Rot Bilong Kliagut Long Ol Tok Bilong Baibel

3. Larim Ol Narapela i Helpim Yu

Taim Edward John Eyre i wokabaut long Nullarbor, em wanpela traipela hap graun long Ausralia, ol Aborijini i lainim Eyre long pasin bilong kisim wara long wesan na long ol diwai kumurere. Eyre i orait long kisim helpim long ol man i save gut long dispela hap, na bihain dispela i helpim Eyre long abrusim bagarap.

DISPELA stori i kamapim klia olsem, bilong mekim gut wanpela wok, sampela taim yumi mas larim narapela i gat save i helpim yumi. Na i wankain tu taim yu stat long ritim Baibel.

Jisas i save olsem, bilong ol disaipel bilong em i ken kliagut long ol tok bilong Baibel, ol i mas larim ol narapela i helpim ol. Wanpela taim “em i helpim ol long tingting gut long as bilong ol tok i stap long buk bilong God.” (Luk 24:45) Jisas i luksave olsem ol man i mas kisim helpim bambai ol i ken kliagut long ol tok ol i ritim long Baibel.

Helpim i Kam Long Husat?

Jisas i tokim ol disaipel tru bilong em long givim dispela helpim. Paslain long Jisas i go long heven, em i tok: “Yupela i mas i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.” (Matyu 28:​19, 20) Nambawan wok bilong ol Kristen em long mekim wok tisa, na helpim ol man long save long olsem wanem ol inap bihainim ol stiatok bilong Baibel. Ol Kristen tru i save helpim ol narapela long kliagut long ol tok bilong Baibel.

I no longtaim bihain long Jisas i givim dispela wok long ol disaipel, wanpela man Itiopia i ritim wanpela hap bilong tok profet bilong Aisaia. Em i kamap long sampela ves em i no kliagut long en. Ol dispela ves i tok: “Em i no bin mekim wanpela tok. Em i pasim maus olsem sipsip ol i kisim i go bilong kilim, na olsem pikinini sipsip ol i laik katim gras bilong en. Ol i daunim em tru, na ol i no mekim stretpela kot long em. Olsem na em i no gat ol lain pikinini i stap, bai ol man i ken stori long ol. Nogat. Ol i bin pinisim laip bilong en, na em i no i stap moa long graun.”​​—Aposel 8:​32, 33; Aisaia 53:​7, 8.

Man Itiopia i askim Filip, em wanpela Kristen i gat save long Baibel, olsem: “Profet i tok long husat na i mekim dispela tok? Em i tok long em yet, o em i tok long narapela man?” (Aposel 8:​34) Man Itiopia i bin go long Jerusalem long lotu, na ating em i bin beten long God i ken kliaim tingting bilong em. Tasol maski em i gat bikpela laik long kisimgut ol tok em i ritim, em i no kliagut. Long pasin daun em i askim Filip long helpim em. Man Itiopia i amamas tru long ol tok Filip i kamapim, na dispela i kirapim em long kamap Kristen.​​—Aposel 8:​35-​39.

Long nau, ol Witnes Bilong Jehova i mekim dispela wok em Filip na ol narapela Kristen bilong pastaim i bin mekim. Long 235 kantri, ol Witnes i amamas long helpim ol man long kliagut long ol tok bilong Baibel. Ol i mekim olsem long rot bilong stadi long ol bikpela tok bilong Baibel. Ol i stadi long wanpela tok, na bihain narapela tok, na skelim ol tok Baibel i mekim long en.a​​—Lukim blok “Ol Gutpela Bekim Bilong Ol Askim Bilong Baibel.”

“Mi Kisim Bekim Long Olgeta Askim Bilong Mi”

Steven, Valvanera, na Jo-Anne, em yumi stori long ol long kirap bilong namba wan stori, ol i kirap long stadi long Baibel wantaim ol Witnes Bilong Jehova. Steven i tok: “Mi kirap nogut tru olsem long rot bilong skelim ol stiatok na ol stori bilong Baibel, Baibel yet i kamapim bekim bilong ol askim. Taim mi no kirap yet long stadi wantaim ol Witnes, i no gat man i bin soim mi long dispela pasin bilong stadi. Mi amamas tru long save olsem bekim bilong ol askim i stap long Baibel.”

Valvanera i wanbel. Em i tok: “Olgeta tok mi lainim em i stret long tingting bilong mi. Mi kisim save olsem i gat ol gutpela as na mi inap bilip long ol tok​—i no olsem Sios i tok ol dispela tok i tru na long dispela as tasol mi bilip, nogat.” Jo-Anne i tok: “Mi kisim bekim bilong olgeta askim bilong mi na dispela i kirapim mi long rispek tru long Man i givim Baibel long yumi, long wanem, em i bin save olsem ol man bai i gat kain kain askim na em i bin putim bekim bilong ol dispela askim long Baibel.”

Yu save long wanpela Witnes Bilong Jehova? Sapos olsem, gutpela sapos yu askim em long soim yu long pasin bilong stadi long Baibel. Sapos yu yet i no save long wanpela Witnes, orait salim pas long wanpela atres i stap long pes 4 bilong dispela nius. Bai i no hatwok long save gut long Tok Bilong God sapos yu kisim helpim long holi spirit bilong God, na larim wanpela tisa bilong Baibel i helpim yu, na no ken larim ol tingting yu kisim pinis i pasim yu. Yes, i gat rot bilong yu inap kliagut long ol tok bilong Baibel!

[Futnot]

[Blok/Piksa long pes 8]

Ol Gutpela Bekim Bilong Ol Askim

Sampela tok ol Witnes Bilong Jehova i save skelim long Baibel stadi program bilong ol:

• I gat wanem as na God i wokim dispela graun?

• Ol man i dai pinis ol i stap we?

• Yu ting yumi stap long “taim bilong las de”?

• Bilong wanem God i larim pen na hevi i stap?

• Olsem wanem mi ken helpim famili bilong mi i stap amamas?

[Ol Piksa long pes 7]

Bilong kliagut long ol tok bilong Baibel . . . beten askim God long holi spirit, no ken larim ol tingting yu kisim pinis i pasim yu, larim ol narapela i helpim yu