri. Olgeta taim mi save amamas long ritim gen ol dispela pas! Na ol pas bilong em i save strongim mipela olgeta taim, na i pulap long planti gutpela tingting. Tru, Mama i no bin inapim laik bilong em long kamap wanpela misineri. Tasol em i bin gat strongpela laik long mekim wok misineri na dispela i kirapim ol lain i kamap bihain long em long mekim olsem. Mi wetim tru dispela taim we famili olgeta bai bung gen wantaim Mama na Papa long Paradais long graun!​—KTH 21:​3, 4.

[Ol Futnot]

[Piksa long pes 17]

Emilia Pederson

[Piksa long pes 18]

1916: Mama, Papa (i holim Marvin); aninit, long han kais i go han sut: Orlen, Ester, Lilian, Mildred

[Piksa long pes 19]

Leo na Eunice, paslain liklik long ol i dai

[Piksa long pes 20]

1950: Antap, long han kais i go han sut: Ester, Mildred, Lilian, Eunice, Ruth; aninit: Orlen, Mama, Papa, na Marvin

[Piksa long pes 20]

George na Ruth Pappas long wok sekit, 2001