Yu Ting i Gat Rot Bilong Kliagut Long Ol Tok Bilong Baibel?
“Long olgeta Sande, mipela famili i save ritim Baibel. Tasol mi no amamas tumas long mekim. Mi bilip olsem Baibel em i Tok Bilong God, tasol mi hatwok tru long kisimgut ol tok mi ritim.” —Steven, Briten.
“Taim mi gat 17 krismas, mi traim long ritim Baibel. Mi hatwok tru long kisimgut, olsem na mi givap.”—Valvanera, Spen.
“Mi stat long ritim Baibel, long wanem, mi wanpela Katolik na mi pilim olsem mi mas ritim. Bihain long 3-pela yia mi pinisim! Tasol mi no kliagut long planti tok mi ritim.”—Jo-Anne, Australia.
BAIBEL i stap yet olsem nambawan buk ol man i laikim. Ol man i strong yet long baim Baibel, winim olgeta narapela buk, na planti man moa inap kisim, na i stap long planti tok ples, winim olgeta taim bipo. Ol inap kisim tu long kaset, CD, na DVD. Tasol planti man i gat Baibel ol i hatwok tru long kisimgut ol tok bilong en. Olsem wanem? Yu tu i pilim olsem?
Yu Ting God i Laik Bai Yumi Kliagut Long Ol Tok Bilong Baibel?
Baibel i tok: “Spirit bilong God yet i bin kamapim olgeta tok i stap long buk bilong God.” (2 Timoti 3:16) Yes, God Jehova i bin givim Baibel long yumi. Yu ting em i laik bai yumi kliagut long ol tok bilong en? O yu ting em i mekim na bai sampela tasol, olsem ol pris pasto na ol saveman bilong Baibel, ol tasol inap kisimgut ol tok bilong en?
Tingim ol dispela ves bilong Baibel:
“Tok nau mi givim yupela, em i no hat tumas long yupela i save na bihainim. Nogat.”—Lo 30:11.
“Sapos wanpela man i helpim narapela man long save long as bilong tok bilong yu, orait em i kisim lait long bel bilong en. Na dispela tok i givim tingting long man i no gat planti save.”—Song 119:130.
“Jisas i tok olsem, ‘Papa, yu Bikpela bilong heven na graun, mi tenkyu long yu, long wanem, yu bin haitim ol dispela samting long ol man i gat gutpela save na tingting, na yu bin soim long ol man i stap olsem ol liklik pikinini tasol.’ ”—Luk 10:21.
Tru tumas, God i laik bai yumi save gut long ol tok bilong Baibel! Tasol planti man i hatwok tru long save gut long ol tok bilong en. Wanem samting inap helpim ol? Ol stori i kamap bihain long dispela bai kolim 3-pela samting bilong helpim yu long kliagut long ol tok bilong Baibel.